Deus inũ hawẽ Katuakirikiaki, na nawati hãtxarã
2
Haskai yurabu Deus ikũwãbuma mae tibi anua hawa unãmahawẽ hawatima bestiwẽ yubakai shinã betsa betsapa wai itimaskakanimẽkaĩ?
2 Mai anua shanẽ ibu kushipabu shanẽ ibu betsabube
Deus inũ hawẽ Katuaki sinatai hatu maemanũ ika
yubakai hatuki ha ikanikiki.
3 Hui kushipawẽ habũ yuikĩ:
“Ha Deusũ hatũ nuku mekea ana ẽ betxipaiamaki!
Hawẽ mane dispiwẽ nuku menesha keska wani pekenãkãwẽ!” ikaibũ
4 haskaibu Senhor Deus naiuria shanẽ ibumistũ nĩkatã
hatukiri shinaĩ hawa unãbumawẽ taea hatu usãmiski.
5 Hanua hau haki datehairashanũbũ hatuki sinatahairakĩ hatu yuikĩ:
6 “Ha Shanẽ Ibu ẽ katuni ẽ yunushanai
ha meribi mae pepa mati Sião anu shanẽ ibushanikiki”,
7 Senhor Deusũ haska wani ekiri shinaĩ matu yuinũ nĩkakãwẽ:
“Ẽ hawẽ Katua ea yuikĩ:
‘Mĩ ẽ bakerã, natiã ẽ hiwea mia inãkĩ ẽ mia yunuaii.
8 Mĩ ea ea akaya mai pakea hirabi anu dasibi hiweabu
ẽ mia yunukĩ mina ẽ mia wamashanaii,
hatũ Shanẽ Ibu kayabi mia wakinã.
9 Mane mestẽti tsumashũ
shanẽ ibu kushipa dasibibu mĩ hatu yamawashanaii,
haska mai kẽti wanikatũ hawẽ kẽti txakabukẽ ibuã pusamis keska wakinã’ ”,
10 haska wani matu yuinũ nĩkakãwẽ:
“Mã mai anu shanẽ ibu kushipabuũ,
na hãtxa nukũ Shanẽ Ibu kayabikiri nĩkakĩ tapĩhairakãwẽ!”
11 Senhor Deus duawai dayashunirã,
haki mesei datekĩ benima besti wakubaĩkãwẽ.
12 Ha inũ, hawẽ bake kẽwãkĩ pepawakubaĩkãwẽ,
mã nĩkamawẽ taea hawaira matuki sinataya hau bai namakishũ matu tenãyamanunã.
Hamẽ tsuabũra Deusũ Katua betxipaikĩ mekemakubaĩmisburã,
habu besti benimakubaĩmisbuki.