6
Babilonia anuxun janu una mekekin adumisbu anua jau ja una Judán enabukidi Ciron jatukidi kenexun adumani jau benakin bechixununbun Persia nawa xanen ibujaida Daríon jawen tsumabu yunua 2 janu una adumisbu tibi anua benabaunkin mai pakea betsa jawen kena Media anu mae betsa Ecbatana anu xanen ibujaidatun jiwe jawenduajaida anuxun Ciron Jerusalén Templokidi keneni una atimas bechinibukiaki, eska jawen jancha jatukidi kenenidan:3 “Xanen ibui taeima año bestichai kakin xanen ibujaida Ciron eska jawen yunuti jancha jatu kenemakin:
‘Jerusalén anu jawen Dios kenwanti jiwekidi matu yununun ninkakanwen. Januxun Dios kenwankin inabu jidabi menukin jau keyukubainxanunbun jaki tsamabaunti waxun jawen kenwanti jiwe jau ana anunbunwen, jawen keyatapa 27 metro inun jawen jaxpa 27 metrodidan. 4 Ja dikabi mishki ewapa ichapa datsakin kedan wankin pewaxun chichibainkin keyutan ja mamaki ana chichibainkin keyudiatan ana ja kachu ja mamaki ana chichibainkin keyudiatan ji tuax sapa bena waxankanwen. Xanen ibujaidatun pei adukin mekemistun jatu pakakubainxanikiki. 5 Oro mane inun plata mane jawen kenwanti mabu wanibu Dios kenwanti jiwe Jerusalén anua ichawabainkin Babilonia anu Nabucodonosorin beni jau jatu ana inanxanunbunwen. Bikin ichawakin keyuxun Jerusalén anu buxun janu Dios kenwanti jiwe waibu anu ja medan tsaunkin jau manchinxanunbunwen’ ”, anikiaki.
6 Jaska keneni bechixunabu uintan Jene Éufrates kexa betsaudi badi kaikidi mai pakea yununika jawen kena Tatenai inun jabianudi xanen ibu bexmas Setar-boznai inun jabe dayamisbu jatu yunukin Persia xanen ibujaida Daríon eska jancha jatu kenematan jatu anu yunukin:
“Matudan, Jerusalén jenebidani kaindibidankanwen. 7 Januxun jau jatun Dios kenwanti jiwe bena waimabu jau menenunbun Judán enabu xanen ibu bexmas inun jatun yununika betsa betsapabu jatu ana nemama jatu jenetan jatu yunudibidankanwen, jau keyuxanunbunan. 8 Ana jatu nemakin bexteyamakanwen. Jau jatun Dios kenwanti jiwe jau menexanunbun jaska Judán enabu yununikabu man medabewaxanun en matu yunuaii. Jene Éufrates badi kaikidi mai pakea anu jikikin ea pei pakakubainmisbu xanen ibun pei bikin mekekubainmistun medabewakin binumama pei jawaida jatu pakakubainxankanwen, jau ja dayaibu jatun daya jeneyamanunbunan. 9 Ja inun, jaska Dios nai anuatun bechipaimis jawen kenwanti inabu jidabi pitiyabi menuxunkin keyukin jau Dios kenwankubainunbun ina awa inun, chaxuwan inun, chaxuwan bake inun, xekiwan trigo inun, sau inun, uva vino inun, piti xeni jati matu yukaibu xaba tibi Jerusalén anu jawenabu Diosbe janchaxunikabu jatu inankubainxankanwen, jawa jeneamadan. 10 Man jatu inankubaina Dios jaska waxunkin en xanen ibujaida jiweakidi inun en juni bakebu jiweakidi jau Dios jabun ea yukaxunkubainunbunwen.
11 Tsuanda en yunuti jancha danankin ninkama danainbudan, jawen jiwe jawen teweti betsa pekaxun nichintan debu kenutan jawen yuda ja mamaki janakin jawen puku nashtu anu timabain pesakin keunxankanwen. Unanxubida isin tenekunkaini mawaya jawen jiwe pekakin keyuxun chakabuwakin mese waxankanwen. Jaska dasibi en matu yunuaii. 12 Jerusalén anu Jehová kenwanti jiwe Templo janu jawen kena ipakexanai katuni akaibudan, xanen ibu betsan chakabuwakasmakin nawa betsabu pubenkin chakabuwakin jatu bika tenemaibu Diosun jatu kupikin jau jatu yamawaxanunwen. Ea Daríon na jancha eska en matu yunuaidan, kaneama axunkin menejaidaxunxankanwen”, anikiaki.
Dios kenwanti jiwe akubainkin keyunibukiaki, na janchadan
13 Jaska Daríon jatu yunuima Jene Éufrates kexa betsaudi badi kaikidi mai pakea betsa yununika xanen ibu bexmas Tatenai inun jabianudi xanen ibu betsa bexmas Setar-boznai inun jabe dayamisbun uintan jaska ma jatu yunuima jawa kaneama akubainkin keyunibukiaki. 14 Jaska wakinan, Diosun jancha yuixunika dabe Hageo inun Idón juni bake Zacaríasin jaska bebunkidi Diosun jatu yuimaima keska chibankin jau dayakubainunbun Judán enabu dayadubu yununikabun jatu yunukubainabu Dios kenwanti Templo bena wakubainkin jaska Israelin enabu mekenika Diosun jatu yunuima inun jaska Persia nawa xanen ibujaidabu Ciro inun Darío inun Artajerjesin jatu yunukubainabu chibankin akubainaibun 15 Persia nawa xanen ibujaida betsa Darío jatu xanen ibuxunkunkaini xaba 3 inun, uxe Adar inun, 6 año kaitian Dios kenwanti jiwe menekin keyunibukiaki.
16 Israelin enabu inun, jawenabu Diosbe janchaxunikabu inun, Israelin juni bake betsa Levín enabu inun, dasibi Babilonia anu jatu iyunibu ana chintuinmabu benimajaidakin Dios kenwanti jiwe meneshina Dios uinmai jaki besikin 17 jabiatiandi 100 ina awa bake bene inun, 200 chaxuwan bene inun, 400 chaxuwan bake tesenxun Dios kenwankin jawen chi tapu anuxun inabu jidabi menukin keyuxunaibun Israelin enabu dasibibun Dioskidi chakabukubainmisbu buanun, iwanan, Israelin enabu 12 xukuabu tibi cabra bene bestichai katutan Jehová daewakin ja 12 cabra bene tesenxun chi tapukixun cabra jidabi menukin keyuaibun 18 chipu jabu dayakubainxanaibu xuku wakin jawenabu Diosbe janchaxunikabu jatu paxkakin jatu yunuakeaketan januxundi Levín enabu junibu jaska Jerusalén anuxun Dios dayaxunkubainkin jaska Moisin keneni keska chibankin jau Dios duawakubainxanunbun jatu yunuakeakenibukiaki.
19 Babilonia anu jatu iyunibu ana chintunbidanimaxun año bena kainyaintian xaba 14 inun uxe ja dukun ikaitian Egipto anuxun Jehován nai tsuman Egipto nawabun juni bake iyuabu jatu tenanbauni inun Israelin juni bake iyuabu tenanma jatu dunkebaini shinankin Jehová kenjaidawai benimai Pascuatian besi tushinibukiaki. 20 Besidiabuma jau Jehován jatu dananyamaxanun jawenabu Diosbe janchaxunikabu inun Levín enabu junibu ibubis jatun yuda ma pei keyushinabu ma jawama shinankin Babilonia anu jatu iyunibu ma chintunbidanimabu inun jawenabu Diosbe janchaxunikabu ma peshina jatubetan Pascua jawen shinanmati chaxuwan bake bene midimajaida tesenxun jatu menuxuntan jatubetan pikatsi 21 Babilonia anua dasibi Israelin enabu chintunbidanibubetan pinibukiaki. Ja inun, nawa betsa betsapa jatun mae anuxun jatun beya chakabu atimapa amisbu jenetan ana akama Israelin enabun mekenika Dios Jehová kenwankin taewakin jatube dasitan jawen kenwanti nami jatubetan pikin keyudianibukiaki. 22 Israelin enabu mekenika Dios kenwanti Templo jau bena wanunbun Persia nawa xanen ibujaidatun jatu bechipaikin jatu medabewakubainimawen taea Judán enabu benimajaidakin 7 xaba binui ana ja kachu besikin misi xaxawatiuma ashinxun benimakin pikubainibukiaki.