Yurabu patapabũ Deus danãkanikiaki, na nawati hãtxarã
Davĩ kãta kenenikiaki
14
Huni unaĩsma patapabũ Deuskiri shinãkĩ yuikĩ:“Deus hayamaki”, imisbuki. Haburã, parananaĩ atimapai hiweabuki.
Tsua betsã hatũmebi hawa pepa wamis hayamaki!
2 Naiurishũ Senhor Deusũ yurabu uĩkĩ shinãkĩ:
“Tsuabu pepakĩ ea ẽ Deus ea benabaũkanimẽkaĩ?” ibiaya
3 hakia tsuã Deus benama dasibibu parananã bestimisbuki.
Hanishũ huni pepa bestitxai tsuã betxitiru hayamahairaki.
4 Habũ txakabuwakubainaiburã,
hawa Deuskiri nĩkabumaki.
Habiabũri enabu hatu pikĩ itsa wakanikiki, misi pia keska wakinã.
Habũ Senhor Deus ikũwãbumã hatu haska wakanikiki.
5 Habũ Deus nĩkakĩ txibaĩbu Deusũ hatu pe mekekubaĩmiski.
Hamẽ habũ hawẽ hãtxa txibaĩsbumarã,
Deuski datetxakayamai saki saki ishãkanikiki.
6 Habu nuitapabiakĩ Deuskiri shinãkĩ txibaĩbu
hatuki kashebiaibũ hakia Senhor Deusũ hatu pe mekekubaĩmiski.
7 Ha Israelbũ mekenikarã,
Jerusalém anu shanẽ ibunũ ika hau hushanũwẽ!
Senhor Deusũ nũ hawenabu nuku ana pe mekekĩ duawaya
Jacó enabu, ha Israelburã,
dasibibu mae tibi anuabu benimai shinã txãkãshãkanikiki.