Dios kenwain Ana kantanikiaki, na janchadan
2
Eska janchawen Anan Jehová kenwain kantakin yuibainkin:“Jehováan, min ea kushipa bena inainwen taea
mia shinain en juinti benimaii.
Min ea medabewaimawen taexun
eki kaxemisbu jatu binui benimajaidakin en jatu chitetiduki.
Min ea medabewaimawen taea en benimaii.
2 Jehováan, tsua medibi mia keska jayamaki.
Nukun mekenika Diosuun, min nuku mekemis keska tsua jayamaki.
Tsuan mia binua ana betsa jayamajaidaki.
3 Nukun mekenika Diosun dasibi unanmiswen taea jau kein tsua janchayamakubainunbunwen.
Jaska yudabun amisbu unanti wakin
pepawen inun chakabuwen min jatu kupimiski.
4 Tsakanamemis kushipabun kanun tekekubainkin
babuaibu jawen kushipa Jehován jatu sawemamiski.
5 Uatian piti texe jayabiani
jakia natian juni betsa dayajaidaxunkin misi tudeishta besti bimisbuki.
Jakia piti jayama bunikunkainima
eskatian ana buniama yaniwamisbuki.
Ainbuaibu bake bitiduma ibiani
eskatian ma 7 bake jayaki.
Jakia ainbu bake ichapa jayanibu
eskatian bakeuma ji xana keskabuki.
6 Jehován nukun jiwea nuku mebinbiatan
anu nuku inantiduki.
Nuku jatu maiwamabiatan
jatun nuku ana benibidantiduki.
7 Mabuya inun mabuuma Jehován nuku wamiski.
Janua nukun kushipa nuku mebinbiatan
chipu ana kushipa nuku inantiduki.
8 Diosun mai jidabi dami wakin jaki maputi wanidan, jawenaki.
Jaska wakin dami waxun jaki dasibi yunukin mapunbauniki.
Jaska dami wani jawen kushipawen taexun
mai anu mania nuitapai jawauma jiweabu medabewakin jatu benimiski.
Ja dikabi chaka putati anua pei ea imisbu medabewakin jatu kenatan
xanen ibubube jatu tsauntan
jau yudabun jatu kenwanunbun Jehován jatu jaska wamiski.
9 Jawen kushipawen tsuan ibubis binutidubumawen taexun
jawen jancha chibain chintuinsbuma Jehován jatu mekekubainmiski.
Jakia tsuada chakabukin ninkaisbuma jatun chakabuwen mawakubainmisbuki,
meshu medanua debua keskaidan.
10 Naiudia kana tun ikainkainai jatuki yunua
tsuabuda jaki sinataibu Jehován jatu yamawakubainmiski,
mishki tude tude aka keska wakinan.
Xanen ibu katuxun kushipa inani
ana jawen kushipa binumatan Jehován mai jidabi anu jiwebaunabu
jawen unanti watan kupikin keyuxanikiki”,
ishinken
11 janua Elcaná jawenabube jawen mae Ramá anu chintunbaini jikiabun jakia jau Elín yunua Jehová dayaxunkunkainxanun jawen juni bake Samuel Anan bashixunbainikiaki.
Elín juni bake dabe chakabujaida inibukiaki, na janchadan
12-13 Elín juni bake dabe jawenabu Diosbe jatu janchaxunikabia Jehovákidi jawa shinan pewama chakabukubainaibun jatunabun Jehová benimawanun, iwanan, Siló anu jatun inabu bexun tesentan dashpexun jawen xeni dukun bitan jau Diosbe jawenabu janchaxunikatun Dios kuaxunkin menuxunun janu Jehováki nukuti tadi jiwe puntenibu anu bua ma jawen xeni menukin keyuxunken januxun jawen nami mexte mexte atan kenti ewapaki nami juabu kukatsa ikaya Diosbe janchaxunikan dayadu betsa jawen chachitan nexetiya juxun 14 kenti ewapaki kukatsa ikai anu pukuxun jadatuda nami betankin nexexun jawen tsuma anu butan butanmisbu Siló anu buxun Israelin enabu dasibibun jatun ina inankuin beabu Elín bakebun jatu ichakawakin jabiaskas jatu wapaunibukiaki. 15 Jatun beya jaskabia jawen xeni chi tapu anu menukin taewadiamabiaken Diosbe janchaxunikan dayadu juxun Jehová kenwankin menukatsi ikaibu jatu yuikin: “En tsuma Diosbe jatu janchaxunikan nami xui pikatsis ikikiki. Ja nami paxa ea inanwen. Matun nami jua danankin bechipaiamaki. Nami paxa besti bikiki”, aka 16 jakia Israelin enabun jatun beya pepa kanekatsi ikama chibankin kemakin yuikin: “Jaskamaki. Ja dukun jawen xeni jau menukin ea keyuxununwen. Jaska waxun jawada bechipaiai min tsuma Diosbe nuku janchaxunikan bitiduki”, aka jakia jawen dayadun kemakin yuikin: “Jamaki. Ikis jawaida ja dukun ea inanwen. Min ea inanma ninkamas mia mebintan nun buxuaiin”, aka 17 Jehová inankuin nami jawenabiaken ja bedunanbun ibubis chakabukin ja inankuin Jehová bexuanbu jawen bedubi atimapajaidawakin Jehová kenwanti beya danankin Jehová sinatamajaidaibun
18 jaskabiaibun Samuelin efod tadi manyunepa yuda puchinin kesua sawexun bakeishtan Jehová duawakin Diosbe jatu janchaxunika xanen ibu Elí medabewakubainaya 19 año tibi tudu tadi bena waxuntan jawen ibubun Jehová kenwankin jawen kenwanti nami pinun ika Siló anu Jehováki nukuti tadi jiwe puntenibu anu jawenabu Elcanán iyui kai jawen benebe Ana kakin Samuelin tadi bena año tibi buxuntantanmis 20 jawen bake Samuel duawaya año tibi Elín uinkin Elcaná inun jawen ain Anan jancha pepawen ana jatu yuikin: “Jehová duawamakubainkin jawen bake iyua inankin yunuimawen taexun min ain Ana bake ichapa bimakin Jehován jau mia manakuxanunwen”, jatu wa benimabaini jatun jiwe anu chintuanbu 21 Ana Jehován duawakin medabewaya bake bitan kainpakemis atimas 3 juni bake inun 2 ainbu bake Ana jayaken janua Jehován bedubi Samuel yumekunkaini
22 Elí ma anibujaidakunkainaya jawen bakebun Israelin enabu beabu jatu ichakawakubainkin Dioski nukuti tadi jiwe puntenibu jikiti xui anuxun ainbuaibu dayaibu chutamisbun Elín unanxun 23 jawen juni bake dabe kenaxun jatu yukakin yuikin: “Jaska man chakabukubainaibu dasibibun matu uin eki chanikubainkanikiki. ¿Jaskai man jaskamismen? 24 En bakebuun, ana jatu jaska wayamakanwen. Matukidi janchai peama Jehován enabun matu yuankubainkanikiki. 25 Juni betsabe tsuada ichakani kaya jatun chakabu Jehován jatu unanti watan pewakin jatu daewatiduki. Jakia tsuabunda Jehová sinatamaibu tsuan Jehová daewatidumaki”, jatu wa ma bebunkidi Jehován jatu tenankatsi yubakashinken januxun jatun epan jancha ninkabiatan chakabu jenekatsi ikama chakabus bestikubainibukiaki.
26 Jabiatiandi Samuel yumekin pepa akubainaya Jehová inun yuda dasibibun bechipaikubainaibun
27 jabiatiandi Diosun jancha yuixunika betsa Elí anu juxun yuikin: “Eska jancha Jehován ea yuishina mia yuinun ea ninkawe: ‘Egipto anu min xenipabu Faraón dayaxunaibun en kushipa xabakabi en jatu uinmaniki. 28 Chi tapu anuxun ea benimawati nami menukin keyukin inun ininti dexke ea menuxunkin ea bebun ebe janchaxunikan efod tadi manyunepa jau sawekubainxanunbun Israelin enabu anua min xenipabu Aarónen enabu en jatu katuniki, ja jawenabu ebe janchaxunika ikubainxanunbunan. Jaskawen taexun Jehová kenwankin jawada ea inankin jawen xeni jau menukin keyukubainxanunbun min xenipabu en jatu yununiki. 29 Ja inankuinti inun ja ea menuxunti jaska wati en jatu yunubiani danankin ¿jaskai eki dateama chakabuwakanimenkain? Enabu Israelin enabun nami ea inankuin beabu min juni bake dabe duawakin pimakin min jatu xua besti waii. ¿Jaskakin ea duawakin pewama min bakebu besti nami pepa pimakin min jatu duajaidawakubainai, ea shinan bexmas wakinan?’ 30 janua Israelin enabu mekenika Dios Jehován ana mikidi yuikin: ‘Ebe janchaxunikabu jau ikubainxanunbun min xenipabu Aarónen enabu en jatu yubaniki, minabu dikabikididan. Jaska en jatu yubani en ana shinankatsi ikamaki. Jabun ea duawaibu besti eandi en jatu duawaxanaii. Jakia jabun ea danainbu eandi en jatu danandiaxanaii. En Jehován xabakabi en mia yuiaii. 31 Min xenipabun kushipa min jayabiani en mia mebiain ma kemaikiki. Minabu junibu tsuataska mestebuama ixankanikiki. 32 Israelin enabu duawakin en jatu pepawaxanai shinain min jatu keskamawen taea sinai bika tenei punu nukakunkainxanwen, minabu anibuabumakenan. 33 Jakia minabu en jatu texe waima en kenwanti chi tapu anu ana daya jayama punu nukai keyua jatuki sinatai mapuxankanikiki, minabu eskadabes en jenekubainadan. Jakia jatidi minabu betsabu anibudiabuma tsuabuda jatuki sinatakin jatu tenankubainxankanikiki. 34 Jaska en mia yuixu minabu ikubainxanaibu jawen min unanun en mia yuiaii. Min juni bake dabe Hofní inun Finees jabias díatian mawaxankanikiki. 35 Januxun jawenabu ebe janchaxunika xanen ibu betsa katukin en kushipa waxanaii. Jatun pe shinankin en jancha inun jaska en bechipaiai unankin ea axunkubainxanikiki. Jaskawen taexun jawenabu xanen ibu kushipa en katuxanaii. Jau jabun ea dayaxunkubainxanunbun ja ebe janchaxunika xanen ibu benan enabu pakubainaibu en jatu jiwemakubainxanaii, niti akamadan. 36 Minabu texeni eskadabes jiweabun jatun piti binun ika pei jexe bestichai benai inun misi tude besti binun ika daya benai ebe janchaxunika xanen ibu bena anu buxun danti itan yukaxankanikiki’ ”, akin Diosun jancha yuixunikan Elí yuibaini kaken