Jerusalém itxakawakubainaibu Senhor Deus mebikinãkatsi txaninikiaki, na hãtxarã
52
Senhor Deusũ yuikĩ:“Siãonẽ, bestẽriwe!
Bestẽtã pei kushipariwe!
Maewã Jerusalém meribituũ,
habũ Deus ikũwãbuma huni txakabu
ana mia anu txĩtũbirã hikiama ishanaibuwẽ taea
mĩ tari hawẽruahaira saweriwe.
2 Jerusalémnẽ, beni kushipariwe!
Mĩ tari anua mai kuru tatã
shanẽ ibũ tsauti anu tsauriwe.
Sião txipash mia tsuma wanibuũ,
mane dispi txiwetameyawẽ mia teneshnibu tepekeriwe!” atã
3 ana Senhor Deusũ hatu yuikĩ:
“Matu escravo tsuma wakubaĩkĩ hawa pei hesheishta matuwẽ taeshũ ẽ biama iniki.
Hanua natiã eã matu pekakinã,
haburi ẽ hawa pei hesheishta ẽ hatu inãmari inãshanaii.
4 Ha dukũ enabu bui taeirã,
Egito anu dukũ hari nawa keskai hiwenibuki.
Hanua betsarã, habũ hawa txakabu hatu wamabia eiskaũ
Assíria nawabũ hatu itxakawakĩ bika ea hatu tenẽmanibuki.
5 Natianã, hatu haska waibu hawa hatukiri ẽ uiaĩ?
Enabũ hawa hatu wamabia Babilônia anu hatu iyunishũ
hatu itxakawai hatuki kashei keĩ hanis Deusunabu daka
hatu wai eki sinatai hãtxai heneabumaki.
6 Hatiãra enabu merabewai ẽ ana huaya
habũ ea unãshãkanikiki,
haska ea Senhor Deus ẽ hãtxani hatu anua ẽ tashnimayarã”, ikaya
7 Tsuara mati matipa anu hukĩ txakabumakirãkĩ
kakape yuinũ ika hui benimakiranai uiaĩbũ
Deus anua pepa unanuma hiweti txani inũ
haska txakabu anua tashnitirubu txanitã Sião yuikĩ:
“Mĩ Deusrã, shanẽ ibuhairaki!” ashanikiki.
8 Senhor Deus ana Sião anu txĩtũkirani huai mae mekenikabũ ibubis uĩtã benimakĩ
hawenabu unãmai hui kushipawẽ hatu sai ishuaĩbu nĩkashãkãwẽ!
9 Senhor Deus hawenabuwẽ nuikĩ hatu maemashũ matu daewakĩ
mã Jerusalém matu purenibu maniarã,
ma matuki sinataibu hatu nitxĩtã matu tashnimaiwẽ taeshũ
kẽwaĩ hatube sai sai ikĩ hatu kemakãwẽ.
10 Senhor Deusũ hawẽ kushipa hatu uĩmashanikiki,
dasibi mai pakea nawa shukua tibi anu manibaũshũ uiaĩbunã.
Dasibi mai hirabi anushũ ma nukũ Deusũ nuku mekekĩ piskuma nĩkakĩ unãshãkanikiki.
11 Menã Babilônia anua tashnirikãwẽ!
ana hawa atimapa meama tashnitã kaĩkainirã.
Mã habũ Deus kẽwãti hiwe mabu bushanaiburã,
ana txakabuwama pe mekei shũpĩrikãwẽ.
12 Habu mã kaĩbaĩshanaiburã,
Israelbũ Senhor Deusũ matu keshea akekebainaiwẽ taea kairã,
hĩ hĩ iki hawaira kaĩbainama inũ hunebaini pashayamashãkãwẽ.
Senhor Deusũ tsumapanã, bika betsa betsapa maemashanikiaki, na hãtxarã
13 Senhor Deusũ ana hatu yuikĩ:
“Ẽ tsumapã dasibi binukĩ keyuaya
shanẽ ibuhaira wakĩ dasibi hatu binumatã ẽ tsaũshanaii.
14 Yurabũ haska tenetirumahaira wakĩ hawẽ yura atimapa wakĩ
ana huni kuĩ keskama washanaiwẽ taea e iki hawẽ dateshãkanikiki.
15 Haska uatiã nawa shukuabu tibi inũ hatũ shanẽ ibubũ hawa uĩsbuma
na habiatiã uĩkĩ nĩkai hakiri tapĩkĩ hawa hãtxa yuitiruma e iki hawẽ dateshãkanikiki”, ikaya,