53
haska nũ nĩkairã, tsuã ikũwãtirumẽ?Senhor Deusũ hawẽ kushiparã,
tsua shabakabi ma uĩmaimamẽ?
2 Mai tsusĩhaira anu mibã tatxa uke merãhaira ka
hawẽ pei benei pekaũmis keskai
Senhor Deusũ hawẽ tsuma yumeai uĩkatsis ikikiki.
Hawẽ yurarã, hawa hawẽruakĩ hatu hawẽ kemumakĩ
betxipaimatiruma ishanikiki.
3 Yurabũ hakiri txakabu shinãkĩ danãshãkanikiki,
ha hunĩ isĩ betsa betsapa mekĩ beyawai nuitapairã.
Tsua dabanẽ hawa unãma uĩsma akawakĩ nukubũ nũ danãshanaii.
4 Nũ haska wabiaya hatũ nukũ txakabu bukĩ
nukũ txakabu nuku teneshũshanikiki.
Nukũ txakabu nũ hawẽ isĩ teneai bitã nuku meshũshanikiki.
Nukũ nũ uiainã, Deusũ detekĩ itxakawai dakeai nũ shinaiĩ.
5 Nũ atimapai txakabumiswẽ taeshũ
ha huni nukuwẽ taeshũ txatxikĩ pixpe ashãkanikiki.
Nukũ txakabuwẽ taea
ha txakabumis keskakĩ nuku teneshũshanikiki.
Ha itxakawabu nuitapabiakinã,
unanuma hiweti nuku kaĩmashũshanikiki.
Ha yumãwãkĩ deteabuwẽ taearã,
nukũ yurarã, isĩ hayamai kayashanikiki.
6 Dasibi nukuburã,
nũ hamakiri baiwẽ bushãkanaii,
txashuwã tibi hawẽ baiwẽ buama benumis keskairã.
Nũ haskabiaya Senhor Deusũ dasibi nukũ txakabu bitã
hawẽ tsuma nuku peumashũshanikiki.
7 Habũ atxitã itxakawabiabu hawa hatu nemama inũ
hawa hãtxa betsa yui taskama ishanikiki.
Habũ txashuwã detemisbũ txashuwã bake detekatsi buabu
“maã, maã” isma keskai hawa yuiama ishanikiki,
txashuwã hawẽ dani meshtekatsi bitximis keska wabiaburã.
8 Hawama nibiakẽ txaniwẽ taeshũ ha huni bitxiaibũ
ha huni tsuã nemakanãshunama inũ
hanu iyuaibu tsua hawẽ nuiama ishanikiki.
Na mai anua ha huni betsekĩ akawakinã, atimas tenãkĩ
enabũ txakabuwẽ taeshũ kupishãkanikiki.
9 Huni txakabu mawa hatu maiwamisbu anu
habu dapi maiwashãkanikiki.
Hawa kanei txakabuisma inũ hawa txanitxakai hãtxaismabiakẽ
ha huni txakabubube maiwashãkanikiki.
10 Senhor Deusũ hawẽ tsuma bika betsa betsapa hawena wamashanikiki.
Nukũ txakabuwẽ taeshũ hawẽ hiwea yaushiama inãshanaiwẽ taea
hiwea txaipa bitã bababu mirima uĩ hatuki nukushanikiki.
Senhor Deusũ haska betxipai yubakani
hawẽ tsumawẽ taeshũ haska tibi meneshanikiki.
11 Huĩti shurushũ bika tenekubaĩkĩ
atimas maematã bestẽtã shaba uĩ hawẽ benimai shinã txãkãshanikiki.
Yura itxapabũ txakabu mariastũ hatu teneshũkĩ
Senhor Deusũ tsuma kaneismatũ hatũ kupiti bishũkĩ hatu putamashanikiki.
12 Hawẽ tsuma pepa hawẽ hiwea hawa yaushiama mawashanaiwẽ taeshũ
Deusũ duawakĩ hawẽ tsuma kushipa betsabube manakukĩ
ha hawẽ tsuma duahairawashanikiki.
Huni txakabu keska wakĩ txitebiaibũ
yurabũ txakabu itxapa buashũkĩ
habũ txakabuwamisbu hatu ea ashũshanaiwẽ taeshũ
pepa bestiwẽ Deusũ manakushanikiki.