—¿Judán enabun mai pakea anu mae betsa anu jiwei katanpa?— aka

kemakin Jehován yuikin:

—Jaa. Mapekekaini jadi katanwen— aka

jaska wa tapinun, iwanan, Davidin ana yukakin:

—¿Jadatu maekidi katanpa?— aka

kemakin Jehován ana yuikin:

—Hebrónkidi katanwen— aka

2 jadi kakin jawen ain dabe iyuikin jawen ain betsa mae betsa Jezreel anua jawen kena Ahinóam inun betsa Abigail, Carmel anua jawen bene ja dukuntun ainwani Nabal mawaken Davidin ainwanidan, ja dabe jatu iyui Hebrónkidi bai tanabaini kakin 3 ja dikabi jabe mapumisbu jabudi jawenabuya Davidin jatu iyui Hebrón dapi mae betsa betsapa anu jiwei buima jiwepaunibukiaki. 4 Janua Judán enabu juni ichapa inun jatun anibu unanepabu bui jikixun Jehovábe yubakatan David Judán enabun jatun xanen ibu wanibukiaki. Januxun jaska watan janubi jakidi chanikin junibu mae Jabés Galaad mai pakea anu jiweabu buxun Saúlun yuda bitanxun maiwaimabu David banabimabu 5 ninkatan benimakin jancha bumisbu Davidin yunukin: “Eska jancha ea jatu yuixuntanwen: ‘Matun xanen ibu Saúl duawakin jawen yuda pewakin man maiwaimawen taexun jau Jehován jawen pepawen matu duawakubainxanunwen. 6 Ja dikabi jakimama jau Jehován matu duawai jawen pepawen matuwen nuikin matu medabewakubainxanunwen. Jaska man Saúl medabewaima keskadi wakin ja shinankin entsedi en matu duawakubainxanaii. 7 Natian matun xanen ibu Saúl ma mawabiashinken ana jas shinanma benimai kushipakanwen. Eadi en matun xanen ibu ikunkainxanun Judán enabun ea katushinabuki’ ”, akin jatu jancha bumanikiaki.