Judán enabun mai pakea jawa meama Senaquerib inun jawenabu dasibibun jenebainibukiaki, na janchadan
(2 Cr 32.20-23; Is 37.1-38)
19
Jatun jancha ninkatan xanen ibu Ezequíasin jawen tadi jawendua sawea ushnitan pekatan juinti nishmajaida jaska nuijaidai jatun beyawen taea jatu uinmai bexa tadi sawetan Jehová kenwanti jiwe anu kai jikitan 2 Eliaquim ja jatun xanen ibujaidatun jiwe mekemis inun, Sebnán xaba tibi ikaibukidi kenekubainmis inun, jawenabu Diosbe janchaxunika mestebubu bexa tadi sawediabu jatu ichawaxun Amósin juni bake Isaías Diosun jancha yuixunika anu jatu yunukin 3 jau xanen ibu yuixuntanunbun jatu yuikin: “Natian nun pemajaidaki. Nun ma bika teneaii. Dakewakin nuku ma achitan nuku babu wakin ainbu bake kain ana kushipa jayaisma keska nuku ma wakanikiki. Ma Jehován nuku kupimenkain. 4 Asiria xanen ibujaidatun jawen tsuma yunushina nukun mekenika Dios jiweaki jancha chakabui xechakai jawen detenamenika xanen ibu janchai min mekenika Dios Jehován ninkaxumenkain”, ixun, “En shinaiin. Jawen jancha ninkashinxun Jehová min mekenikatun jau ibubis jatu kupixanunwen. Nuku eskadabes nun jiweyuabu Asiria nawabun nuku achidiama jau nuku medabewaxanun Jehová dayuikin nuku yukaxunwen, akin ea yuixuntankanwen”, atan jatu yunua5 Isaías anu buxun Ezequíasin jancha yuixunabu 6 ninkatan jau jatun xanen ibu yuitanunbun Isaíasin jatu kemakin: “Jehován eska jatukidi yuikiki: ‘Asiria nawa xanen ibujaidatun jawen xanen ibu bexmasbu jatu yunua beshian ekidi xechakai jancha chakabukin matu yuixuwen taea jawa dateyamawe. 7 Uinkanwen. Jawen maewan anu jau jawaida chintunkaintanun kaka chakabu Asiria nawa xanen ibujaida en banabimaii. Janua jadi kai jadixun chachi chachi akabu mawai kaikiki’, akin matun xanen ibu ja jancha ea yuixuntankanwen”, jatu wa
8 Laquis mae anua Asiria nawa xanen ibujaida ma kainkainshina jawen xanen ibu bexmasbun bana ninkatan Jerusalén anua Asiria detenamenika xanen ibu jaki nukui kai maewan betsa Libná achinun ika jawen detenamenika betsabube Asiria nawa xanen ibujaidatun jatu yunukubainaiki nukuabu 9 Asiria detenamenikabu maemanun ika Egipto nawabu medabewai Etiopía nawa xanen ibujaida Tirhaca jawen detenamenikabu ichapabube beaibukidi Libná anuxun Asiria nawa xanen ibujaidatun ninkatan jatu nemai kadiama Judán enabu xanen ibujaida Ezequías anu jau jawen jancha buxuntanunbun jawen jancha yuixunikabu yunukatsi 10 jawen kenenika kenemakin yuikin: “Jerusalén en kushipawen en achitiduma dabanen min mekenika Dios min ja ikunwainan, jadan, chaniki. Ana jawen padan jancha ikunwanyamawe. 11 Mai pakea tibi Asiria nawa xanen ibujaidabun yamawakatsi ikin jatu yamawanibu ¿min ninkama inimen? Jatu jaska waniwen taeadan, eadan, ¿ea nemakin binutan min jiwetidumen? Ibubis jaska shinanyamawe. 12 Mae betsa betsapa Gozán inun, Harán inun, Résef inun, Bet-edén enabu Telasar anu jiweabu jabun yushibubun jatu medabewabumaken enabu xanen ibukin achikin jatu dasibi yamawakin tenankin chanima keyunibuki. 13 Hamat xanen ibu inun, Arpad xanen ibu inun, Sefarvaim xanen ibu inun, Hená xanen ibu inun, Ivá xanen ibubudan, ¿jania? ¿Jayabumen?”, axun jawen jancha kenetan Ezequías anu jatu bumaya
14 xanen ibu bexmasbu Jerusalén anu buxun jikiti xui anuxun Ezequías inanbu bitan jawen jiwe anu kaxun chudetan jawen jancha uinkin keyutan Dios kenwanti jiwe medan kaxun Dios bebun bepenxun janatan jaskakidi Diosbe janchakin: 15 “Israelin enabu mekenika Dios Jehováan, min jatube yubakani jancha aduti bau mamaki querubine dabe tsaua anu jatu mamaki xanen ibu min tsauaki. Nai inun mai jidabi min dami waniwen taea mai jidabi anu xanen ibu tibitun enabu dasibi mian besti min jatu yunumis mekenika Dioski, Dios betsa jayamadan. 16 Jehováan, ea uinkin ea ninkawe. Min bedu bepexetan jawen jancha kene uinwen. Min mia Dios jiweaki mikidi jancha chakabukin mia danankin kenea dasibi eanu Senaqueribin jatu bemaxuki. Uinwen. 17 Jehováan, chanimaki. Jatun mai pakea anu jiwebaunabun inun jawada yudabun anibu Asiria nawa xanen ibubun jatu dasibi tenankin yamawanibuki. 18 Chanima Dios kayabima jabun mekenika yushibubu dami chi anu napukin jatu menukin keyudianibuki. Ja jaska wakinan, mekenika dios kayabima anibuki. Ji inun mishki dami wakin junibun akin kenwanti mekenika yushibubu akubainibuwen taexun Asiria nawabun jatun dami teke teke akin menukin keyunibuki, yamawakinan. 19 Jehováan, mia besti min mekenika Dioski”, iwanan, “Mai jidabi anu yudabu xukua betsa betsapabun jau mia unankin tapinkubainxanunbun Jehováan, min nukun mekenika Dioswen taexun ikis Asiria nawabu kushipabu nuku nemaxunkin nuku mekekubainxanwen”, ikaya
20 januxun Isaíasin jaska Jehován yuixu jau Ezequías yuitanunbun Isaíasin jatu yunukin: “ ‘Asiria nawa xanen ibujaida Senaquerib ikaikidi min ea yukakin yuixu en ninkaxuki’, akin Israelin enabu mekenika Dios Jehován mia yuikiki”, akin en mia yuiaii.
21 Jaska Asiria nawa xanen ibujaida ixanaikidi Jehován jakidi janchakin yuixudan, eska waxanikiaki. Ninkawe:
“Senaqueribiin, ja maewan Sión chipash keskatun mikidi usainkiki.
Senaqueribiin, min kainkainaya budi budi ikin
Jerusalén anu jiweabun mikidi kaxexankanikiki.
22 ¿Tsuki sinatai min jancha chakabushinamen?
Keinan, tsuki bedu chankantan ja iki ¿min kunyan ishianmen?
Enabu Israel jatu ja aki chanima min eki ishianki, jatun mekenika medibi pepa jiweakidan.
23 Min jancha buxunika jatu yunukin ea Jehová min ekidi jatu jancha chakabumashinaki.
Kenkin jatu yuimakin:
‘Líbano mati matipa mamaki janu tsua mapeketiduma anu
en caballon tadanbaintiki detenamenikabu mapubaini
midimabube en mapekeimaki.
Januxun jatun kuxa keyatapajaida inun jatun ji betsa pino jawenduajaida en jatu mextemaimaki.
Mati keyatapa mapekeyutan ja mamaki bai bana keska ni xukua anu nukui en janu jikimaki.
24 Mai pakea betsa en jaska uindiama betsa betsapa anuxun
unpax pukin keyutan ja unpax en akubainimaki.
En pai pai ikainai tsuan ea nematiduma
Egipto jene tibi en netsukubainimaki’,
ikin min jatu yuimashinaki.
25 Jakia min jaska jatu wamaimadan,
en Jehová ma bebunkidi yubakanixun en mia amaima
¿min unanmamen?
Nenumajaida min xenipabutian en jatukidi yubakani
natian mian min jatu akubainimaki.
Maewan mishki kenebaunibu betsa betsapa chakabuwakin
dasibi teke teke akin
janus mishki manchian keska
min jatu yamawakubainimaki.
26 Ja mae betsa betsapa anu jiweabu minabuki dakei mesejaidakubainimabudan,
ja yudabu min achia jawa kushipa jayama ikimabuki,
bai anua basi keska ina awan piti basi nanketapa keska inun
basi betsa ja jiwe wakin xewamisbu jukuinma badi juaikidia
niwe xunku ibidankin tsusin wanmis keskadan.
27 Janida min kamis inun jawada aki min nimis en unaiin.
Min eki sinatai pubenjaidaima en unandiaii.
28 Ibubis kenkin min jatu chakabuwakin ichakawakubainmisdi
en unandiaii.
Jaskawen taexun ina awa puben amisbu keska wakin
mia depestan en mia mane deuwamaxanaii,
min kexadi mia xewexediakinan.
Mia jaska watan ja baiwen min juimawendi ana jawendi min mae anu en mia nichinxanaii”,
akin Jehován jancha keyuaya
29 januxun Isaíasin xanen ibujaida Ezequías yuikin:
“Jaska wakin Jehován matu medabewaxanai jawen unanmati Jehován mia unanmaikiki.
Na jabia año inun ua año ja kachu juaiki
xekiwan trigo ibubis jukuntan bimiyatan kaniai
tsekaxun man piyukubainxanaii.
Jakia año dabe inun besti taeaitian
janu ibubis man bana jukuin bimitan kaniai tsekaxun
man pikubainxanaii.
Ja inun, uva banatan jawen bimi tsekatan
man pikubainxanaii.
30 Judán enabu jabu debuama ichapa jiwediabu
miban jawen tacha chaipatan bimiai keskai
jatun mae xeni anu manixun pe jiwekin
ana bake ichapa wakubainxankanikiki.
31 Mati Sión anu jabu mawama ikimabu jiwediabu
jatidi Jerusalén anu bashikui jiweimabuwen taea
Jehová kushipa dasibi binu keyuatun jatu mekekubainxanikiki,
jawen nui paewenan”, atan
32 janua betsadan, “Asiria nawa xanen ibujaidakidi eska wakatsi Jehován yuikiki:
Jerusalén anu bebia jikiama ixankanikiki.
Jerusalén uke medan jawa pia betsa bishkuama ixankanikiki.
Achikin chakabuwanun ika
jawen pia nemati jawa betsan tsumatan jawen yuda juneama ixankanikiki.
Janu jikibain jatu tsakakatsi jawen mishki kenebaunibu dapi
mai manchinkin maspuama ixankanikiki.
33-34 En tsuma pepa xanen ibujaida David inun jaska ibubis en yubakamis shinankin
na maewan en mekekubainxanaiwen taea
jabias baiwen tsakanametanun ika beimabu
ana jawendi jawenabube Asiria nawa xanen ibujaida chintunbainxankanikiki,
Jerusalén anu jikiamadan.
En Jehován eska en mia yuiaii”, aka
ninkatan Isaíasin xanen ibu Ezequías yuinikiaki.
35 Jabias meshu medan Asiria nawabun jatun tadi jiwe puntebaunimabu anu Jehován nai tsuma debuwanika bututan kauankin 185,000 detenamenikabu jatu tenan keyubaini kaken penamajaida jabu jiweabu ma bestenbaun midimajaida mawabu uinbaunaibuwen 36 taea datei Asiria nawa xanen ibujaida Senaqueribin jatun tadi jiwe jatu pewamatan jawenabu dasibibube Judán enabun mai pakea anua kainbaini bui maewan januxun xanen ibujaidabun jatu yunumis anu jawen maewan Nínive anu chintunbaini jadi jikinibukiaki. 37 Janua xaba betsatian jawen mekenika yushibu Nisroc kenwanti jiwe anu Senaqueribin kenwain ka jawen juni bake dabe Adramélec inun Sarézer jikixun jatun epa chachi chachi akin tenantan paxai mai pakea jawen kena Ararat anu junei buimabun xanen ibujaida Senaqueribin xantukun jawen juni bake betsa Esarhadón xanen ibujaidanikiaki.
***************