Saúl jawen juni bakebube detenamei ka jatu tenanibukiaki, na janchadan
(1 Cr 10.1-12)
31
Mati mananan Guilboa anuxun jatu detenun ika Filisteo nawa detenamenikabu mapekebaini buxun Israelin enabube detenamekubainkin jatu maemakubainabu paxai bui Israelin enabu midima mawakubainaibun 2 Saúl inun jawen juni bakebu chibankin Filisteo nawabun Jonatán inun Abinadab inun Malquisúa detekin tenantan 3 Saúl besti bena chakayamakin atimas bechitan pia ichapa Saúlkidi bishku bishku akaibun ja dapi titiki ikai uin jawen datejaidakin 4 jawen detenameti mabu buxunika jawen tsuma Saúlun yuikin:—Jawa Diosumabun ea achitan eaya kaxekin ea bika tenematidubuki. Jau jabuan ea tenanyamanunbun mian min machatu chaipa kenujaida sitan ea detekin tenanwen— aka
jakia jawen tsuma jawen datekin jaska yunua akamawen taea jaska uintan Saúl ibubis jawen machatu chaipa maiki timatan jaki beukaini tachakax iki jawen machatu debuwen chachitan jawaida debuaya 5 jaskatan Saúl ma mawa jawen tsumapan uintan jadi jabiaskadiai jawen machatuwen Saúl ixu keskai mawadiaya 6 jaskai Saúl inun jawen juni bake dabe inun besti inun jawen detenameti mabu buxunmis jawen tsuma inun jawen mekenikabu jabe bukubaunmisbu jabias xabatian mawadiabun
7 paxku napanpa uke betsaudi jiweabu inun Jene Jordán ukedi kexa betsa esteudi jiweabu jatunabu detenamenikabu paxai junebainaibu jatu uintan Saúl inun jawen juni bake dabe inun besti ma mawabu unantan jatun mae tibi Israelin enabu dasibi jenebaini paxadiabainaibun jatun mae tibi anu jikitan Filisteo nawabu janu niti itan jiweyuabun
8 janua bestenbaun penamajaida Filisteo nawabun Israelin enabu tenanshinabu jatun mabu bianun ika Filisteo nawabu bukubaunkin mati Guilboa anu Saúl inun jawen juni bake dabe inun besti mawashina daka bechitan 9 januxun Saúlun buxka textexun jawen detenameti mabu bikin mebintan ichawaxun jatun maewan jidabi janu Filisteo nawabu jiwebaunabu anu jau jatuki chanitanunbun jatu yunuabu ja mae tibi anuabun ninkatan jau jatun yushin kenwanti jiwe anuxun kenwanunbun jatu yunutan 10 januxun Saúlun detenameti mabu buxun jatun yushin Astarté kenwanti jiwe anu aduabu, Saúlun yuda inun jawen bakebun yuda buxun mae betsa Bet-sán kenekauana anu jatun yuda duntanbu
11 jaska Saúl ichakawakin jawen yuda duntanshinabu mae Jabés Galaad anu jiweabun ninkatan 12 Saúlun jatu medabewaniwen taexun juni mentsisipabun jabiaskas shinantan yubakabidan meshu chai tanabidani juxun Bet-sán anu jikixun Saúlun yuda inun jawen bakebun yuda dabe inun besti butexun bibainkin jatun mae Jabés anu chintunbaini buxun Jabés anuxun jatun yuda kuatan 13 januxun jatun xau besti ichawatan ji ewapa keyatapa naman Jabés anu jatun xau maiwatan jabianuadi jatu shinain samakei 7 día inibukiaki.