Jerusalén anu Esdras jawenabube jikinikiaki, na janchadan
7
Chipu badi ichapa kaya Persia nawa xanen ibujaida bena jawen kena Artajerjesin jatu yunukubainaya jawenabu Diosbe janchaxunika jawen kena Esdras Persia anu jiwea jawenabu jati inikiaki. Esdrasin epadan, Seraías inikiaki. Seraíasin epadan, Azarías inikiaki. Azaríasin epadan, Hilquías inikiaki. 2 Hilquíasin epadan, Salum inikiaki. Salumnen epadan, Sadoc inikiaki. Sadocin epadan, Ahitub inikiaki. 3 Ahitubin epadan, Amarías inikiaki. Amaríasin epadan, Azarías inikiaki. Azaríasin epadan, Meraiot inikiaki. 4 Meraiotin epadan, Zeraías inikiaki. Zeraíasin epadan, Uzí inikiaki. Uzín epadan, Buquí inikiaki. 5 Buquín epadan, Abisúa inikiaki. Abisúan epadan, Finees inikiaki. Fineesin epadan, Eleazar inikiaki. Eleazarin epadan, Aarón ja dukun jawenabu Diosbe janchaxunika ipaunikiaki.6-7 Israelin enabu mekenika Jehová Diosun jawen yunuti jancha inun jawen nemati jancha Moisés yuia Moisin keneni ibubis tapinjaidanixun Esdrasin jatu yusinkubainmiswen taexun Esdras Jehován medabewai uinkubainaiwen taexun xanen ibujaida Artajerjes anu kaxun Esdras jaskakatsis ikin yuka: “Peki”, akimawen taea xanen ibujaida Artajerjesin jatu yunui 7 año kaya Babilonia anua Jerusalén anu chintuin Esdras jati jawenabuya junikiaki, jatidi Diosbe jawenabu janchaxunikabu inun, Levín enabu inun, kantamisbu inun, beputi mekenikabu inun, Dios kenwanti jiwe dayadubu Esdrasbe buidan. 8-9 Artajerjesin jatu yunukubaini ma 7 año kaya ja xaba ja dukun inun, uxe ja dukun ikaitian Babilonia anua unanuma taxni taebidani main bukubainaibun Jehován jatu duawakin medabewaya xaba ja dukun inun uxe 5tian Jerusalén anu jikinibukiaki. 10 Jaska Jehován yununi jawa betsa wama mestenwankatsi ikin uinkubainkin jawen yunuti jancha inun jawen nemati jancha jawenabu yusinkin jatu chibanmaxanun, iwanan, Esdrasin shinanikiaki.
11 Israelin enabu jawenabu jau jatu chibanmaxanun, iwanan, jawen yunuti inun jawen nemati jancha Jehován yusini unanjaidai jawenabu Diosbe janchaxunika Esdras yusinika inankatsi ikin eska jancha xanen ibujaida Artajerjesin jatu kenemaxun Esdras inani jabias jancha juni betsan ana keneni uinkanwen:
12 “En ea Artajerjes xanen ibujaidatun xanen ibubu ichapa en jatu yunukubainai Dios nai anuatun yunuti jancha unanjaidai jawenabu Diosbe janchaxunika Esdras jau unanuma kakunkainxanun, iwanan, en jakidi matu shinanmaii.
13 Janu en mai pakea anua en jatu yunubaunai anu Israelin enabu dasibi jiwebaunabu Jerusalén anu mibe bukatsi ikaibu butidubuki. Israelin enabu Diosbe janchaxunikabu inun Levín enabudi budiatidubuki. 14 Diosun yusini jancha min jaya chibankin Judán enabun mai pakea anu inun Jerusalén anu jaskada jiwebaunabu uinkin min tapinkubaunxanun ea xanen ibujaida inun en 7 unanepan ea medabewamisbun nun mia yunuaii. 15 Israelin enabun mekenika Dios Jerusalén anu jiwea pe shinankin jawa yaushiama plata pei jexe inun oro pei jexe nun mia inankuiain butanwen. 16 Ja dikabi Babilonia mae jatiubumanu jiwebaunabun pei mia inainbu bikin ichawatan Jerusalén anu Dios kenwanti jiwe waibu jau jawen jatu medabewakubainxanunbun pe shinankin yaushiama minabu yudan kaian inun minabu Diosbe janchaxunikabun pei inankuindiaibu budiatanwen. 17 Jerusalén anu matun mekenika Dios kenwanti jiwe anu jawen chi tapu anuxun jau menukin keyuxunkubainxanunbun ina awa bake inun, chaxuwan bene inun, chaxuwan bake inun, jabuyabi menuti xekiwan trigo inun, uva vino na peiwen jati bikubainxanwen, jawa mina wamadan. 18 Diosun jaska bechipaikin mia shinanmai chibankin oro pei jexe inun plata pei jexe texewen jaska pe shinankin mia inun mibe dayamisbubetan min jaskada wakubaintiduki. 19 Ja inun, min mekenika Dios kenwanti jiwe anuxun jawen kenwanti mabu nenu benibu mia inanshinabu buxun Jerusalén mekenika Dios bebunxun ana inankin tsaunbaunxanwen. 20 Min mekenika Dios kenwanti Templo anu jawada mabu betsa jayama binun, iwanan, en pei mekenikabun aduti jiwe anua jawada bikatsi ikin ja pei min bitiduki.
21 Jaska inun, man enabudan, ea en xanen ibujaida Artajerjesin Jene Éufrates badi kaikidi anua man pei mekenikabu dasibi en matu yunuaii. Dios nai anuatun yunuti jancha unanjaidai Esdras jawenabu Diosbe janchaxunmistun jawada dasibi matu yukai jawaida inanxankanwen. 22 Jatidan, 3,300 kilo plata mane inun, 22,000 litro xekiwan trigo inun, 2,200 litro uva vino inun, 2,200 litro piti xeni jati jawa binumama inankin jatida sau bikatsis ikin matu yukai jawa tanama inanxankanwen.
23 Jaska Dios nai anuatun jawen jiwe anu jayakatsi matu yukai sinatamama jawaida inankubainxankanwen, jau ea inun en juni bakebu inun jatixun nukun mai pakea en matu yunuai ninkaibu anu jawen kupiti jau nuku yunuyamaxanunan. 24 Jerusalén anu Dios kenwanti jiwe anu dayamisbu inun, Diosbe jawenabu janchaxunikabu inun, Levín enabu inun, kenwain kantamisbu inun, jawen jemaintin beputi mekemisbu inun, medabewanikabu inun, dayadubu impuesto man jatu yukayamakubainxanunbun en matu nemaii. Na yunuti jancha ninkakin man en mekenikabunan, jaskaki ninkaidakanwen.
25 Jamen miadan, Esdrasiin, ea ninkawe. Jaska min mekenika Diosun mia tapinmakin yusinmis chibankin Jene Éufrates badi kaikidi jene kexa betsaudi jiweabu min mekenika Diosun jancha unainbu inun unanbuma jatu yusinkubainwen. Ja inun, jau jabun mae mekekin yunununbun jatun yununika kushipabu katukin jatun xanen ibu bexmasbu katukin jatu yunuxanwen, jau jabun jawa kaneama jatu pe mekekin yunukubainxanunbunan. 26 Min mekenika Diosun yunuti jancha inun jawen nemati jancha inun ea Persia nawa xanen ibujaidatun en yunuti jancha inun en nemati jancha danankin chibanbuma jawaida jau jatu kupikubainxanunbunwen, tenainmenkain, ana mae betsa chaijaida anu nichinmenkain, pei ichapa biankin kupimenkain, bichiti jiwe anu bichimenkain. Jatiski, en janchadan”,
atan jaska Artajerjesin kenemanikiaki.
Esdras Dios kenwain jabe janchanikiaki, na janchadan
27 Eskawen taexun Esdrasin Dios kenwankin yuikin: “Nukun xenipabun mekenika Dios Jehováan, min pepajaidaki. Jerusalén anu min kenwanti jiwe ana atimapa uinkatsi ikama jau pewanunbun Persia nawa xanen ibujaidatun shinan min pe shinanma jatu yunua akimabuki. 28 Jabiaskadi wakin ea shinan chankanwankin jatu bebunxun jatun xanen ibujaida inun, jawen unanepabun medabewamisbu inun, jawen xanen ibu bexmasbu jatuwen ea nuimakin min jatu ea bechipaimaimaki. Jaskawen taea Jerusalén anu Israelin enabu xanen ibubu unanepabu jau ebe chintununbun jatu ichawatan en jatube chintuinmaki”, akin Esdras Diosbe janchakin yuinikiaki.
***************