4 Jerusalén anua ianenwankidi kai napanpa jawen kena Sorec anu mae pishta anu Filisteo nawa ainbu jawen kena Dalila jiwea uinkin Sansónen bechipaijaidai jabe jiweaya 5 Filisteo nawa xanen ibubu Dalila uin kaxun yuikin:

—Sansón bepadantan ¿jania jawen kushipajaida juimenkain? nuku tapinxunwen. Jaska watan achixun nun nea ana paxamaken nun maematidumenkainan. Jaska wakin chanima min nuku tapinxuna nukundi bestibu tibi mia duawakin 1,100 plata pei jexe nun mia inanxanaii. Nukun jancha ikunwankin nuku pewaxunwen— akin jaska yubatan chintunbainabun

6 jaska wawanabu Dalilan Sansón yukakin:

—Ea benimawakin ea tapinmawe, jania min kushipajaida juimenkainan. Jau min pekayamanun ¿jaska wakin tsuan mia neatidumen, mia maemakatsidan?— aka

7 padankin Sansónen yuikin:

—7 kanun dispi benajaida tsusindiamawen tsuanda ea neajaidabu en kushipa en benutiduki, juni kushipa midin keskaidan— aka

8-9 ninkabain xanen ibubu banabima 7 kanun dispi benajaida tsusindiama bexun inanbu uxajaida dakaken jawen jiwe anu juni kushipabu ichapa jatu junetan Dalilan Sansón neajaidatan datekin jui kushipawen kenakin yuikin:

—Sansóneen, mia achinun ika Filisteo nawabu bekanikiki— aka bestenkauankin dispi xeni menua keska ja kanun dispi dasibi Sansónen bikama jawaida tesa keyuxuken jaskatan jania jawen kushipajaida juimenkain unankin tapianbuma 10 jaska washinawen taexun Dalilan Sansón yuikin:

—Chanichakakin min ea padanshinaki. Jakia eskatianan, ana ea padanma ea yui kayabiwe, jaskatan mia neabu min paxatidumadan— aka

11 ana padankin yuikin:

—Dispi ewapa bena tsuan mediamawen ea neajaidabu en kushipa en benutiduki, juni kushipa midin keskaidan— aka

12 ana uxajaidadiaken jawen jiwe anu juni kushipa ichapa ana jatu junediatan Dalilan dispi ewapa benajaida bixun Sansón daneakin pejaida watan jui kushipawen kenakin yuikin:

—Sansóneen, Filisteo nawabun mia achinun ika bekanikiki— aka bestenkauankin jabiaskadi wakin dispi ewapa benabiaken dian mesi pishta keska wakin jawaida ana tesa keyudiaken jabun achinun ikaibun uintan taxniabumaken 13 xaba betsatian meshu juaya Dalilan ana Sansón bepadankin yukakin:

—¿Jaskakin ea yui pewama chanichakakin min ea padankubainai? Ea yuiwe. ¿Tsuan jaska watan mia nea pewatidubumen?— aka

ana padankin yuikin:

—En bu paxkakin 7 pikuntan bachi timakin ja en bu tibi min kapikunxu mistutan jaki ea timakubainkin mestenwantan jaska watan ji kupa kenuwen maiki seukin min jawen ea mestenwantiduki. Min ea jaska wa en kushipa en benutiduki, juni kushipa midin keskaidan— aka

Sansón uxanxun jawen bu paxkakin 7 pikunwantan bachi timakin jawen bu pikun mistutan timakubainkin menetan 14 ja ji kupawen maiki seukin mestenjaidawatan ana jui kushipawen kenakin yuikin:

—Sansóneen, ma mia achinun ika mianu Filisteo nawabu bekanikiki— aka bestein benikauankin ja jawen seua betsekin ja jaki bu timakin mestenwanxu nasa keyuaya 15 jaska wai uintan Dalilan ana yuikin:

—Min ea bepadani chanichakai ikaii. “En mia bechipaijaidaii”, ibiakin xabakabi min ea yuiama ikunkainaii. Dabe inun bestiki min eki kaxeaii. Jania min kushipa juai min ea yuidiamaki— akin

16 jawenchains xaba tibi jabias yukakin daketapajaida wakubaina bika tenei mawakatsis ikin 17 atimas Sansónen jakidi jawen junea kushipa chanima xabakabi Dalila yuikin:

—En nanei taei bebunkidi medibi Diosuna wakin Nazareo ea wani en jiwekunkainaiwen taexun en bu tsuan ea mextetidubumaki. Tsuanda en bu ma ea mexteabudan, en kushipa benui en ma babuaii, juni kushipa midin keskaidan— aka

18 atimas jawen junea kushipa ma yui kayabia Dalilan unantan Filisteo nawa xanen ibubu anu jawen jancha bumakin yuikin:

—Jawen kushipa nemati ma ea yuixuki. Achidi bekanwen— jatu wa ninkatan ikunwanbidani bestibu tibi peiya beabu jawen jiwe anu jatu junexun

19 Dalilan jawen kishiki datanxun Sansón uxankin jawen bu paxkaxun 7 waxun kapikunshina jau mextenun juni betsa kena juxun mextekin keyujaidatan kaya Sansónen jawen kushipa benua babuaya ichakawakin 20 jui kushipawen Dalilan ana kenakin yuikin:

—Sansóneen, mia achinun ika Filisteo nawabu mia anu bekanikiki— aka bestein jaska imis keskai dabanen jatu detenun ika benibiakauana Jehován ana jawen kushipa inanma dapaxkakin jenea Sansónen unanma 21 ma babuken Filisteo nawabun achixun nupewen jawen bedu tsekatan maewan Gaza anu iyukin bronce mane dispi chiwetameyawen neaxun janu bichiti jiwe medanxun xekiwan denekin dudumisbu anu dayamakin xaba tibi jawen deneti mishki ewapa sibinmakin dayamakubainaibun 22 ana jawen bu ewai benei taebidanaya

23 Sansón Filisteo nawabun achikin maemaimabuwen taea benimai jaki beyuskin jawen mekenika yushin Dagón kenwankin yuinaka tesenxun menukin keyuxunun ika Filisteo nawa xanen ibubu dasibi bei ma ichatan kantakin:

24 jawenabun kenwain yuda ichapabun uin bekin jatun yushibu jabundi kenwain kantakin yuikin:

—Ja mishki chibu dabe matun kenwanti jiwe namakis ea mepindabewe, en jaki mestentan niaidan— aka jaska yuka bedunan iyuxun mepian

27 jatun yushibubu kenwanti jiwe ewapa anu Filisteo nawa xanen ibubu dasibi ma jikiabu junibu inun ainbuaibu midima matabu janua manaundi mishki tapa anuxun Sansón ichakawai jaki kaxeaibu 3,000 yudabun manaundixun jatu uiainbun 28 jui kushipawen Sansónen Jehová kenakin yukakin: “Jehováan, en mia ea akin yukaii. En bedu ea tsekaimabu keska wakin en jatu dasibi kupidiai ea shinankin na jabiatian ea ana besti wakin kushipa ea inanyuwe, en ma mawaidan”, aka 29 Jehován ninkaya ja mishki chibu dabe namakis anu jawen nakishkunki tsauabu anu Sansónen mewedabetan 30 jui kushipawen yuikin: “¡Filisteo nawabu jau ebe mawanunbunwen!” ikin dasibi jawen kushipawen tu akin chibu dabe senkea jatun kenwanti jiwe pudekebain Filisteo nawa xanen ibubu dasibi inun jabube beabudiki di ikin jatu tenankin keyua Sansón jiwexun ichapa kupikin tenanbiakubidanimaxun ana jatube mawakin Sansón ja mestibia ichapa jatu tenankin binunikiaki.

31 Janua ninkatan chipu jawen betsabu inun jawenabu dasibi bexun Sansónen yuda bixun buxun mae dabe Sorá inun Estaol namakis anu jawen epa Manoa maiwanibu anu jawen yuda janu maiwadianibukiaki.

20 año kaya Israelin enabun jawen jancha ninkakubainaibun unanti wanika kushipa Sansón jiwenikiaki.