4 Israelin enabu ana detekin jatu maemanun ika Filisteo nawa detenamenikabu ichabidani bexun Israelin enabu mae betsa Sunem dapi jatun tadi jiwe puntebaunabun jatu nemanun ika Israelin enabu detenamenikabu Saúlun jatu ichawaxun mae betsa Guilboa anu jatu iyua januxun jatun tadi jiwe puntebaunabun 5 jakia Filisteo nawa midima jati tsuan tanatidubuma jatu uin Saúl datei mesejaidakin 6 ¿jatu jaska wapa? iwanan, Saúlun Jehová yuka jakia Jehován kemakin jawa yuiamajaida inun, uxa namaiwen yuiama inun, Urim unantiwen unanmamadi inun, jawen jancha yuixunikabuwen yuimamadi 7 jaska wa jaskatima Saúlun jawen xanen ibu bexmasbu yunukin yuikin:

—Jadi kaxun en yukai kanun janiada ainbu mawabun yushinbe janchamismenkain, ea benaxunbauntankanwen— jatu wa

jawen xanen ibu bexmasbun Saúl kemakin yuikin:

—Endor anu mawabube janchamis ainbu jiweaki— akabu

8 xanen ibukin tadi jawendua sawemis pekatan tadi betsa Saúlun sawetan ana xanen ibu keskama juni dabebe meshu medan ja ainbu anu kaxun jikitan yuikin:

—Juni betsa jawen kena en mia yuia ma mawa jawen yushin jau junun min muka kushipawen ea kenaxunwen, mia pakakatsi en mia yukaidan— aka

9 ainbun kemakin yuikin:

—Yushibubube janchakin jaskaxanai bebunkidi unanikabu inun tsuada mawa jawen yushinbe janchamisbu nukun mai pakeanua Saúlun jatu putaima min unaiin. Min ea jaska yuimaya en mawatiduki. ¿Jaskakin min ea jaska yunuai?— aka

10 Saúlun yuikin:

—Jehován kenawen taexun en mia yubaya jau tsuanda mia chakabuwayamaxanunbun Jehován ninkaya yubakin xabakabi en mia jancha waii— aka

11 ainbun kemakin:

—¿Tsua ea taxnimaxunwen, iwanan, min ea aki ikai?— aka

Saúlun yuikin:

—Samuelin yushin ea kenaxunwen— aka

12 kenaxuna Samuelin yushin taxnikidanai ainbun uin datejaidakin: —¡Ewaa!— itan Saúl yuikin:

—¿Jaskakin min ea padanxumen? Jabia min miaki, Saúldan— aka

13 kemakin xanen ibu Saúlun yuikin:

—Dateyamawe. Jawa min uin ikimenkain, ea yuiwe— aka

kemakin ainbun yuikin:

—Yushin mai anua mapekekidanai en uiaiin— aka

14 Saúlun yukakin:

—¿Jaskada taxnikidanai min uiain?— aka

kemakin ainbun yuikin:

—Juni mestebujaida tadiwen yabukukidanai en uiaiin— aka ninkatan Samuelki ikin unantan jaki datei danti iki maiki beti iken 15 Samuelin Saúl yuikin:

—Ea iwekin ¿jaskakin min ea bika tenemabidanai?— aka

kemakin Saúlun yuikin:

—Natian date paepakin en mia aki ikaii. Filisteo nawa ichapabu bexun nuku detenun ikaibu en jatu jaska waxun nematidumaki. Dios en yukabia Diosun daki ma ea jeneaki. Ea ana kemama inun jawen jancha yuixunikabu anu inun uxa namaiwen ea kemamaki. Jaskawen taexun en jatu jaska watidu min ea yuinun en mia kenaxuki— aka

16 kemakin Samuelin yuikin:

—Ma miki sinatakin Jehován mia ma jenebiaimaken ¿min jaskakin jamen ea yukai? 17 Jehován mia jaska waxanai ma ea mia yuimaimaki. Min xanen ibuai mia mebintan min jaibu mibe dayakunkainmis David xanen ibu waxanai en mia yuimaki. 18 Jehován mia yunua min akin pewaxunama inun, Amalec nawabu min detekin keyuxanun Jehován mia yunubia min jaska wakin chibanma ikimaki. Jaskawen taexun Jehován mia ana jawa amamaki. 19 Janua ja dikabi Israelin enabu Filisteo nawabu detenamenikabu Jehován matu jatu anu yunua matu maemaxankanikiki. Mia inun min juni bakebube mawatan meshukidi man eki nukuaii. Ja inun, chanima Filisteo nawabu Jehován medabewaya minabu Israelin enabu maemakin keyuxankanikiki— akin jancha watan neseken

20 xaba jidabi inun meshu chaitanai Saúlun jawa piamajaida juxun Samuelin jancha ninkai datejaidai shinanei tin ika dakaken 21 janua Saúl jaskatan jawa yuiama daka ja ainbun jaska watima ja dapi kaxun uinkin yuikin:

—Min tsuma ainbu min ea yuka en mia ma medabewaki. Jaskawen taea mawatibiaken jawa dateama jaska min ea yunua en mia axunxuki. 22 Jaskawen taexun en jancha ninkawe. Ana kushipatan katanxun en mia piti eskadabes pimai piwe— aka

23 Saúlun pikatsi ikamabiaken jawen xanen ibu bexmasbu inun ainbun pimanun, iwanan, “Menan pidiwe. Menan pidiwe”, akawanbu atimas Saúlun jatu yuikin:

—Peki. En piaii— itan unanxubida benikauan dakatiki tsauyuken 24-25 jabiatiandi ina awa bake xua jawen mae anu nia ainbun tesenxun jawen nami mexte mexte axun pichantan xekiwan trigo dudu pepa bixun piti xeni inun sau inun unpax eskadabes kacha akin xaxa watiuma kameintan tsuikin keyutan ja misi inun nami jua bexun jatu bebun tsaunxuna Saúl inun jawen xanen ibu bexmasbun pikin menetan benibainkin: “En ma kaii”, abaini jabias meshu medan bunibukiaki.