HABACUQUE
Habacuque inũ Senhor Deus hãtxanamenibukiaki, na hãtxarã
1
Deusũ hãtxa yuishunika Habacuque Senhor Deusũ haskashanai unãmakĩ yuinikiaki.2 Ea Habacuque punu nukashũ Senhor Deus yukakĩ:
“Senhor Deusuũ, merabe ẽ mia yukabia
mĩ ea nĩkama
hatiki mia yukakubaĩshãpa?
Pubẽkĩ nuku itxakawaibu
hatu nuku nemashũkĩ
beshteshuni mĩ huriamakẽ
hatiki kashayabi mia yukakubaĩshãpa?
3 Enabũ txakabu wai itxakanikakubaĩmisbu
haskakĩ txakabu tibi mĩ ea uĩmai?
Ea kebaunaburã, dasibi mae tibi anua
ha ibukuni detenamei pubeĩ
atimapai txakabukubaĩkanikiki.
4 Moisĩ nuku yusini keska txibãkĩ
hatũ yunuawẽ shanẽ ibubũ nuku yunuabumaki,
txanima hãtxa danãkinã.
Txakabubũ yura pepabu itxakawakubaĩkĩ
pepa hãtxa betsa wakĩ
hatu parãmisbuki,
hawa yunuti pepawẽ hatu hiwemamarã”, ẽ aka
5 Senhor Deusũ ea kemakĩ yuikĩ:
“Yura shukuabu matu dapi hiwebaunabu uĩkãwẽ.
Hatu uĩ mã datehairashanaii.
Haska ẽ samama ashanai
tsuãra matu bebũkiri yuibia mã ikũwãtirumaki.
6 Ha Caldéia nawabu pubẽ tsakanamenikaburã,
ẽ hatu beruwaii.
Haburã, mai hirabi hatunamabia
bukubaũkĩ hatu mebĩtã ibuwamisbuki.
7 Caldéia nawabu mesebu inũ txakabubunã,
hatu datemakubaini
hawa tsuã yunuti unãkatsi ikama
haska ibubis besti shinaĩbu bestiwẽ txakabukubaĩmisbuki.
8 Hatũ cavalo kushipahaira hawawẽ dateama kushikaĩkĩ
inu keneya betsa binubaĩtirubuki, beamakinã.
Ha dikabi, kamã inu betsa lobo kushipahaira
meshu merã mapumisbu binuabuki.
Cavalo katsaumeabu mirimahaira txaihaira anua bekĩ
tetepã hawẽ piti hawaira nuyakaĩ yuinaka atximis keska
atxinũ ika hawaira ishtxukaĩ
hatu tenã keyumisbuki,
hatuwẽ hawa nuiamarã.
9 Dasibi txakabu wakĩ keyukubiranaibuwẽ taea
bebũkiri dasibi datehairakubainaibu
hatu deteama yurabu mirimahaira henewã kesha mashiti keska
tsuã hatu tana keyutirubumabiakẽ hatu atximisbuki.
10 Shanẽ ibuhairabu inũ
shanẽ ibu beshmas yununikabuki kashekĩ
hatũ mae mishki kushipa kenebiabaunibukẽ
hatuki dateama usãmisbuki.
Hatũ mishki kenebaunibuki mai maspu wakĩ matawatã
haki mapekebaĩ
hatũ maewã atxi keyumisbuki.
11 Niwe kushipahaira shũku ibainai keska bei
Mekenika Yushĩ shinãma
ibubis hatũ kushipa besti txiti itã ikubaĩmisbuki”, ikaya
12 nĩkatã eã Senhor Deus yuikĩ:
“Senhor Deusuũ, ẽ Mekenika Deus meribi
mawatiruma mĩ hiwei ikibi ika ẽ unaiĩ.
Ẽ Mekenika Senhor Deusuũ,
Israelĩ enabu txakabumisbu hau mia hatu kupishũshanũbũ
Caldéia nawabu mĩ hatu kushipa waniki.
13 Mĩ miarã, mĩ pepahairawẽ taeshũ hawara txakabu mĩ nemamiski,
hawa heneamarã.
Mĩ pepahairawẽ taeshũ hawara txakabu uĩkĩ
ha betxipaiama mĩ danãmiski.
Nũ Israelbu txakabubiabũ
parananãkĩ Caldéia hunibu sinatapai txakabuhairakĩ nuku binuhairabuki.
Hakia hatũ mae haska txakabuhairabiakẽ
mĩ haskakĩ hatu kupikatsi ikama hatu hawa yuimamẽ?
14 Ianẽwã anua baka inũ
ni meranua yuinaka shanẽ ibu hayabuma hiweabu keska wakĩ
haskakĩ mĩ nuku mekekĩ duawamamẽ?
15 Caldéia nawabũ yura shukua betsabu hatu atxitã ibuwakubaĩmisbuki,
hunibũ sheamatiwẽ inũ hisĩwẽ
baka bishũ itxawashũ uĩ
benimamisbu keskairã.
16 Haskawẽ taea baka binikabũ
hatũ yushĩ dami kẽwãmisbu keska wakĩ
hatũ hisĩ inũ hatũ sheamatiwẽ baka nuepa mirima biaibuwẽ taea
benimakĩ inabu tesẽshũ
hawẽ piti sheni inũ sheni ininipa
habũ hatu kuashũkubaĩmisbuki.
17 Baka binikabu keskakĩ ha Caldéia nawabũ
hawa hatuwẽ nuiama
ana yurabu hatu detekĩ atxikubaĩshãkanimẽkaĩ,
hatu itxakawakinã?” itã,