21
Haska shanẽ ibuhairatũ shinãkĩ atirurã,Senhor Deusũ kushipawẽ haska betxipaiai amamiski,
hawẽ shinã hene bai tapia keska washũkinã.
2 Hunibũ hawara watã shinãkĩ;
“Dasibi ẽ pe washuki”, iwanã, yuibiakubainaibũ
hakia hatũ shinã uke merã
Senhor Deusũ uĩkĩ hatu unãti wamiski.
3 Hiwei pekaĩkĩ Deusũ yunuti kushipa inũ
dasibi haska betxipaiai tibi
tsuãra hawẽ yunua ashuainã,
daewakĩ inabu kuashũmisbu binuhairamiski.
4 Hati txakabuhaira Senhor Deusũ danãmiski:
ibubis kẽmisbu inũ,
haska dasibi hawẽ shinanẽ unã keyuaikiri txanibaunaibu inũ,
kanekĩ txakabu tibi akubaini hiwemisburã.
5 Hawara akatsi bebũkiri shinã pewakubaĩkĩ
yubakatã akaiburã, pekaĩkũkaĩmiski.
Hakia hawara akatsi bebũkiri shinã pewariama
yubakatã anikapai nuitapakubaĩmisbuki.
6 Parananaĩ txanitxakabetanã
mabu inũ pei itxapa itxawakubaini hawẽ hiwemisburã,
kuĩ puabaini hawaira yamabaĩmis keskai
hatũ mawa benamisbuki.
7 Hawara yunuti kushipa pepa
txibaĩ hiwei pekatsi ikamawẽ taeshũ
huni txakabu mẽtsisipakĩ hatũ kushipawẽ
hamapai txakabu betsa betsapa atimapa wai
ibubis yamai keyushãkanikiki.
8 Haska huni txakabubũ shinaĩ hiwemisburã,
hawa mestẽma hawẽ bai kayatapiamaki.
Hamẽ haska huni pepabu hiwekĩ
hatu uĩmamisburã,
hawa txakabu hakiri hãtxaisbuma
pepabu bestiki.
9 Hiwe ewapa hawẽrua anu hiweshũ
aĩbũ hawẽ bene ha a txakayamakĩ
hiwe txakamamisrã,
haska hiwea pemaki.
Hamẽ ha binumai huni betsã hiwe manaũri
tsuara deshũ betsa ewapama anu
ha mesti haskanu hiwea peki.
10 Tsuãra hatu txakabuwanũ, iwanã,
huni txakabubũ shinãkubaĩmisbuki,
ha dikabi ha dapi hiweabu hatu uĩbiakĩ
ana hatu duawatikiri shinã pewamarã.
11 Ẽhẽ iki yura betsabuki kashemisbu hatu kupiaibũ
habũ bebũkiri pe shinaĩsmatũ uĩkĩ
hatuwẽ hawenakiri tapĩkubaĩtirubuki.
Hakia tsuara yusinanaĩ
unanepabũ nĩka bestitã tapĩmisbuki.
12 Deus pepatũ huni txakabubu inũ hawenabu hatu uĩkubaĩmiski.
Hanushũ ha huni txakabubu hatu kupikinã,
hatu nuitapawamiski,
ana hawa pepa hayama hatu wakinã.
13 Tsuara nuitapakĩ hatu ea abiabu
hawa merabewakĩ hatu uĩmaismarã,
txipu habiaskariai merabe yuka iki ea iriaya
ha manakukĩ tsuã hari hawa inãma ishanikiki.
14 Tsuara sinata txakayamabiaya
ha haki sinataitũ hune hawara inãkuĩkĩ
ha sinatahairai daewatiruki.
15 Shanẽ ibubũ yunuti kushipa pepawẽ yunukubainaibũ
huni pepabu benimamisbuki.
Hakia shanẽ ibubũ hãtxa nĩkama hunibu atimapakubaĩkĩ
hatũ mabu benukĩ keyumisbuki.
16 Bebũkiri shinã pewai hiwebiakũkainima
haska henetã ana txibãmarã,
hanu mawabu bumisbu anu hari kashanikiki.
17 Benimaiwẽ kemu bestinũ ishũ
vinho hawẽ paẽti inũ, sheni ininipa inũ,
besiti tibi betxipaikĩ kemukĩ beya wairã,
hawauma nuitapai keyushãkanikiki.
18 Huni pepa parananaĩsbumã hatũ shãtukũ
huni txakabu txanitxakamisbu yumãkubaĩshãkanikiki.
19 Hawẽ aĩ hawaira sinatai
ha itxakayamakũkaĩmisbe habe hiwearã, bikaki.
Haska binuirã, hari tsua hiweabuma anu
ana bikama hiwekũkaini haska peki.
20 Huni unanepatũ hawẽ hiwetã
piti inũ sheni inĩti inũ mabu pepa sharabu itxawatã
unãshubira me pewakubaina
hawẽ mabu hawaira keyutirumaki.
Hakia huni unaĩsmapatũ hawẽ hiwetã
piti inũ mabu pepa itxawabiatã
meke pewama hawaira puta puta amisbuki.
21 Tsuara hiwei pekaini
ana txakabukatsi ikama
pepa bestikĩ hatu uĩmaiwẽ taea
hakiri hãtxa peaibu nĩkai
haska hiwea betxipaimis hayashanikiki.
22 Maewã anu shanẽ ibu detenamenika kushipabu itxapa hayabiakẽ
unanepabũ hatu maematirubuki,
hatũ mae mishki kushipawẽ kenebaunibu haki txiti ibiabũ
hatu berãkĩ keyũkinã.
23 Tsuara hari shinaĩ hãtxakatsi
bebũkiri shinã pewatã
hawẽ hãtxa pe kaĩmamisrã,
hamapai txakabuwaismawẽ taea
hakiri shinã txakatirubumaki.
24 Hawẽ unanepa inũ hawẽ tapinika hãtxawẽ keĩ
betsabuki kashekĩ hatu kenamamisburã,
“Ha huni hamẽ uĩbaĩ yui txitenamei hãtxa bestimiski”, akĩ yuimisbuki.
25-26 Txikishbu shaba betsatiã
dasibi hawarawẽ kemui betxipai hayakatsis ibiai
daya shinãkĩ betxipaisbumaki.
Hakia tsuara pepa txikishmatũ
huni betsa nuitapaibuwẽ nuikĩ
hawẽ hawara hatu inãkubaĩmiski, yaushiamarã.
27 Huni txakabubũ shinã txakabiakĩ
Senhor Deus daewanũ, iwanã,
inabu sheni hatu kuamakĩ
ha huni txakabubũ inãbiabu
Senhor Deusũ hatu danãkĩ betxipaismaki.
28 Huni txakabubũ hawara uiãma
inũ uĩbiai txani besti unaĩbu
hatũ dakewẽ taea mawashãkanikiki.
Hakia hawara nĩka pewatã unaĩbu
unãti wanikabũ hatu yukabu
shabakabi hatu kematirubuki.
29 Huni txakabubu datebiai
bemakis mestẽ pe itsai mapumisbuki.
Hakia huni pepabu hawa shinã
txakabuwaismawẽ taea
dateama hiwekubaĩmisbuki.
30 Unanepa inũ, tapinika hãtxa inũ,
yubakai penikã
habũ Senhor Deus yuibiakĩ binukĩ maematirubumaki.
31 Hawẽ detenameti pewakĩ
hunibũ hatũ cavalo bebũkiri tapĩmakĩ unãmamisbuki.
Hakia detenameaibu kushipa wakĩ
Senhor Deusũ hatu merabewakĩ binumamiski.