15 Janu Dioski nukuti tadi jiwe wakin puntebaunabun jabias xaba tadi jiwe medan Jehová jatube yubakani jancha aduni bau ma tsauanbu anu ja mamaki nai kuin jui butuxun achimaken badi kai ma meshuaya ja nai kuin janubi dami chi jede keska dekean ishin jayabi penaya ja chi jede ana dami janubi nai kuintan 16 xaba tibi janu jaki nukuti tadi jiwe kuinen achikubainaya meshu medan tibi chi jede dekean keska uinkubainpaunibukiaki. 17 Janu jaki nukuti tadi jiwe mamakia nai kuin manaundi inai taebainaya Israelin enabun nai kuin chibanbainkatsi jatun tadi jiwe dasibi peka keyubaini janida mae anu nai kuin niti ikanu jatun tadi jiwe dasibi ana puntebaunabu 18 nai kuinwen Jehován jatu yunua Israelin enabun chibankubainibukiaki. Janu nai kuin kai anu bui inun nai kuin ana kama jiwe mamaki nai kuin niti iyuken jatun tadi jiwe dasibi ana puntebaunxun manai janu jiweyuabun 19 xaba ichapa ja tadi jiwe mamaki nai kuin yane kama niti iyuken januxun jaska Jehován jatu yunuima chibankin Israelin enabun axuin janua kainbainyuabumaken 20 janu jaki nukuti tadi jiwe mamakia nai kuin kayuama niti iyuken jatida xaba besti niti itan ana Jehován jatu yunua nai kuin chibain buaibun ana betsatian Jehován jatu yunuama buama janu bashikukubaini 21 janu jaki nukuti tadi jiwe mamaki nai kuin meshu bestichai bashikuyuken janu besti wai uxashini penaya ana benibainaya chibain buaibun jabiaskadiai xabatian inun meshu medan nai kuin benibaini buaya chibankubainpaunibukiaki. 22 Janu jaki nukuti tadi dintu medibijaida mamaki nai kuin bashikuyui xaba dabe kasmai, uxe bestichai kasmai, año bestichai niti iki jaskaitian Israelin enabudi jawen taea teai bashikutan jiwei niti iyuabun jakia nai kuin benitan kaya ana chibankubainaibun 23 jaska Jehován jatu yunua besti chibankubainkin jatun tadi jiwe puntekubaini jabiatuns jatu yunua jatun tadi jiwe peka keyutan ana bukubainpaunibukiaki. Janua jaskabiakubainkin jaska Jehován Moisés yunuima keska chibankin Jehová kenwankin axuin jiwekubainpaunibukiaki, benimawaidan.