JOB
Job nuitapanikiaki, na janchadan
1
Mai pakea ewapa Us anu juni betsa Job jiwea juni pepa jawa Dioskidi chakabuismatun Dioski mesekin dayaxunkunkainkin jawa chakabu mekin tsua chakabuwakatsi ikama jiwepaunikiaki. 2 Jawen bakebu inun jawen inabu jati jaya inikiaki, jawen juni bakebu 7 inun, jawen ainbu bakebu 3dan. 3 Janua jawen ina 7,000 chaxuwan inun, 3,000 camello inun, dabe ketaxamabainbaina 500dan, jabu ina awa bene pe dayamakubainkatsi jawen jubu mexte keyumis inun, 500 asno yuxan inun, jawen dayadu esclavo juni inun ainbu midima jati jawenas ipaunikiaki. Jaskawen taea badi juaikidi mai jidabi anu jiwebaunabudan, Job ja besti mabujaidayatun jatu binu keyua ipaunikiaki.4 Jobun 7 juni bakebun jatun beya chibankin jatun jiwetanxun semana tibi jabu tibitun semana betsa xaba bestichaitian jawen juni bake betsan piti jatu pewaxuntan jawen betsabu 6 inun jawen puibu 3 jatu kenaxun piti inun nuxuti jatu pewaxuna besikin jatubetan pikubainaibun 5 semana tibi pikubainkin janu keyuaibutian xaba betsaki Jobun shinankin: “Dios yuankin chakabuwashinabumenkain”, ixun Job penamajaida butukaun jawen bakebu kena beabu jau jatukidi pe Diosun shinanun jatu daewaxunun, iwanan, chaxuwan tesenxun Jobun chi anu bestibu tibi jatu menuxunpaunikiaki, Dios jatu daewaxunkinan.
6 Janua xaba betsatian Jehová Dios bebun jau benunbun jawen nai tsumabu jatu kena bei ichabun jabiatiandi nai tsuma ichakanika Satanásdi jua jatube niken 7 Jehován Satanás yukakin:
—¿Jadakidia min juai?— aka
Satanásan kemakin yuikin:
—Mai jidabi anu uinkin keyukubauntani en juaii— aka
8 ninkatan Jehován yuikin:
—En tsuma Job min uinmisdan, ¿jaskada jakidi min shinain? Jobun ea duawai chintuinsma keska mai jidabi anu jiweabu tsua juni betsa jaska keska jayamajaidaki. Jakia Job juni pepatun jawa chakabu mekin chakabuwaismatun tsua ichakawaismaki— aka
9 januxun Satanásan kemakin:
—Jobun mia jamen chibanmaki. Jakia min duawakubainaiwen taexun besti mia kenwankin duawai chintuinsmaki. 10 Tsuabunda Job ichakawapanan min jatu nemamiski, jawen yuda mekekin dasibi jawenabu inun jawada dasibi jaya mekexunkinan. Jawada shadabu Jobun dayakin biai medabewakin duawakin min pepa wakubainmiski. Jaskawen taea jawen inabu inun jawen mabu jaya dasibi jawen mai pakea anu jatube jiwea Jobun jatu binu keyuaki. 11 Jakia jawada shadabu dasibi jaya mebinxanwen. Min jaska wa miki sinatakin jabi yupukin mia bedabinwanxanikiki— aka
12 Satanás kemakin Jehován yuikin:
—Peki. Jawada shadabu Job jaya min jaska wakatsis ikai mian atanwen. Jakia Job ichakawakin jawen yuda meyamaxanwen— aka
jaska wa ninkatan Jehová anua ichakanika Satanás kainkainshinken
13 chipu xaba betsatian Jobun juni bake iyuatun jiwe anuxun jawen juni bakebu inun jawen ainbu bakebun piti pepa ichawaxun pikin uva vino aki besiaibun 14 janua Jobun jiwe anu juni betsa juxun banabimakin eska kaka Job yuikin:
—Jexe bananun, iwanan, ina awa bene ichapawen nun mai pukinbainaya jabiatiandi nuku dapi min asna yuxan dasibibun basi piaibun 15 jawaida june Sabeo nawa midimajaidabu bexun min inabu dasibi yumetsukin nupe chaipawen min dayadu dasibi tenan keyuaibun ea besti junei paxakidan en mia yuiaii— aki
16 jawen jancha menediama yui niken juni betsadi juxun jaki chanidiakin Job yuikin:
—Nai anua kana baka baka ikin min chaxuwan dasibi inun min chaxuwan uinikabu tenankin keyuaya ea besti junei paxakidan en mia yuiaii— aki
17 jawen jancha menediama juni betsadi juxun Job yuidiakin:
—Caldea nawabu xukua dabe inun besti jawaida bexun nuku detekin tenan keyukin min camello dasibi yumetsubainkanxuki. Ea besti junei paxakidan en mia yuiaii— aki
18 jawen jancha menediama ana juni betsadi juxun Job yuidiakin:
—Min juni bake iyuatun jiwe anuxun besikin min juni bakebu inun min ainbu bakebun pikin nuxuaibun 19 jadidi tsua jiweabumakidia niwewan jawaida bekin jiwe dexun dabe inun dabe tekekin min bakebuki di ikin jatu tenan keyuaya ea besti paxakidan en mia yuiaii— aka
20 ninkatan jaskawen taea punu nukajaidatan Job benitan jawen tadi ushnitan maxtekei mankutan Dios kenwain beui beti itan 21 yuikin:
—Tadiuma en kaini inun en mawa tadiuma en kainkainxanaii. Dasibi Jehován ja ea inankubainshina Jehován ana dasibi ea mebinxuki. Jakia Jehová Dios kenwankin en pepa wabestikubainxanaii— itan
22 dasibi benu keyubiatan Jobun jawa chakabu shinanma inun Dioskidi jawa chakabukin chakabu yuiama ikunkainikiaki.