22
Ouro mane inũ prata mane mirima hayabiabũpepai mĩ hiwekũkainai inũ
dasibibũ kaka pepa mikiri yuibaunaiburã,
ha mane karu sharabu mĩ hatu binuhairaki.
2 Mabuyabu inũ mabuumabu
ha dabe Senhor Deusũ matu dami wanirã,
betsama mã habiaska dabes hawenabuki.
3 Tsuara bebũkiri shinã pewanikabũ
hawara mese uĩkĩ dũkekubaĩmisbuki.
Hakia tsuara bebũkiri hawa shinaĩsbumã
mese uĩbiai nĩkamas nakubaini
hamapai sharabu bika tenekubaĩmisbuki.
4 Senhor Deuski mesekĩ hawẽ hãtxa nĩkai
hawa keĩsbuma pe hiweaibuwẽ taeshunã,
Senhor Deusũ hatu manakukĩ mabuya wakĩ
hawenabu hatu kẽwãmakĩ
hatu pe hiwemakubaĩmiski.
5 Huni txakabubu hiwekubaini mapukinã,
hawẽ hatu itxakawakĩ beparanaibu itxapa uĩkubaĩmisbuki.
Hakia tsuãra ibubis hawẽ hiwea pe mekekubaĩkinã,
hawara txakabu tibi dũkebaĩmisbuki.
6 Na habiatiã matũ bakebu tapĩmakinã,
yusiã pepawẽ hatu akãwẽ.
Txipu ewatã haska mĩ hatu yusini
hawa hene taskama mestebuyabis hawẽ hiwekubaĩshãkanikiki.
7 Mabuyabu shanẽ ibukĩ
habu nuitapaibu hatu yunukubaĩmisbuki.
Tsuãra hatu pei biãyumisbũ
habũ diriabu hatu dayamamisbuki,
hawẽ tsuma keska watanã.
8 Tsuãra txakabuwakubaĩkĩ
txakaburi tenekĩ mekubainaibũ
hanushũ Senhor Deus hatuki sinatakĩ hatu yamawashanikiki,
hawẽ mestẽti kushipawẽ hatu kushakinã.
9 Tsuãra nuitapaibu uĩkĩ hatuwẽ nuikĩ
hawẽ piti hatu pashkashũkĩ
hatu inãkubaĩmiswẽ taeshũ
Deusũ haburi uĩkĩ hatu duawashanikiki.
10 Ẽhẽ iki yura betsabuki kashemisbu
mae anua tsuãra mã hatu nitxĩshuna
ha habe ha iki yupukunãmisbu maĩshãkanikiki,
ana hãtxawẽ tsua detenameabumarã.
11 Tsuãra hawẽ shinã txanima uĩmakĩ
duapa hãtxawẽ shanẽ ibu hãtxakĩ benimawaibu
shanẽ ibu pepatũ hatu betxipaihairakĩ
hatu haibuwamisbuki.
12 Senhor Deusũ unanepabu hatu mekekĩ hatu uĩkubainaya
txanitxakamisbũ hatu yuikĩ:
“Txanima nũ matu yuiaii”,
ibiai txanitxakaibu
Senhor Deusũ hatu shabakabi kayati wamakĩ
hatu unãti wamamiski.
13 Txikishi hawaki beparametima
dayakatsi ikamawẽ taeshũ
hawenabu parãkĩ yuikĩ:
“Bai namaki inu betsa leão manakanãmiski.
Eki nukutã ea pitiruki.
Ẽ hawa kamaki”, ikĩ yuimisbuki.
14 Aĩbu hininipatũ hawẽ hãtxawẽ mia kemumairã,
mai kini keyatapahaira keskaki.
Haskawẽ taea hanu Senhor Deusũ tsuara ma yupua
tĩ imisbu anu hatũri hanu mia iyutiruki.
15 Berunãbũ shinã pepa unãmarã,
unaĩsmapatũ shinã txibaĩ patapakubainaibu
hanushũ hatu pewakĩ hatu kusha kusha akĩ
nĩkamakĩ hatũ patapa henematirubuki.
16 Huni mabuyabiakaĩkĩ
mabu inũ pei ana binũ, iwanã,
nuitapaibu hatu itxakawakĩ
mabuhairayabu besti hawẽ mabu hatu inãkubaĩmisburã,
txipu hari nuitapashanikiki,
ana mabu inũ pei hayamairã.