31
Aĩbu txipash ẽ aĩma uĩ hawẽ kemukĩtxutakatsi ikama Deusbe ẽ yubakaniki.
2 Dasibi kushipahairatũ nai anua
ana hawa hatu inãshanimẽkaĩ,
habũ kanekĩ hawẽ aĩma txutakubainaibu
dasibi hatu uĩmistunã?
3 Huni txakabubu inũ tsuabura yubakabiatã
hawa akabuma habu ishãkanikiki, nuitapairã,
habu ana hawa pe hiweamarã.
4 Hamapai sharabu ẽ akubaĩmis tibi
Deusũ txanima ea uĩkubaĩmiski.
5 Txanima emebi shinã txakabuakĩ
ẽ hatu hãtxa txakabuwaismahaira inũ
tsuara paranũ, iwanã, ẽ shinãkubaĩsmarã,
shabakabi txanima ẽ matu yuiaii.
6 Ẽ pepahaira wamis ea unãti wakĩ
Deusũ besti hawẽ balançawẽ tana keska wakĩ
ea tanakĩ pewashanikiki.
Haska ea tanatã ẽ pepakẽ ea unãshanikiki.
7 Ẽ hiwea pepa henetã hawara uĩ kemukĩ txibaĩ kasmai
ẽ mekẽwẽ hawara txakabu sharabu ẽ meimakẽ
8 hawara banakĩ ẽ txatxima hau betsabũ pikasmakĩ
hawara ẽ banaima hau betse betse anũbũwẽ.
9 Txanima kemukĩ ea dapi hiweatũ aĩ uĩ kasmai
hawẽ bene hanumakẽ parãtã ẽ txutaimakenã,
10 hawẽ taeshũ ẽ aĩ ea mebĩtã
huni betsã tsumawakĩ escrava wabaina
hau huni betsabũ ati wakĩ txutakubainũbũwẽ.
11 Haska ẽ hiwei atimapamiswẽ taeshũ
hau Deusũ ea kupihairashanũwẽ.
12 Ẽ kena pepa ana shinãtima wakĩ
ẽ mabu ea menũ keyũtirubuki.
Hakia ẽ kaneismawẽ taea ẽ hawa dateamaki.
13 Ẽ dayarubu huni inũ aĩbũ
hawara hawama bikatsis iki eki ha ikĩ
haska ea yukaibu hatu danãma
inãkĩ ẽ hatu merabewaimaki.
14 Ana haratu haska Deusũ betxipaiai ashũkĩ
ẽ uĩmatirumẽ?
Hamẽ ẽ kanemisrã,
haskara ẽ Deuski txanitirumẽ, ea yukarã?
15 Ẽ dayarubu inũ eari habias Deusũ
nukũ ewã shãkĩ anu nuku dasibi dami wakĩ
hiwemaniwẽ taeshũ ẽ hatu nĩkakubainimaki.
16 Haska inũ, tsuara hawara hayama nuitapaibu
hatu merabewakĩ ẽ heneama ikũkainimaki.
Aĩbuaibu hawẽ bene mawanibu hatu yubanishũ
hatũ piti inãkĩ ẽ hatu merabewakubainimaki.
17-18 Aĩbu beneuma nuitapai
hau tsuã hatu itxakawayamanũ mekekĩ
bakeishta ibu huni hayabuma
hatũ epa keskakĩ ẽ hatu merabewakubainimaki,
piti eskarabes hayabia ẽmesti piama
hatu pashkashũkubaĩkinã.
19-20 Matsitiã tsuara yabukuti hayama nuitapai inũ
tariuma matsi tenei mawakatsis ikai uĩkĩ
ẽ txashuwã dani tari tima ẽ hatu inã
hawẽ yabukui shanakubaĩkĩ benimakĩ ea yuikĩ:
“Mĩ huni pepaki”, ea wakubainimabuki.
21 Shanẽ ibu kushipa betsabũ bakeishta ibu hayama
itxakawaibu hatubetãs itxakawakatsi ikama
haska ẽ txakabu ekiri yuikĩ shinãtirubu unaĩ
ẽ pepa besti ikũkainimaki.
22 Na hãtxa ẽ dama yuiai ẽ txanitxakayarã,
ẽ pũyã ibubis teketã
ẽ pũti anua tsekei hau paninũwẽ.
23 Deusũ ea kupikĩ tenemaya
haskatã hawẽ kushipa ẽ nematiruma
hawẽ ẽ datehairaii.
24 Unanuma hiwenũ ishũ ouro mane itxapa itxawatã
haki txiti inũ ika ẽ hawẽ kemukĩ shinãma ikũkainimaki.
25 Dayakũkaini inabu itxapa inũ, mabu itxapa inũ,
dayarubu itxapa inũ, pei itxapa ẽ hayabia
haska sharabu ha shinaĩ ẽ hawẽ hawa keĩsmahairaki.
26 Bari hawẽ txasha hawẽruahaira kaĩkiranai inũ
ushe babekei ewapai hawẽruahairari uĩkĩ
27 hawa hune inũ shabakabi ẽ hatu kẽwã taskaismaki,
ẽ mekẽ hatu meshãshũkinã.
28 Hakia Deus danãkĩ bari inũ ushe ẽ kẽwãmiswẽ taeshũ
Deus nai anua eki sinata txakayamakĩ
ea kupitiruki, unãbiai ẽ haki petxiarã.
29 Habu eki sinataibu txakabũ hatu atxia bika teneaibu
hatu uĩ hatukiri shinã txakama ẽ hatuwẽ nui bestimiski.
30 Eki sinataibu hau mawanũbũ
hatukiri hãtxa txakabukĩ ẽ hatu yupuismahairaki.
31 Tsuara ebe hiweabũ nawa betsa txaikea beaibu
hatuwẽ kemukĩ hatu itxakawanũ ikaibu
32 ha nawabuwẽ nuikĩ hiwemanu hau ushayamanũbũ
hatu mekekĩ ẽ hiwe anu ishũ ẽ hatu ushãmiski.
33-34 Huni betsabũ kanetã yurabuki datehairakĩ
hatũ txakabu hunekubaĩmisbu keska wakĩ
eãri hawara hune kanekĩ txakabuwatã ẽ huneismaki,
tsua parãmarã.
Hamẽ ẽ txakabuwẽ taea
enabu eki dakekĩ ea danãtirubuwẽ taea
ẽ hiwe bepu keyutã
ẽ nishma dakaismaki.
35 Na eska ẽ yuikubainai tsuãra hau ea nĩkashanũ
hawẽ matu unãti wamati ẽ kena ibubis netãkĩ
ẽ keneaii, bisha bisha akinã.
Haska ẽ kanekubainimakiri huni betsã hau kenetã
shanẽ ibubu inãnũwẽ, hawẽ ea yuãkĩ txitetirã.
Ea haska waibũ Deus kushipahaira dasibi binuatũ
ea nĩkamis shũ ea merabewakĩ
hau ea kemanũwẽ.
36 Haska ea txitebiaibu ẽ kaneismawẽ taea ma keneabu
maiti keska ha kene sawetã dakeama ẽ nikaũshanaii.
37 Shanẽ ibuhairatũ bake keskai pepai
hawa txakabuma Deuski kematã
dasibi ẽ akubiranai ha bebũ nishũ ẽ yui keyushanaii,
hawa dakeamarã.
38 Hanu ẽ yunumis mai uru pewakĩ
dasibi pe mekekubaĩkĩ
bari betsatiã banayuama ẽ huĩrukũmamiski,
hau ana mai pepayunũ manakinã,
hau ea huni mawayamashanunã.
39 Hamẽ tsuãra yunu ẽ yumetsuima kasmai
ẽ dayarubu parãkĩ ẽ hatu pe pakamakẽ
40 ẽ bai anu shekiwã trigo ana hukuãma
hakia musha besti benei inũ
shekiwã cevadari ana hukuãma
basi txakabu benekĩ
hau dasibi ẽ yunu bai atxikubaĩshanũwẽ,
akĩ hawenabu nemai hawẽ hãtxawẽ Jó yuinikiaki.