SALMOS
DEUSKIRI KÃTATIKI
Benima kayabirã, pepabuna bestikiaki, na nawati hãtxarã
1
Huni pepa benimai shinã txãkainã,tsuabũra hamapai txakabuwakĩ
hatu yusĩ txakaibu hatũ yusiã danaĩ inũ,
habũ bai txakabu tanama inũ,
habũ Deus itxai haki kashemisbuwẽ taea habube mapuisbumaki.
2 Ha huni pepabũ Senhor Deusũ yusiã betxipaikĩ tapĩhairakĩ,
hakiri shinãkubaĩmisbuki,
bariri inũ meshu meranã.
3 Ha yuraburã, hene kesha hi banabu pe ewatã
hanu bimiaitiã hawẽ bimi pe hushĩmis keskabuki.
Ha inũ, hawẽ pei shanama keskai,
habũ Deusũ hãtxa betxipaimisburã,
dasibi haska amis pepahaira ikubaĩmisbuki.
4 Hakia tsuabũra Deus danãkĩ nĩkaisbumarã,
hawa pepa hayabumaki.
Haskawẽ taea mai kuru niwẽ sa akĩ
hatu yamawabaĩmis keskabuki.
5 Hakia Deusũ yura dasibibu hanu hatu unãti waitiã
habu Deusunabu pepabu hikiaibu anu haburi hikimama
habũ txakabuwamiswẽ taeshũ hawa manakuti pepa hatu inãma
Deusũ hatu kupi bestishanikiki.
6 Hakia hawara Deusũ betxipaiai yurabu pepakĩ txibãmisbu
Senhor Deusũ hatu mekekubainaya
habũ Deus txibaĩsbuma hani pashati hayama benuhairashãkanikiki.