19
Unaĩsmapa inũ txani besti yuibauni mapumisburã,ha nuitapaibu inũ ha huni pepabu
hatukiri pe yuimisbũ habũ hatu binuaki.
2 Hawa bebũkiri shinã pewama hamẽ benimakaĩ
daya txakayamabiashina haskarã,
hawẽ daya pe kaĩtirumaki.
Hawara tibi hawaira hĩ hĩ ikĩ akinã,
benukĩ kanehairatirubuki.
3 Huni betsa patapakĩ hawẽ hiwea ibubis txakabuwa
hanushũ: “Senhor Deusũ ea kanemashinaki”, iki
unaĩsmapabu haki paranamisbuki.
4 Huni mabu itxapayarã,
mirimabũ haibuwai bemisbuki.
Hakia huni nuitapaitunã,
hatũ haibuaibu benu keyumisbuki.
5 Hawara uiãma inũ uĩbiatã txanitxakamisburã,
habunã, hatũ kupiti txakabu binuama bishãkanikiki.
Txani txakamisbu hatũ txakabuwẽ taeshũ
hawa unanuma wakĩ
hatu mepãmakĩ pewama ishanikiki.
6 Tsuara shinãyã inũ mabu hatu inãmisburã,
dasibibũ betxipaikĩ haibuwamisbuki.
7 Tsuara hawa hayamawẽ taeshũ hawẽ betsabũ danaĩbũ
txanima haskawẽ taeshũ hawẽ haibuaibũri henebaĩmisbuki.
8 Tsuãra hawara tapĩtã ha tapĩmawẽ aki
hiwekaĩkĩ ibubis pe shinãbaĩkĩ
unanuma hiwekĩ
hawẽ hamapai ewawabaĩshanikiki.
9 Hawara uiãma inũ uĩbiatã txanitxakamisburã,
habunã, hatũ kupiti txakabu binuama bishãkanikiki.
Txanitxakamisbunã, hatũ mawa besti manamisbuki.
10 Unaĩsmapa hawara pepa hayabia
hawaira putakĩ keyubauni hawa hawẽruatã hiwetirubumaki.
Haska dayaru escravobu beshmas hairabiatũ
shanẽ ibukĩ shanẽ ibuhairatũ enabu hatu yunui hikitirubumahairaki.
11 Bebũkiri shinã pewakubaĩmistũ sinatai taebiatã
hawaira ibubis daemisbuki.
Hakiri hãtxai pemisbuwẽ taea
haki ha ibiabu ana shinãma ibubis hatu hakimawai pe bestikũkaĩmiski.
12 Inu betsa leão pubeĩ tekerẽ imis keskai
shanẽ ibu sinatakĩ hawẽ hãtxa kushipa hatu nĩkamamiski.
Hakia shanẽ ibũ hawenabu hatu merabewakinã,
hatu benimawamiski,
basi anu ui eskarabes ikĩ txa amis keska hatu wakinã.
13 Tsuãra huni bake hawa unãma unaĩsmapatũ
hawẽ epa bika tenemakubaĩmisbuki.
Aĩbũ hawẽ bene ha a txakayamakĩ hiwe txakamamisrã,
hiwe shui anu ui tuis tuis ikũkaĩmis keskaki.
14 Hiwe pepa inũ mabu sharabu
hatũ ibubu anua bimisbuki.
Hakia aĩbu unanepa Senhor Deusũ besti
hatuki nukumakubaĩmiski.
15 Tsuara txikish usha besti shinaĩ usha bestikũkaĩmisrã,
dayamawẽ taea buni tenekubaĩshanikiki.
16 Tsuãra Senhor Deusũ yunuti hãtxa inũ
nemati hãtxa nĩkatã txibãkĩ
hatũ hiwea mekemisbuki.
Hakia tsuãra Senhor Deusũ yusĩti hãtxa danaĩ
hawẽ kupiti bika tenekubaini mawashanikiki.
17 Nuitapaibu merabewakĩ hau hawẽ dayanũ
mã hatu pei inãyumisrã,
Senhor Deus mã inãyua keskaki.
Nuitapai pewaima keska wakĩ
Senhor Deusũ manakukĩ ana inãshanikiki.
18 Ewariama hawarakiri mĩ bakẽ mia nĩkatiru
yusĩkĩ pewakubaĩwẽ.
Ha dukũ yusĩkĩ pewawe.
Hakia ana mĩ pewatirumabia
kupikĩ ha txakabuwaiwẽ
tenãtikiri shinãtimaki.
19 Tsuara sinatahairakũkaĩkĩ hawẽ kupiti bishanikiki.
Hamẽ haskama hau kupiyamanũbũ
tsuara hawẽ nuikĩ mĩ hatu nemashũbia
ana sinata pikuhairashanikiki.
20 Mia yusiãbu nĩkakĩ nemati hãtxa tapĩkubaini
huni ewai mĩ unanepashanaii.
21 Huni yubakai ibubis hawẽ shinanẽ hãtxakĩ
akatsis ibiai atirumaki.
Hakia hawẽ shinã nemakĩ
Senhor Deusũ haska shinaĩ hawena tashnimashũtiruki.
22 Huni betsa yubakatã txanima amisrã,
ha dasibibũ betxipaimisbuki.
Ha inũ, nuitapaibu hãtxamisbunã,
ha txanitxakai hãtxamisbu hatu binumisbuki.
23 Senhor Deuswẽ datekĩ hawẽ hãtxa nĩkakubaĩkĩ
tsuãra hawẽ hiwea bai txibã pewai unanuma hiwekubaĩshãkanikiki,
hawara txakabu ibiaya hawa dateamarã.
24 Txikish bestirã, kẽtxakia besti piti meshũkaĩ metã
hakia hawẽ hashpa anu hawa sanãbirã mukutirumaki.
25 Ẽhẽ iki yura betsabuki kashemisbu hatu kupiaibũ
ha bebũkiri pe shinaĩsmatũ uĩkĩ
hatuwẽ hawenakiri tapĩkubaĩtirubuki.
Hakia nemakanã bestiaibu nĩkakĩ
unanepabũ tapĩmisbuki.
26 Hawẽ epa itxakawakĩ
hawẽ hawara yumetsũtã
hanushũ hawẽ ewa hawẽ hiwe anua nitxĩtã
ha huni bake itxakanika hawẽ atimapawẽ dakeama hiwea uĩmisbuki.
27 Mĩ ẽ bakewẽ taea epaã,
mia nemaibu mĩ hatu ana tapĩkatsi ikama
hatũ yusiã pepa henetã
mĩ txakabukũkaĩshanaii.
28 Huni txakabubũ hawara uiãma
inũ uĩbiai txani besti unãkĩ
habũ pewẽ hatu unãti wabiaibũ
ha yunuti kushipaki kashemisbuki.
Ha inũ, huni txakabubũ hatũ keshawẽ
hãtxa txakabu yuikĩ hatu mesewamisbuki,
hashi kenuhaira hatuki puta keska wakinã.
29 Huni txakabu hatũ yusiã nĩkama
hatuki kashemiswẽ taea
hawẽ kushati hi ma haki tana hayamisbuki.
Huni tatimarã, kushakĩ
pekushtxakayamati peki.