Dios nuikipa yukatikiaki, na nawati janchadan
Davidin kanta kenenikiaki.
51
Jehová Diosuun, min nui paewen ewen dabanan iwe.Min ewen nuimiswen taexun en chakabu ea tede axunwen.
2 ¡Ibubis en chakabumis ea chukaxunwen!
¡Ean en kanemis ea tede axunwen!
3 Min yusian kanei en patapamis chanima ibubis en ma unaiin.
Jaskatan en shinan uke medan en chakabu ibubis en tede atidumaki.
4 Jawada chakabu min nemani ja meai min kupiti wani
ean ja mei mikidi besti en chakabumiski.
Jaskawen taea kupikin min unanti wamisdan, min kaneismajaidaki.
Min kupiti tsuan binutidumajaidaki.
5 Chanima en kain bena en chakabu iki taeniki.
En chakabudan, en kaindiama en ibu anua en jayaniki.
6 Chanima juinti pepa kayatapia jayabu min jatu bechipaiaii.
Min unanepa uke medanua min ea inanmiski, xabakabi ea tapinmakinan.
7 En chakabu min ea chuka en ana chakabu jayama ixanaii.
En chakabu ea chukakin min ea xunpin wanan,
ja matsi tanki juxupamis en binuxanaii, jawa ana chakabu jayamaidan.
8 En xau min ea teke teke abiaima
ana benima bena ea inankin
ea shinan chankanwankubainwen.
9 En chakabu atimapa tibi mia bebun taxnia min uiainan,
ea tede axuntan ana jaska shinankin uinyamawe.
10 En Diosuun, ana en juinti bena xunpin ea wakin
en yushin bena wakin ana ea chintuntimawawe.
11 En mibe nia ea paxkayamawe.
Min Yushin Pepa ea medanua ea mebinyamawe.
12 En benubiaya min ea medabewakin piskumani keska
ana shinan bena inankin ea shinan chankanwanwen.
Min yushin ichakanikamawen ea tsumawe, en jaskadiakunkainunan.
13 Min ea jaska waya ja min ea yusiainwen mia ninkaisbuma juni chakabubu
jau mia anu benunbun min bai pepakidi en jatu yusinxanaii.
14 En Diosuun, en Diosuun, en chakabu min ea piskumamiski.
Juni betsa en june tenainmadan, jaska keska en ana ayamanun ea nemawe.
Min jaska nemakubainkin jawa kaneismawen taea
min pepakidi kantai en chanikunkainxanaii.
15 Jehová Diosuun, en jui ea bepenwen.
Min ea jaska waya kantakin en mia kenwankubainxanaii.
16 En inankuin tibi inun inabu tibi en mia menu keyuxunkin
en mia jawen benimawakatsi ikin en mia inanbia min bechipaiamabiaken
en mia jaska waxunkatsi ikamaki.
17 Ja inankuinti tibi min bechipaiaidan,
en yushin min ea mexteima en bika tenebiai
jas shinanma en juinti betsa watan chakabu min ma ea pewaima
ea uinkin min ea bechipaiaii.
18 Min shinan pepawen Sión medabewakin pewawe,
ana jawen kenekauana benibaunkin jau Jerusalén ana kene bena wanunbunan.
19 Januxun inankuin tibi inun inabu menuti tibi jaska min bechipaiai
mia axuainbu jawen benimawakin min bikubainxanaii.
Mia kenwanti chi tapu anuxun ina awa bakebu mia menuxunxankanikiki, mia benimawakinan.