1 SAMUEL
Ainbu Anan bake bisma juni bake Jehován bimanikiaki, na janchadan
1
Josén bake Efraínen xenipabun maewan mati mananan anu mae betsa Ramá anu juni betsa Efraínen enabu Elcaná jiwenikiaki, Sufin enabu betsadan. Efraínen enabu Sufin juni bake betsa Tohu inikiaki. Tohun juni bake betsa Elihú inikiaki. Elihún juni bake betsa Jeroham inikiaki. Jerohamnen juni bake betsa Elcaná inikiaki. 2 Elcaná ain dabeya inikiaki. Jawen ainen kenadan, Ana inun Peniná inibukiaki. Peninán bake bikubainaya jakia Ana bakeuma inikiaki. 3 Año tibi Jehová kushipajaida kenwankin chaxuwan tesenxun jawen xeni menu keyuxuntan jawen nami juaxun Siló anuxun Jehová buxunxun jawenabubetan pinun ikaini Jehováki nukuti tadi jiwe puntenibu anu Elcaná kapaunikiaki, Jehováki nukuti tadi jiwe puntenibu anu jawenabu Jehovábe janchaxunika xanen ibu Elín juni bake dabe Hofní inun Finees jawenabu Jehovábe jatu janchaxunika ikaibutianan.4-5 Siló anu kaxun Jehová bebunxun kenwankin jatu pimakin chaxuwan nami jua Elcanán jatu nexexunkin jawen ain Peniná inun jawen juni bakebu inun jawen ainbu bakebu kencha bestichai nami mata waxun bestibu tibi jatu inankin jakia jawen ain Ana kencha nami mata dabea nexexun inanpaunikiaki, bake bitiduma wakin Jehován nemabianiken Elcanán Ana duawakin bechipaijaidakinan. 6 Elcanán jawen ain Ana bechipaijaidai uinkin Peninán Ana jabi jawen janchawen jancha chakabuwakin bake bitidumawen taexun jaki kaxekin dake wapaunikiaki.
7 Badi tibi Jehováki nukuti tadi jiwe puntenibu anu kaxun Peninán Ana jawenchains jabi bemetukin dake wakubainmis ana aka shinain kaxakin Jehová kenwanti nami piama 8 jaskai uinkin jawen bene Elcanán jawen ain Ana yukakin: “Anaan, ¿jaskai min kaxai? ¿Jaskai min punu nukaxun piamamen? Ea en min benedan, ¿10 juni bakebun mia duawaibu keska en jaskamamen?” akin yuinikiaki.
9 Besiaibun jawen benebe Siló anu kashian Jehová kenwanti nami pikin nuxutan Ana benikainaya jabianudi Jehováki nukuti tadi jiwe puntenibu anu Elí jawenabu Diosbe jatu janchaxunika jiwe dapi jawen tsautiki tsauxun uianyan 10-11 Elí dapi jua nia nui juinti nishma punu nukajaida kaxai jeneama Jehová yubakin yuikin: “Jehová kushipajaidatuun, eadan, en bakeuma min dayadu en nuitapajaidaii. Ekidi shinankin juni bake min ea inantiduki. Min ea bimaiwen taexun jiwekunkainkin jau mia dayaxunkin mia duawakubainxanun ja en bake medibi mina en mia wamakatsis ikaii. En juni bake min ea bimaima jawen unanti watidan, tsuan jawen bu mexteama ixanikiki”, aki
12-13 jancha chaipakin Anan dayuikin jawen kexa bestiwen janchakin xabakabi janchama keba keba ibestiai Elín uinkin jawen jancha ninkama paean dabanen shinankin 14 Ana yukakin yuikin:
—¿Jawatian min paean min bepe ikai? ¡Vino min akai jenediwe!— aka
15 Anan kemakin yuikin:
—En xanen ibuun, en jaskamaki. Vino inun nuxuti betsa paepa en akamaki. Jakia en nuijaidai inun en shinanjaidai en jawen mawakatsis ikin dasibi Jehová bebunxun en yuikin keyui ikaii. 16 “Ainbu chakabuki”, ikin ekidi shinanyamawe. Jakia en punu nukai nuitapakidan jaskatima en Jehovábe janchayua min ea uinkin aki ikaii, en paean keskadan— aka
17 Elín kemakin yuikin:
—Jaska min yukaxu keska Israelin mekenika Diosun jau mia axunxanun unanuma inun kadiwe— aka
18 kemakin:
—Jaskakenan, pejaidaki. En ma kaii— abaini janua juanu jawenabuki nukutan jatubetan pi ana jawa punu nukataskama ikunkainikiaki. 19 Uxashini penama bestentan Jehová kenwantan chintunkaini jatun mae Ramá anu jikimabu jawen ain Ana Elcanán chutakubainaya jaska Anan yukakin ea ashian Jehován ninkaimaxun shinankin 20 medabewaya Anan ma bake bi tuyaima ewatan juni bake kaian Jehová ma yukakin ea akimawen taexun kenakin: “Samuelki”, anikiaki.
21 Janua año betsatian Siló anuxun Jehová kenwankin chaxuwan nami Elcanán jawenabu paxkaxuntan jawen kenwanti nami ana pinun, iwanan, jawen ain dabe inun jawen bake dasibibu iyukatsis ikaya 22 jakia Ana kakatsi ikama jawen bene yuikin:
—En mibe ana kayuamaki. En baken chuchu jenetanaya besti Siló anu mibetan nukun bake iyuxun jau Jehová besti dayaxuni jadi niti itan jiwekunkainxanun ja besti nichinxuni en kaxanaii— aka
23 jawen bene Elcanán kemakin yuikin:
—Jaska min shinain keska akubainwen. Chuchu jenediamaken jabianu jiweyuwe. Jaska Jehovábe min yubakaima axunxanwen— atan jawenabu iyui Siló anu katani juaya janu jawen ain Ana bashikuima jawen bake yume wakubainkin chuchu jenematan 24 ma chuchu jenebiaima bakeishtabiaken Siló anu Jehová nukuti tadi jiwe puntenibu anu iyukin 3 ina awa bake inun xekiwan trigo 22 litro inun bichi sakuki vino matadi buxuin Siló anu jikitan 25 ina awa bake buxuan Elí inanbu Jehová menexunkin keyuaya januxun jatun juni bake Elí uinmakin 26 Anan Elí yuikin:
—En xanen ibuun, badi betsatian min uianyan en eskayama mia yuinun ninkawe. Chanima mia dapixun ea ainbun en kexa bestiwen Jehová en ea akin yukajaidai uinkin en paean keska min ea yuiyamadan, en eaki. 27 Jau ea juni bake inanun, iwanan, Jehová yukakin en ea aka ea ma inanyamadan, na jabiaki. 28 Jaskawen taexun en Jehovábe yubakani medibi jawena ma en inankin nichinxuniyuaki, jau jawen jiwea jidabiwendi Jehová dayaxunkunkainxanunan. Mian yume waxunkin dayamaxunkubainxanwen— aka
ninkatan benimai ibu wai Elí Jehová bebun main beti ixun kenwanikiaki.