18
Tsuãra ibubis haska betxipaikĩakatsis ikai hawenas besti shinaĩ
huni betsã yusĩti hãtxa betxipaiama
beshtekĩ danãkubaĩmisbuki.
2 Huni unaĩsmapatũ shinanã,
ana hawara betsa tapĩkatsi ismaki.
Haska hawẽ shinã ma haya unãkĩ
haska besti hatu yuikatsis imisbuki.
3 Hamapai txakabuwairã,
ha besti kaka tashniama
dake paeyabi kaĩmiski.
Kẽmisbu beaibũ hatuki dakei
hatuki hãtxa txakabumisbuki.
4 Huni unanepatũ hãtxarã,
hene nuahaira keskaki.
Hanua hene bei tueai keskai
hawẽ unanepa hãtxa itxapa mata hayaki.
5 Huni txakabubiakẽ pepabu keska wakĩ
shanẽ ibu unanikabũ hatu mekekĩ
ha habũ hawa txakabuwaisbuma hatu itxakawakĩ
hatu parãmisbu haska pemahairaki.
6 Ha unaĩsmapa hiwe betsa anu kashũ
txakabu hatu tueshũmisbuki,
hau hawẽ taea ha iki detenamenũbunã.
Hatu haskamamiswẽ taeshũ
ha huni kusha kusha atirubu peki.
7 Unaĩsmapa hawẽ keshawẽ hãtxairã,
ibubis txakabui dispiwẽ teneshekea keskamisbuki,
hawẽ hiwea txakabuwairã.
8 Matxupã txani yuibaũkinã,
misi batapabu pimisbu keska wakĩ
hatu nĩkamabaũmisbuki,
hatũ shinã uke merã hatu mistukĩ txakabuwakinã.
9 Txikish inũ hamapai sharabu txakabuwanikarã,
ha dabe hawẽ betsa kayabi keskaki.
10 Senhor Deusũ kushipa kayabi shinãtirã,
mishki kushipa hiwe keyatapa wanibu hanu iruti keskaki.
Tsuara pepabu hatũ mekenika Senhor Deus anu itxai buaibu
hatu mekekubaĩmiski.
11 Huni mabuyatũ hawẽ mabu itxapakiri shinãkĩ ikũwainã,
mishki kushipawẽ mae kenebaũkĩ keyatapa wanibu
hatũ mekea keska
tsua hikikaĩ metiruma keska shinãmisbuki.
12 Ha dukũ kanei ibubis kẽkũkainaiwẽ taearã,
txipu ana hawa hayama keyushanikiki.
Hakia ibubis keĩsmarã,
txipu hawẽ hamapai hawẽruawai shabakabishanikiki.
13 Hatu hãtxa wakĩ hawẽ hãtxa hatu yui keyuriamabiakẽ
bebũkiri unaĩsmapatũ hawaira hatu kemakĩ
hatu dakewamisbuki.
14 Isĩ tenebiai hawẽ huĩti shinã txãkãtiruki.
Hakia punu nukai keyua dakakẽ
tsuã shinã txakawãkĩ benimawatirumaki.
15 Unanepa tapinikabunã,
unanepa hãtxa sharabu benakĩ
ana tapĩkubaĩmisbuki.
16 Shanẽ ibuhaira betsabe hãtxanũ ishũ
tsuãra hawẽ daewati pepa beshũ
hawẽ tsuma mĩ inã mia bitxitiruki.
17 Ha dukũ tsuara parananaĩ hãtxai taeai nĩkakĩ:
“Hawẽ hãtxa txanimaki”, ibiatã
hakia ha katxu betsari txanikĩ yui pewai nĩkatã
hatũ shinã betsa watirubuki.
18 Shuku dabetũ shinã dabe wai ha ikaibu
haratura pe hatu unanũ, iwanã,
hawẽ henekĩ tapĩkatsi
huni betsã unãti númeroya urẽkĩ
Senhor Deusũ haska betxipaiai hatu yunuai tapĩtirubuki.
19 Mishki kushipawẽ mae kenebaunibu
hawa bika teneama tsuãra di atiru bikahairaki.
Hamẽ hawẽ betsa sinatamahairashina
hawa bika teneama keska daewakĩ
shinã betsa wamarã,
ha binua bikahairaki.
Shanẽ ibũ hiwe anu hawẽ nemakĩ
mane kushipawẽ kebenibu anu
tsua hikitirubuma keskai
tsuara ha irabetã pashkakainarã,
ibubis txakabuima ana daeama habe sinatapaketiruki.
20 Pikĩ yaniwai keskai
tsuara hatũ hãtxa tibiwẽ ibubis hãtxakĩ nĩkai benimamisbuki.
21 Mĩ hãtxawenã,
mĩ hiweshanai inũ mĩ mawashanai
haratura yui mĩ hãtxaii.
Haska txakabu yui mĩ hãtxa txakayamamisrã,
habiaskari mei mĩ bika tenepakeshanaii.
22 Tsuãra aĩbu pepa biarã,
hawẽ taea pepa besti hayakũkaĩshanikiki.
Senhor Deusũ hawẽ mia duawakatsi
hawẽ pepa mia uĩmakubainikiki.
23 Nuitapaibu hãtxa pewẽ ea ibiaibũ
hakia huni mabuyabũ hatũ hãtxa kushipawẽ
hatu kũyã akĩ kemamisbuki.
24 Huni haibu itxapa hayabia
habũ hawaira itxakawatã henebaĩtirubuki.
Hakia hawẽ haibu hatiribũ
hawẽ betsa kayabi binumakĩ duahairawatirubuki.