—¿Jadakidia min juai?— aka

Satanásan kemakin yuikin:

—Mai jidabi anu uinkin keyukubauntani en juaii— aka

3 ninkatan Jehován yuikin:

—En tsuma Job min uinmisdan, ¿jaskada jakidi min shinain? Jobun ea duawai chintuinsma keska mai jidabi anu jiweabu tsua juni betsa jaska keska jayamajaidaki. Jakia Job juni pepatun jawa chakabu mekin chakabuwaismatun tsua ichakawaismaki. Jawa chakabuwamabiaken Job min ea ichakawanbiashina Jobun jawa shinan chakama jawen shinan pepa bestiwen taexun tsuan jakidi chakabu yuitidubumaki— aka

4 jakia ichakanika Satanásan Jehová kemakin yuikin:

—Tsuabunda jawen jamapai chakabuwabiatan jawen yuda mekin ichakawadiama shinankin: “Peki. En tenetiduki”, itidubuki. Jakia tsuanda jawen yuda ichakawaya jatu daewakin jawa yaushiama dasibi jawada jaya jatu inantiduki, mawakatsi ikamadan. 5 Jakia jawen yuda min ichakawaya chanima miadi yuputiduki, mia bebunxunan— aka

6 Jehován ichakanika Satanás kemakin:

—Peki. Jaska min akatsis ikai atanwen. Jakia jawen jiwea meyamaxanwen— aka

7 jaska wa ninkatan Jehová anua ichakanika kainkain Jobun yuda jidabi chami atimapa isinjaida jawen buxkayabis inun jawen taeyabis achimaxun isin tenemakubainaya 8 jaska Satanásan chami tenema janu chi mapu udenmisbu anu ka tsauxun kenti pakexwen jawen chami xuai 9 jawen ainin uinkubainkin atimas yuikin:

—¿Jaskai pepasnikapaikunkainkin jaska min shinain ikai? ¡Dios ichadiwe, Dios miki sinataya mawadixunan!— aka

10 nemakin Jobun yuikin:

—Ainbuun, unainsmapatun jancha yuiyamawe. Pepa Diosun nuku inain nun bimiski. ¿Jaskai chakabu janua juai ja dikabi bikin nun tenetidumamen?— atan

chakabu dasibi Jobun tenekubaini Dioskidi jawa jancha chakabu yuiama ikunkainikiaki.

11 Jaska Jobun chami inun bika betsa betsapa tenekubainai ninkatan jawen jaibuaibu Temán mae pakeanua Elifaz inun, Súah mae pakeanua Bildad inun, Naamat mae pakeanua Sofar jabu Jobwen nuikin medabewakin pe shinanmanun ika jatun mae tibi anua janus dasitan jaki nukui bekin 12 chaikexun Job uinkubidani chaima jaki nukutan unankin: “¡Jabia nukun jaibuki!” iki jawen taea bis bis iki kaxai taekin jatun tadi ushni ushni atan Jobwen nuichakayamai jatun juinti nishmajaidakin Job uinmakin mai mishpu manaundi puta puta akin jatun buxka anudi mapu tukutan 13 janua Job dapi bua jabe main tsauxun Job isin tenejaidaiwen taea unain 7 xaba inun 7 meshu jabiatidi jawa jancha taskama ikaibun