—Haskakenã,

Naximanika João mawa ana bestẽxĩshũ hawẽ kuxipa hatu uĩmakĩ atimaska dami hawa nũ atiruma hatu uĩmaikiki— hatu wanikiaki.

3-4 Hanua bari betsatiã Jesuskiri Herodesĩ nĩkariamakẽ Naximanika João mawani matu yuinũ nĩkakãwẽ.

Herodesĩ hawẽ betsa Filipẽ aĩ Herodias mebĩmakẽ Joãonẽ Herodes ha akĩ yuikĩ:

—Haskakĩ mĩ betsã aĩ mebĩtã mĩ aĩwaĩmamẽ?

Haskatimahairaki.

Aĩwãyamawe— akubainaya hawẽ aĩnĩ hãtxawẽ taeshũ shanẽ ibu Herodesĩ hawẽ soldadobu João atximashũ mane dispiwẽ hatu meneshmatã bitxiti hiwe merã hatu bitximaima hanu João hiwekẽ

5 hanushũ Herodesĩ João tenãkatsis ibiai:

“Naximanika Joãonã,

Deusũ hãtxa yuishunikaki”,

iwanã,

yuiakeakeaibuki datekũkainaya

6 hanua hawẽ bari hanu kaini tashniaya habube shanẽ ibubu betsa pimakatsi hatu ia itxabu bebũ anua Herodiasĩ bake txipax nawashũkĩ shanẽ ibu Herodes inũ hatube itxa benimawaya

7 haskai uĩkĩ shanẽ ibũ hawẽ aniwa yuikĩ:

—Mĩ ea haskashunayarã,

ikũ hawara mĩ ea yuka ẽ mia inãshanaii— akaya

8 hanua txipax kaĩkaini kashũ hawẽ ewa Herodias yukakĩ:

—Ewaã,

hawa yukashãpa?

— aka hawẽ ewã yuikĩ:

—Na habiatiã Naximanika Joãonẽ bushka yukatãwẽ— aka kashũ shanẽ ibu Herodes yuikĩ:

—Naximanika Joãonẽ bushka ea inãwẽ,

sapa kẽtxakirã— aka

9 hawẽ huĩti meteshekei punu nukatã Naximanika João tenãkatsi ikamabia ha hatu pimaibu bebũshũ hawẽ aniwa ma yubai nĩkakãshũwẽ taeshũ hawẽ yuba binumakatsi ikama

10 hakimamari ha soldado bitxiabu hatũ hatu tenãmis shanẽ ibũ yunukĩ:

—Joãonẽ bushka teshteshũ ea beshũtãwẽ— aka

11 soldado kashũ bitxiti hiwe meranua João teshtetã hawẽ bushka sapa kẽtxaki nanebirã beshũ ha txipax inã ha txipaxã hawẽ ewa inãnikiaki.

12 Hanua João ma tenãbu hawẽ tsumabũ nĩkatã beshũ hawẽ yura yuka itã bibaĩ maiwatã haska wabaini bushũ txipu Jesuski txaninibuki.

13 Hanushũ João haska waxinabu Jesus banabimabu nĩkatã nũ hawẽ tsumabu nuku yuikĩ:

—Hanu tsua hiweabuma anu benãta huĩrukuĩ buyunãkãwẽ— nuku wa hanua Jesus nukubes shashuwẽ kai hanu tsua hiweabuma anu Jesus kai yurabu tsuã hatu yuiamabia nĩkabaini txibaĩ hatũ mae anua maĩ buaibũ Jesus hikiriama habu dukũ hikia maniabũ

14 Jesus keti itã butukaĩkĩ yurã kaiã uĩ hatuwẽ nuihairakĩ hatunabu isĩ teneaibu hanu iyuabu hatu shushawashũpakeaya

15 hanua ma bari kai mexukiranaya nũ hawẽ tsumabu Jesus anu bushũ yuikĩ:

—Ma bari kaikiki.

Nenu tsua hiweabumaki.

Na yurã kaiãnẽ hania pitirubumaki.

Ha mae urama tibi anua hau misi bitã pitã haskarabaĩtanũbũ hatu nitxĩriwe— nũ wa

16 Jesusũ nuku kemakĩ:

—Hatu nitxiãma matũ hatu pimakãwẽ— nuku waya

17 nũ hawẽ tsumabũ yuikĩ:

—Misi mekẽ besti inũ baka dabe besti nũ hayaki.

Hati nũ hatu pima damaki— nũ wa

18 nuku yunukĩ:

—Habiaska ea beshũkãwẽ— nuku watã

19 hanushũ yurã kaiã yunukĩ:

—Ha basiki shukuakeakea tsaukãwẽ— hatu wa manibaunaibũ Jesusũ ha misi mekẽ besti inũ baka dabe tsumashũ naiuri teskãshũ uĩkĩ pitikiri Deus kẽwãtã misi inũ baka tũke tũke apakekĩ nuku inãkĩ yunua ha yurã kaiã nũ hatu inãbaũkĩ keyua

20-21 dasibibũ yani wai benimai pepeaibũ hanua ha misi mekẽ besti inũ baka dabe hatu pashkashuna 5.000 hunibũ pikãshu hawa hatũ aĩ inũ hatũ bakebu tanama ha piti teshe wakãshu itxawakĩ 12 kuki nũ hawẽ tsumabũ matawanibuki.

22-23 Hanua bebũkiri nuku dukũ iãnẽwã nũ pukei kanũ nũ hawẽ tsumabu shashuwẽ nuku yunua nũ kaya yurã kaiãri hatu nitxĩbaini mati anu ka Deusbe hãtxai mexu merã Jesus ha mesti nikẽ

24 iãnẽwã namakis ma bui nũ nunuabũ niwẽwã besubainaibukiria bekĩ iã buspu tsaubirãkĩ shashu tsakama tsakama akaya unãshubira nũ kaya

25 ma pena kemaya Jesus nukuki nukuyui iã bepaikiranaya

26 haskakiranai uĩ e itã datei hãtxa kuxipawẽ yuikĩ:

—Yushĩki!

— nũ ikaibũ

27 Jesusũ nuku yuikĩ:

—Ẽ eaki.

Ewẽ dateyamakãwẽ— nuku waya

28 Pedrõ yuikĩ:

—Yusĩnaã,

mĩ miamẽkaĩ,

ẽ miki nukui kanũ:

“Iã bemaki huwe”,

ea wawe— aka

29 Jesusũ yuikĩ:

—Hani neri huwe— aka

Pedro shashu anua butukaini iãnẽwã bemaki kai Jesuski kemayupanã

30 ha niwẽwãnẽ iãnẽwã betxuruaĩki mesei datei hikikaĩkĩ hawaira yuikĩ:

—Yusĩnaã,

ea neshewe— aka

31 hawaira Jesusũ metsũshũ neshetã yuikĩ:

—Haskai mĩ dateai?

Ẽ mia iã bepaimatiru ikũwãbiai mĩ harakiri xinã bushkẽshumẽ?

— atã

32 Pedrobe shashũ inaya niwẽwã iã betxurũwaĩ maiãyã

33 hanua ha shashũ nũ tsauwabu Jesus namã dãti itã kẽwãkĩ yuikĩ:

—Txanima mĩ Deusũ bakeki— nũ ikaini

34 iãnẽwã pukei nũ besusi kapaya niwẽ hamakiri nuku bukĩ shutua mae betsa Genesaré anu keti itã

35 nũ butubainaibũ yurã kaiãnẽ Jesus unãtã hatuki txanibaunaibũ mae kesua anua kuxibirãkĩ hatunabu isĩ teneaibu iwekĩ hanu Jesus anu hatu iweabu

36 hau Jesusũ tari metsanũ,

iwanã,

Jesus hatu ea ashuãbu hawẽ tari kesha ha isĩ teneaibũ metsatã dasibi maĩ kayakeakenibukiaki.