Nukũ Senhor Deus duapa hakiri besti kẽwãtikiaki, na nawati hãtxarã
Davikiri kãta kenenikiaki
34
Bari betsa tukama Senhor Deus kẽwãkĩ duawakinã, ẽ heneama ikũkainaii.2 Ẽ shanẽ ibu Senhor Deus shinaĩ ẽ keaiĩ.
Huni keĩsbumaã, ebe benimakĩ ea nĩkakãwẽ.
3 Senhor Deusũ kena ewapawai hui kushipawẽ ebetã kẽwãkãwẽ.
4 Datekĩ Senhor Deus ẽ benakĩ yuka ea nĩkakĩ kemaya
ha hawẽ ẽ dateai ea henemakĩ putamaimaki.
5 Tsuabũra Senhor Deus shinaĩbu benima paẽ hatu atxia
hawawẽ dakeabuma benimashãkanikiki.
6 Nuitapakĩ ẽ Senhor Deus kena ea nĩkakĩ kemakĩ
ẽ bika teneai dasibi ea putamaniki.
7 Tsuabũra Senhor Deuskiri pe hãtxakĩ kẽwãkubainaiburã,
hawẽ nai tsumã hatu keshe pewashũ hatu piskumamiski.
8 Ibubis Senhor Deuski txiti ikĩ unãkãwẽ.
Senhor Deusrã, merabenã pepahairaki.
Tsuabũra haska wai haki txiti ika ha huni benimakũkaĩmiski.
9 Senhor Deuski txiti ikĩ duawai haki mesei ha keskai pepakubaĩkãwẽ.
Tsuabura haki mesekĩ duawakĩ kẽwãkubainaiburã,
hawara pepa akaibu hatu danãma nĩkakĩ inãkubaĩmiski.
10 Tsuara mabuwãyã hiwemisburã,
benui keyuaya nuitapai ana hawa hayama buni teneshãkanikiki.
Hamẽ tsuabũra Senhor Deus benakubaĩmisburã,
hawa hawẽ hamapai tibi pepa benuama ikũkaĩshanikiki.
11 Senhor Deus duawatikiri matu yusinũ,
ẽ bakebuũ, nenu beshũ ea nĩkai bekãwẽ.
12 Mã bari itxapa hiwekatsis ikai?
Mã benimai hiwekatsis ikai?
13 Mã haskai hiwekatsis ikairã,
matũ hãtxa txakabu nemakubaĩkãwẽ,
hãtxakĩ txanitxakakĩ yuitaskamarã.
14 Txakabu betsa betsapa danãkĩ pe besti akubaĩkãwẽ.
Haratura hawẽ unanuma kati bai betxitã ha txibãkubaĩkãwẽ.
15 Senhor Deusũnã, tsuabũra hawẽ yusiã txibãkĩ duawamisburã,
hatu mekekubaĩmiski.
Hanushũ habũ ea akaibu shabakabi hatu nĩkariamiski.
16 Huni txakabuburã, Senhor Deus hatuki sinatahairakĩ
mai anushũ hamapai akubaĩkĩ ha shinaĩbu tere akĩ
ana hakiri shinãtima washanikiki.
17 Hakia tsuabũra Senhor Deus duawakubaĩmisbũ hawarawẽ nuikĩ yukaiburã,
hatu nĩkakĩ bika betsa betsapa teneaibu hatu nemashũkubaĩmiski.
18 Senhor Deusrã, nuku mekei nuku dapi niaki.
Tsuabura bika betsa betsapa tenei huĩti nishmai nui hawawẽ haskatimabiakẽ
Senhor Deusũ hatu mekekĩ pashawashanikiki.
19 Tsuabura huni pepabu merabenaĩ yurabũ hatu unãma
betsa betsapawẽ hatu itxakawamisbuki.
Hakia Senhor Deusũ haska teneaibu hatu duawakĩ
haska tibi hatu putamakĩ binumamiski.
20 Huni pepa Senhor Deusũ hawẽ shau tibi mekemiski.
Haskawẽ taeshũ hawẽ shau betsa tekeama ishãkanikiki.
21 Habu huni txakabubu Senhor Deusũ ibubis hatũ txakabuwẽ tenãshanikiki.
Hamẽ tsuabũra huni duapabu danãkubaĩmisburã,
Deusũ hatu unãmakĩ isĩ tenemakĩ kupishanikiki.
22 Hakia Senhor Deusũnã, hawẽ dayarubu haki txiti imisburã,
hatũ hiwea hatu itxakawama hatu mekekubaĩshanikiki.