Diosun duapa pepawenan, kenwain benimakunkaintikiaki, na nawati janchadan
Davidin kanta kenenikiaki.
65
Dios mae Sión mekeatuun,min pepajaidawen taexun mia kenwanmisbuki.
Jaska uinkin min bechipaiai mia yubatan
menenun, iwanan, mia axunkubainmisbuki.
2 Mai jidabi anu jiwebaunabun mibe janchanun ika bekanikiki.
Mibe janchakin mia yukaibu jatun jancha ninkakubainwen.
3 Nukun chakabu tibitun nuku tsumaxun bika tenemabiaya
mian ja chakabu bechipaiama nuku buaxunkin min ana shinainsmaki.
4 Jadatuda yuda min jiwe medibi anu mia dapi jiwemakin
katuxun min iyua benimakunkainmiski.
Betsa betsapa pejaidawen min jatu duawadan,
min jiwe medibi anua nun pe jiwekatsis ikaii.
5 Min nukun mekenika Diosunan,
pepa yunukin chakabu nemanixun jawen min kushipajaida nuku uinmakin
e imakin min nuku xabakabi jawen manakukubainaii.
Mai jidabi kesukauana anu inun ianenwan anu chaijaida jiweabun
mia ikunwain miki chiti ikabuki.
6 Min kushipa paewen mati matipa
min jatu tsuma pewakin mestenwanmiski.
7 Ianenwan bechuduni buspu tsaubidan
kunyan ikai nesewakin min pes wamiski.
Yudabu jatun mae anua itimaskaibu
nemakin min jatu pes wadiamiski.
8 Badi juaikidia inun badi kaikidi chaijaida ja maiwen jiwebaunabu
min e imati kushipajaida uin saki saki imisbuki.
Miwen benimai jiwebaunabu sai sai idiamisbuki.
9 Mian besti mai jidabi mekexun ui imakin dasibi min benemamiski.
Mian jene bai tapia tibi chada chada imakin nashimakin
xekiwan trigo min benemamiski.
Jaska wakin yunu bai wabu tibi min jatu pewaxunmiski.
10 Mian mai pewakin uiwen min babuwa dayakin
tsispubainkin ukebukun manchinbainabu
namakis ja bai tapianwen jau kanun ui ichapa min jabamamiski.
Jaska wakin mibanbu min jatu duawaxunmiski, yunu ichapa jatu inankinan.
11 Min nai kuin ichapawen jatu duawakin
jawa yaushiama min inanshinawen taea
ja yunu tsekati baditian biaibu midima min jatu duawamiski.
12 Janu tsua jiweabumanu basi benemakin duawakin min nanke datanmiski.
Ja mati tenanman yuinakapan mewe piti jayawakin
min beyusti tadi sawema keska wamiski.
13 Panpa anu ma basin keyubia anu janu chaxuwanen pi ichamisbuki.
Napaku anu xekiwan tibi benei bachi pepa sawemisbu keskaki.
Jaskawen taea dasibibu kantai benimai sai sai imisbuki.