2
Habacuque ana hãtxakĩ:“Senhor Deusuũ, haska dasibiwẽ ẽ nuiai shinãkĩ
ha ikĩ ẽ mia yukashu haskara
mĩ ea kemaimẽkaĩ, tapinũ ika
beputi shui mekenika hawa pes ikama nishũ
uĩbaũmis keska nĩkakĩ
ẽ mia manaii”, ẽ wa
2 Senhor Deusũ ea kemakĩ yuikĩ:
“Mapu sapa washũ tsusĩriama
hi kenu debu mesiwẽ
haska ẽ mia unãmai kenewe.
Tsusiaĩ kuabu mĩ neshea
shabakabi mĩ keneshina
tsuãra uĩkĩ hawa keti ikama
hawaira yuibaĩkĩ tapĩtirubuki.
3 Haska nama keskawẽ ẽ mia unãmai
hawaira huamabiakẽ
hanu huai katutã ẽ yunua
txanima hushanikiki.
Hakia hawa niti ikama hushanaiwẽ taea manayukubaĩshãwẽ.
Pepabu hatu itxakawamisbu eska hatu ashãkanikiaki, na hãtxarã
4 Eska hatukiri kenewe.
Huni txakabuburã, keĩ hiwemisbuki.
Hakia huni pepabu hiweirã,
Deusũ hãtxa ikũwaĩ txĩtuãma
unanuma hiwekubaĩmisbuki.
5 Huni kenikaburã,
hawẽ hatu yunuti kushipa
ana hayakatsis ikĩ benamisbuki.
Haska kushipawẽ parananãbiai
hawa huĩrukuãma benabauni
hawẽ yunuti kushipa ana itxapa hayakatsis imisbuki.
Mawabu hatu maiwamisbu keska wakĩ
ha kẽmisbu hashpashũ hatu shea keska wakĩ
yura betsa betsapabu tibi hatu atxitã ibuwanũ ishũ
shinãkĩ hawa hatu henetirubumaki.
6 Hakia tsuãra nawa shukua betsa betsapabu hatu atximabũ
habu atximabũ hatuki kasheshãkanikiki,
hatukiri kãtai eskairã:
‘Matunamabia hatu datebaĩ mebĩkubaĩkĩ
mabu inũ pei mirima mã ma hayawẽ taea
mã peirashãkãwã! matu anu kupiti mese hushanayarã.
Ha mabu inũ pei mã hatu mebĩkubaĩkĩ itxawakubainairã,
hatiã mã hatu heneshanai?’ hatu washãkanikiki.
7 Mã hatu diria hatiara mã hatu pakashanũ matu manamisbu
hatishuĩra ana matu manama
hawaira matu yukakĩ datekĩ
matũ hawara mebĩkĩ keyukĩ
matũ tariri matu pekariabaĩshãkanikiki.
8 Matuki sinatabirani
nawa betsaburi itxatã
mã hatũ mabu inũ hatũ pei
mã hatu mebini keska wariakĩ
matunari dasibi matu mebĩkĩ keyushãkanikiki.
Hatũ mai pakea anushũ
hanu hiweabu inũ hatũ maewã tibi
mã hatu txakabu wakubaini tibiwẽ taeshũ
maturi kupikĩ manakushãkanikiki.
9 Tsuabubera hatube detenamekĩ
mese binutã hatũ mabu yumetsubirã
matũ hiwe tibi mã mata wamiswẽ taearã,
matu anu kupiti mese huayarã,
mã peirashãkãwã!
10-11 Matũ mae mishki kenebaunibu inũ
matũ hiwe hawẽ nabu nakishkũ tibi
matuwẽ taea sai sai ibaũkĩ
yura shukuabu mirimahaira
mã hatu yamawakĩ beruniwẽ taeshũ
maturi yamawariai beshãkanikiki.
Mã hatu haska waniwẽ taea
matunabu dakehairashãkanikiki.
12 Caldéiabuũ, matũ maewã Babilônia anushũ
hatu itxakawakĩ yunuti pepa txibãma
hatu parãkĩ dayama txakayamakĩ
huni itxapa mã hatu tenãkubainibuwẽ taea
matu anu kupiti mese huaya
mã peirashãkãwã!
13 Hamẽ daya txakayamai hĩ hĩ ikĩ
matũ maewã mã beninirã,
Senhor Deus kushipahaira dasibi binu keyuatũ
txiwẽ menu keyukĩ matu yamawãshanikiki.
14 Ha haskaitianã,
mai hirabi anu hiwebaunabu
dasibibũ Senhor Deusũ kushipakiri unãshãkanikiki,
ianẽwã matai dasibibũ uĩmisbu keskairã.
15 Matu dapi hiwebaunabu
uva vinho dau betsa kapãtã hatu amakĩ
mã hatu paẽwã
tariuma habũ hatu uĩmakĩ
hatu dakewamisbuki.
Mã habũ hatu paẽwãmis
mã peirashãkãwã!
16 Keĩ mã kushipabiamiskẽ
matũ kushipa betsa wakĩ
matu dakewakĩ
mã txakabu besti wamis
matunabu shabakabi uĩmakĩ
ana hawa hatu matu kẽwãmama
Senhor Deus matuki sinatakĩ
dake pae matu atximashanikiki.
17 Líbano mati matipa anushũ
hatũ himi haba wakĩ
mã hatu detekubainiwẽ taeshũ
habiaskari wakĩ maturi detekĩ
matũ himiri haba wariakubaĩshãkanikiki,
matũ inabu tenã keyukĩ
matu datehairakinã.
18 Yushĩ hatu dami wamakĩ keyutã
hawẽ hawa watimẽ?
Hamẽ besti kẽwãtirubuki.
Ha yushĩ damirã,
hakiri hawẽ txani besti mia unãmakĩ yusĩtiruburã,
hawẽ hawa watimẽ?
Hamẽ besti nĩkatirubuki.
Yushĩ dami haska hãtxatiruma
tsuãra ha yushĩ dami wabiamisrã,
haskatã haki txiti itirumẽ?
Txanima hamẽ tsua haki txiti itirumaki.
19 Hi dami yushĩ hawa hãtxatiruma tsuãra yuikĩ:
‘Bestẽwẽ’, akĩ
mishki dami yushĩ yuikĩ: ‘Beniwe’, aka
hawa hãtxa matu yuitirumẽ?
Ha dami ouro mane inũ prata manewẽ dapushbiabu
ibubis hawẽ hiwea hayamawẽ taea
matu hawa yuikĩ kematirubumahairaki.
Haskawẽ taea mã habũ kẽwãmisbu
mã peirashãkãwã!
20 Hakia hawẽ hiwe kayabi templo meribi anu Senhor Deus hiweaki.
Haskawẽ taeshũ mai hirabi anu hiweabũ pes manishũ
hawẽ hãtxa nĩkakĩ
hau ea kẽwãkubainũbũwẽ”, ikĩ Senhor Deusũ ea yuishinaki.