2 Samuel 1

2 SAMUEL

Saúl ma mawashina Davidin bana ninkanikiaki, na janchadan

Saúl Filisteo nawabube detenamei kashian mawaken janua David jadi Amalec nawabube detenamekin jatu maematan jawen detenamenikabube mae betsa Siclag anu chintuntani janu juindukuin uxa dabei jiweyuabun 2 xaba dabe inun bestitian Saúlun detenamenikabun tadi jiwe puntebaunabu anua juni betsa jawen tadi buax buaxpa jawen buxka mai jasjaida Siclag anu jui David bebun jikitan jaki datei danti iki maiki beti ikaya 3 Davidin yukakin:

—¿Min jadakidia juai?— aka

kemakin yuikin:

—Israelin enabu Filisteo nawabube detenameaibu anua junei paxakidanshina en juaii— aka

4 jui kushipawen Davidin yukakin:

—Jawa jaskashinabumenkain, menan ea yuidiwe— aka

kemakin yuikin:

—Detenamenikabu jatidi paxaibun jakia Israelin enabu ichapadi mawadiashinabuki. Jabu bestimadan, xanen ibu Saúl inun jawen bake Jonatán dikabi tenandiashinabuki— aka

5 ja juni jatun kaka bexuan Davidin ana yukakin:

—¿Saúl inun jawen bake Jonatán mawai jaskatan ishian min unain?— aka

6 ja junin kemakin yuikin:

—Mati Guilboa anu kaxun Saúl jin iki jawen jashiwen mestean nia Filisteo nawabu jatun caballo katsaumea beaibu en uianyan 7 nasaukekauan Saúlun ea uintan ea kena: “En mia ninkai ea yuiwe”, ea aka, 8 “¿Min tsuamen?” ea aka, kemakin: “En Amalec nawaki”, en wa 9 ea yuikin: “Ea dapi juwe. En shinan paxabia en isin tenechakayamaiwen taexun ea medabewakin menan jawaida ea tenandiwe”, akin ea yunua 10 tin ika daka ana jaska benitan jiwetiduma uinkin en tenanshinaki. Jaska watan ja xanen ibun oro maiti sawea mabixun jawen mebi metsekin mesiditan min nukun xanen ibuken en mia bexunxuki— aka

11 jatu jaska yuia ninkatan David inun jabe mapuabu punu nukai keyutan jatun tadi ushniakeakebauntan 12 Saúl inun jawen bake Jonatán ma mawashinabu inun Israelin enabun Jehová detenamexunmisbu Filisteo nawabun ma jatu detekin maemakin keyushinabuwen taea jatuya kaxai bis bis ikubaini badi chai tanai piama samakeaibun 13 ma badi kaken kaxai neseabun ja bedunan jatun kaka bekin banabimaxu ana kenaxun Davidin yukakin:

—¿Miadan, min janiamen?— aka

kemakin yuikin:

—En nawa betsaki, Amalec nawa minabube jiweatun bakedan— aka

14 januxun jancha kushipawen Davidin yuikin:

—Xanen ibu wakin Jehován katuni dateama ¿jaskakin min nukun xanen ibujaida deteshinamen?— atan

15-16 jawen tsuma betsa kenaxun yunukin:

—Iyuxun tenanwen— iwanan, jatu tenanmadiama ja juni Davidin ana yuikin: —Xanen ibu Jehován katuni min tenanshinadan, ibubis min nukuki chanixuwen taea min mawaidan, minaki— akaya

Davidin tsumapan ja Amalec nawa detekin tenanikiaki.

Saúl inun Jonatán mawashinabu shinain jatu manui David jatukidi kantanikiaki, na janchadan

17 Saúl inun Jonatán mawashinabu shinain nui David kantai 18 Israelin juni bake Judán enabu dasibi jau jadi jatu jaska yusinkubainxanunbun Davidin jatu yunua na jabias kanta kene jawen una Justo anu kenenibukiaki. 19 “David nui kantakin ani en matu yuiai ninkakanwen:

¡Peidawa! Israelin enabuun,

matun manan mati matipa anua

matun mentsisipa kushipabu man jawen kenmis ma mawabuki.

Matun detenamenikabu kushipabu ma debuabuki.

20 Gat anu kaxun jatu banabimayamakanwen.

Ja dikabi Ascalón bai tanabainkin jatu yuidiakubainyamakanwen,

jau Filisteo nawa ainbuaibu Dios ikunwanbuman jaska kaka ninkatan

benimai jau ishchu ishchu iyamanunbunan.

21 Guilboa mati matipaan,

janua detenamenika kushipabun mabu pema pema ashianbu inun

Saúlun nemati mane chapui jawen chaxa ma pui ichai keyuaiwen taea

jau min mai anu ui inun bishi nibi miki ana nidi iyamaxanunwen.

22 Saúl inun jawen bake Jonatán jatuki sinataibube detenametani chintunbidankin

jatun pia inun jatun machatu chaipa mentsisipabu

jawen jatu deteshina jatun jimi inun jatun xeni iduma bei chintunbidankin mekubidanmisbu

ana jaskatan jaska watidubumajaidaki.

23 Saúl inun Jonatáneen, matu bechipaikin matukidi pe shinanmisbudan,

man jiweshina inun man ma mawabiashina tsuan matu dabe paxkatidubumaki.

Tete jawaida nuyakainmis inun

leónen kushipa man jatu binuaki.

24 Israel ainbuaibuun,

tadi tunanepa inun tadi manyunepa Saúlun matu sawemakubainkin

tadi betsa oro yumenyan matu dauwamashinawen taea

Saúl shinain jaya kaxakubainkanwen.

25 Jaskatan detenamenika mentsisipabu kushipabia detenameti bai anua debui nidi ishianbudan,

matun mati keyatapa anua Jonatán mawadiashinaki.

26 Jonatáneen, min en betsa keskawen taea

mia manui en juinti en nishmajaidaki.

Jawadawen bepadankin ea juneama min ea duawakubainkin

ainbuaibun ea bechipaiaibu jatu binukin pepawakin

min ea jaibujaida wakubainshinaki.

27 ¡Pemajaidaki! Detenamenikabu kushipabu jatu tenankin nidi akin

jatun detenameti mabu jatu yamawashinabuki”,

iki kaxawen kantai David jaskanikiaki.