Hiweti pepa Deus anu besti hayakiaki, na nawati hãtxarã
Davĩ kãta kenenikiaki
16
Senhor Deusuũ, ea mekekubaĩwẽ,mia besti kẽwãkĩ ẽ mia txibainã.
2 “Mĩ ẽ Shanẽ Ibũ ea duawakĩ
mĩ ea pepa wamiswẽ taea ẽ benimaii.
Tsua mia keska hayama mĩ hatu binu keyua kẽwãkĩ ẽ mia yuimiski.”
3 Ha enabu hatiri meribi mia hiweshũkĩ habũ mia besti kẽwãmisburã,
hatuwẽ benimai ẽ shinã txãkãkũkaĩmiski.
4 Hakia ha habũ dami betsa deus washũ kẽwãmisburã,
mĩ haska tenetiruma tenei yumãhairashãkanikiki.
Hamẽ eanã, haska wakĩ hatũ dami kẽwaĩburã,
yuinaka tesẽshũ ẽ hatu inaĩsmahairaki!
Ha inũ, ha dami betsa betsapa kẽwãmisbu hamẽkẽ
hatũ kena ẽ yuismahairariki.
5 Haska ẽ haya hawa shinãma
mĩ ẽ Deus mekenã besti ẽ shinãkubainaii.
Ea duawakĩ ẽ hiwea ea inãkĩ pe besti mĩ ea mekekubaĩmiski.
6 Na mai pakea mĩ ea yunukĩ shanẽ ibu wani
hawẽruahairawẽ taeshũ ẽ mia kẽwaiĩ.
7 Senhor Deusuũ, mĩ ea mekekĩ pe yusĩmiswẽ taeshũ
duawakĩ ẽ mia kẽwaiĩ.
Ẽ ushabiakẽ ea hãtxa wakĩ mĩ ea tapĩmamiski.
8 Eã ẽ mia hawa pashkamakẽ mĩ eberi nikũkainaya
tsuãra ea kanemakĩ ea txakabu amatirumaki.
9 Haskawẽ taeshũ ẽ huĩti ukemerã shinã txãkãhairai ẽ benimahairaii.
Hawa dateama ẽ mia hiweshũkũkainaii.
10 Ẽ mawa ea maiwabu hanu mĩ ea heneama ishanaii.
Hanu mawa bumisbu anu mĩ tsuma txĩtuĩsma
hari mĩ ea bashiama ishanaii,
hau haria ẽ yumãkũkaĩyamanunã.
11 Mĩ hiwekuiã kati bai mĩ ea unãmakubainaii.
Mibe nia ẽ benimahairaya mĩ ea duawakubainaii.