—En ainen dintu anu jikikain en uin kaitsa— aka

jakia jawen kukan jikimama nemakin 2 yuikin:

—En ainbu bake iyua min ana bechipaiama dabanen en shinainmaki. Jaskaken min jaibu betsa en inainmaki. Jaska biaimaken jawen betsa maxku ja binua jawenduajaida jayaki. Ja biwe— aka

3 jakia Sansónen kemakin yuikin:

—Filisteo nawabu en jatu kupiaidan, natianan, ena chakabumaki. Jabun dukun ea chakabuwakin taewaimabuki— ikaini

4 kaxun benabaunkin 300 kaman inu achikubaunkin ichawatan dabe tibiki jawen jina chaipa ketaxdabexun paniwan pechush ja dabe tibiki nea keyuxun 5 june buxun Filisteo nawabun xekiwan bai ichapa anu paniwan pechush ja kaman inu tibikia chi dekuxun jatu nichian datei kushibainkin jede xadabaunkin xekiwan mania inun tsekadiabuma anudi kawankin janu chiwen tima akeakebauna ji iki menubainkin jatun uva bai inun olivo bai dikabi jatu menun keyuan 6 janua: “¿Tsuan ashianmen?” iwanan, Filisteo nawabu juni ichapabu yuka ibaunkin jatun ashian Sansón ninkatan ja Sansónan, jawen dais Timnát mae anuatun ainbu bimabiaimaxun mebinxun jawen jaibu inainmawen taexun jawen kukaki sinatakin ashianki, ibaini buxun Filisteo nawabun unantan ja ainbu inun jawen epa achibain jatu menu keyuabun 7 jatuki Sansón nukutan jatu yuikin:

—Jaska man ea chakabuwashinawen taexun en matu kupikin keyudiama en juindukuntidumaki. Diosun ea ninkaya xabakabi janchai en yubakaii— jatu watan

8 sinatajaidakin jatu kupibaunkin jatu xau teke keyukin ichapa tenantan janua paxai Etam mishki mati anu kini tanpe medan Sansón jiwei kayuken

9 Jacobun bake Judán enabun maiwan pakea anu Filisteo nawa juni ichapabu buxun jatun mae betsa Lehi dapi jatun tadi jiwe puntebaunabu 10 Judán enabu jatuwen datekin betsabun jatu yukakin:

—¿Jaskakin man nuku detenun ika bekanxumen?— jatu wabu

jabun kemakin yuikin:

—Matu detenun ika nun juamaki. Sansónen chakabuwakin nuku ichakajaida washinawen taexun ja besti achitan jaska nuku ichakawashina keska wadiakin kupikatsi nun achinun ika juxuki— jatu wabu

11 jatu jaska wabu ninkabaini Mati Etam anu mishki kini tanpe anu 3,000 Judán enabu buxun Sansón banabimakin yuikin:

—Filisteo nawabu kushipajaidabuki. Nukudan, nun jaskamaki. ¿Jaskakin min nuku jatu datemai?— akabu

Sansónen jatu kemakin yuikin:

—Padankin jaska ea ichakawaimabu keska wakin eandi jabiaskadi wakin en jatu kupishinaki— jatu wa

12 januxun jabun kemakin yuikin:

—Nuku juidan, achitan Filisteo nawabu mia inankatsi iki nun juxuki— akabu

Sansónen jatu kemadiakin:

—Man matun ea tenanmamen, ja dukun ea yubakanwen, Diosun matu ninkayadan— jatu wa

13 Sansón yui pewakin:

—Chanima nukun nun mia deteamaki. Filisteo nawabu mia inankatsi nun mia achi bestinun ika juxuki— atan achitan dispi bena dabewen jawen meken dabe pechiudi neakin yudayabi nea mestenwantan janu junea jiwea anua taxnimabidankin iwekin

14 mae Lehi anu jawenabun Sansón Filisteo nawabu jatu iyuxunabu bechibidani jatuki nukui jatun tadi jiwe anua kainbidani benimajaidai sai sai ibidanaibun Jehován Yushinin Sansón kushipawaya jawen punyanyabi jawen meken dispiwen neaxun iweabu dasibi tesekaini dispi menua keskai nidi iki keyuaya 15 jawen meken anu jawa tsumamabia asno kui chapudiama xetaya daka bechitan jawaida bitan jawen jatu detebaunkin 1,000 Filisteo nawabu tenantan 16 jaska jatu waxukidi yuikin:

17 asno kui janu putabain kenakin: “Na matidan, Ramat-lehiki”, anikiaki, nukun janchawen yuiadan “Asnon Kui Matiki”, akinan. 18 Januxun unpax manujaidakin Jehová kenatan yuikin:

—¿Min ea medabewa jatu detekin en maemakin keyubiaxuken jaskakin natian unpax manui mia ikunwanbuma anua en mawaya min ea jeneai?— aka

19 ninkatan Lehi anuxun Diosun unpax tuekin bepenxunkin puemaya ja unpax Sansónen akin xetsekekin jenetan shinan chankain benimakin chacha unpax tuea kenakin: “En-hacoréki”, anikiaki. Nukun janchawen yuiadan: “Yuka Tuea Chachaki”, ani na jabiatian nun uindiatidubuki.

20 Ja maiwan jidabi Filisteo nawabun Israelin enabu jatu yunukin ichakawaibutian 20 año kaya Israelin enabun Sansón jatun unanti wanika kushipa medabenan xanen ibui jiweyunikiaki.