2 —Nukũ shenipabũ beya txibãkĩ piriama nũ mepanui taemiski.

Haskakĩ mĩ tsumabũ nukũ shenipabũ beya txibãma mepanuama pikanimẽkaĩ?

— akabu

3 haska waibu Jesusũ haturi yukakĩ:

—Matunã,

matũ beya txibãkĩ Deusũ yununi betsa watã haskakĩ mã ana txibaĩsbumamẽ?

4 Haska Deusũ yuini matu yuikĩ xinãmanũ nĩkakãwẽ.

“Matũ epa inũ matũ ewa merabewakĩ hatu duawakubaĩshãkãwẽ.

Hakia matũ ibubu mã hatu itxakawaya hau matu tenãshanũbũwẽ”,

akĩ yunubianikẽ

5 hakia matũri huni betsa yusĩtxakakĩ:

“Matũ ibubu hawarawẽ merabewati mabu mã haya mã haki tanabia Templo anu inãkuĩkatsi mã butiru mã xinãtiruki.

Tsuã matu ana bikawatirubumaki”,

iwanã,

hatu yusĩmisshũ

6 ana hatu yusĩkĩ hau hatũ ibubu ana hatu duawakĩ merabewayamanũbũ pepaibu haska nemakĩ mã hatu beshtekubaĩmiski.

Haska wakĩ Deusũ yununi danãkĩ matũ beya betsa betsapa besti mã txibãkubainaii— iwanã

7 —Bebũkiri Isaías mã beparamenikabukiri Deusũ yuimakĩ:

10 hanushũ Jesusũ yurã kaiãri kenakĩ hatu itxawashũ yusĩkĩ:

—Na haskaibukiri matu yusĩnũ nĩkatã tapĩkãwẽ.

11 Hawara yurabũ piabu hawa hatu txakabuwaismaki.

Hakia yurabũ huĩti meranua hawara hãtxa txakabu xinaĩ anua tashnikĩ hatũ hatu txakabuwamiski,

Deus sinatamakinã— hatu waya

12 hanua nũ hawẽ tsumabũ xinãbirã Jesus dapi nitã nemakĩ:

—Ha fariseubu mĩ hatu yusĩaĩ nĩkatã mia nĩkama miki sinataiburã,

mĩ uĩyamamẽ?

— nũ wa

13 Jesusũ nukuri yuikĩ:

—Tsuabũra ea inũ ẽ Epa ikũwãma nukũ hãtxa danaĩbu ẽ Epãri hatu danãriashanikiki,

mibã tsuã banama hamebi hukuĩma tatxayabis betsea keska wakinã.

14 Hau xinã inũbũwẽ.

Huni bekũmã huni betsa habe bekũ iyupai harakiri iyuai unãma habia dabe mikĩ maebaĩ di irabemisbuki.

Ha beparameaibu haska keskabuki,

habũ tsua merabewatirumarã.

Haskakẽ hawa hatu yuiyamakãwẽ— nuku wa

15 Pedrõ Jesus yuikĩ:

—Na mĩ pitikiri hatu yusĩshurã,

shabakabi nuku yuiwe— aka

16 Jesusũ nuku yuikĩ:

—Matũri,

mã nĩkakĩ pewariabumamẽ?

17 Shabakabi matu yusĩnũ nĩkakãwẽ.

Hawara yurabũ piabu hatũ xinãki naneama hawa hatũ xinã txakabuwatirumaki.

Hakia hawara piabu hatũ hatuki nanea puiabu kaĩmiski.

18 Hakia hatũ xinã meranua hawara txakabu haya hawẽ txakabumisbuki.

19 Hanua eska yurabu haya hatũ xinã uke merã aruabu txakabu xinãkĩ shabakabi tashnimamisbuki,

eska tibi xinã meranua shabakabi kaĩkinã,

huni betsaki yubakatã tenãkinã,

huni betsã aĩ txutãkinã,

shebi hayabu txutabaũkinã,

yumetsuirã,

txani txakairã,

yura betsa ha akinã.

20 Haska tibi yurabũ xinã anua tashnikĩ hatu txakabuwamiski,

Deus sinatamakinã.

Hakia fariseubũ beya txibãma mepanuama pikĩ Deus sinatamatirubumaki— nuku aniki.

21 Hanua Jesus kaĩkaini mae dabe Tiro inũ Sidom dapi kakẽ

22 hanua judeubuma Canánawa aĩbu betsã Jesus betxitã txibaĩ kakĩ unãshubima huu akĩ kenakĩ:

—Yusĩnaã,

mĩ Davĩ babaki.

Ewẽ dabanã ikĩ ẽ aĩbu bake yushĩ txakabũ ea bika tenemaĩkikiki.

Ea kaĩmashũyuwe— akubiranaya

23 Jesusũ nĩkabiai hawa yuiama kai tinĩ tinĩ ikainaya hanushũ nũ hawẽ tsumabũ yunukĩ:

—Huu ikĩ nuku mese wabiranikiki.

Nitxĩwẽ,

hau kanunã— akĩ nũ yuikubaina

24 atimas Jesus niti itã aĩbu yuikĩ:

—Israelbu txashuwã benuabu keska besti ẽ hatu yusĩkubainũ Deusũ ea yununiki.

Ẽ mia merabewatirumaki— abia nĩkama

25 hukirã ha bebũ dãti itã yuikĩ:

—Shanẽ Ibuũ,

ea haska wama ea merabewawe— aka

26 Jesusũ yuikĩ:

—Israelbũ piti biãshũ kamã anu putatimaki— akaya

27 aĩbũ hãtsiri ana yuikĩ:

—Heẽ.

Habiaskaki.

Shanẽ Ibuũ,

ẽ kamã keskaki.

Israelbũ tapukishũ piabu hawẽ pese kamanẽ mitumisbuki.

Haska keskari wakĩ ẽ bake meranua yushĩ txakabu ea kaĩmashũyuwe— aka

28 nĩkatã Jesusũ yuikĩ:

—Ẽ haska yuiai ikũwãkĩ mĩ pe yuiaii.

Haskakẽ mĩ bake anua yushĩ txakabu ma kaĩkaĩshuki.

Uĩritãwẽ— akaya

habiatiãri hawẽ bake meranua yushĩ txakabu kaĩkainaya kayanikiaki.

29 Haska wabirani hanua iaketãkirani Jesus kaĩkirani Galiléia iãnẽwã ketãbirãkĩ binubaini mati anu mapekea tsaukẽ

30 hanu tsauwa xinãbirani yurã kaiãnẽ hawenabu isĩ teneaibu hau Jesusũ hatu shushawashunũ tiribu inũ,

bekũbu inũ,

txãtui tseresnibu inũ,

huyubu inũ,

isĩ betsa betsapa teneaibu iweshũ ha dapi hatu hanabu shushawai

31 uĩkĩ ha huyunibu hãtxaibu uĩkĩ txãtui tseresnibu ni peaibu uĩkĩ bekũnibũ uĩaĩbu uĩ habaa iake iakekĩ Israelbũ mekenika Deus kẽwãkĩ taewakubainaibũ

32 habianushũ nũ hawẽ tsumabu Jesusũ kenashũ nuku yuikĩ:

—Ma shaba dabe inũ besti ea nĩkakĩ habũ piti ma keyuabuwẽ taea ẽ hatuwẽ nuiaii.

Hatũ hiwe anu piti mais ẽ hatu nitxiã bui bai putxinĩ punu nukai babui unãyamastirubuki— nuku waya

33 —Hanu tsua hiweabumanua hania piti bishũ hati hunibu nũ hatu pimatirumaki— nũ wa

34 Jesusũ nuku yukakĩ:

—Hati misi mã hayamẽ?

— nuku wa

—Sete misi inũ baka pixta eskarabes nũ hayaki— nũ wa

35 hanushũ Jesusũ ha yurã kaiã yunukĩ:

—Ha maĩ tsaubaũkãwẽ— hatu watã

36 ha sete misi inũ bakari bishũ Deus kẽwãtã misi tũkepakekĩ bakari tekepakekĩ nũ hawẽ tsumabu nuku inãpakea ha yurã kaiã nũ inãkeakebauna

37-38 hanushũ dasibibũ yaniwai benimai pepeaibũ 4.000 hunibu besti tanakĩ hatũ aĩbuaibu inũ hatũ bakebu nũ tanama hanushũ ha pikãshu hatũ teshe itxawakĩ sete kuki nũ matawaya

39 Jesusũ hatu yunukĩ:

—Ma ẽ kai inũ burikãwẽ— hatu wabaini hanua nũ hawẽ tsumabubes shashũ inatã kai Magdala mai pakea anu nũ kaniki.