3-4 jaska Jehován yunua ninkatan kainkaini Nínive maewan ewapajaida xaba dabe inun besti main kai kapukekaintibiaken Jonás ja maewan anu jikitan xaba bestichai maewan kapukekin jui kushipawen jatu yuikubainkin: “40 xaba keyudiama matuki sinatakin Dios kushipajaida dasibi jatu binuatun Nínive maewan yamawakin keyuxanikiki”, jatu wakubainai

5 ja maewan anu jiweabun ninkatan jaska Dioskidi Jonásin jatu yuiai ikunwankin: “Samakenankanwen”, iki yubakatan xanen ibubu inun, xanen ibu bexmasbu inun, nuitapajaidaibun jawen nui bika teneai unanmati tadi bexa sawe keyuabun 6 jaska Jonásin jatu banabimai Nínive xanen ibujaidatun ninkadiatan jawen xanen ibu tsauti anua butukidan jawen xanen ibun tadi jawendua pekatan jawen nui bika tenei unanmati tadi bexa sawediatan chi mapuki tsaua 7 jawen medabewanikabube janchatan jau eska yunuti bena waxununbun jatu yuikin: “Piti inun nuxuti yudabu dasibibun jau piyamanunbunwen. Ja dikabi jatun ina awa inun jatun chaxuwan piti inun unpax jau jatu amayamadianunbunwen. 8 Ana jaska tibi ikama man shinan chakakin jaska chakabu tibi man amis inun man detenamei jeneama man ikunkainai natian jenetan nui bika teneai unanmati tadi bexa sawe keyutan jau nukuwen nuinun Dios kushipajaida dasibi jatu binua jui kushipawen yukakubainkanwen. 9 Nun jaska wakubainaya nukun chakabuwen nukuki sinatabiashina Diosun jawen shinan betsa waxanimenkain. Jaska waya nun mawama ixanaii”, jatu wa buxun mae jidabi anu jatu yuikubaunaibun

10 Nínive anu jiweabu jaska wakubaini jatun chakabu ma jeneabun Diosun uintan jawen kupiti Jonásin jatu banabimashina Diosun shinan betsa watan kupiti jatu anu ana yunuamaken