30
Na haska betsa betsapa ẽ teneayarã,ikis huni berunã
eki kashetã ea usãkanikiki.
Na habu eki kasheaibũ
ibubu txikishbuwẽ taeshũ
uatiã ẽ hatu danãkubainiki,
kamã keskabuwẽ taeshũ ẽ txashuwã mirima
hau ea mekeshũyamanũbunã.
2-3 Hatũ epabu txikishi dayaisbumawẽ taea
hatũ mekẽnẽ ea hawa dayashunama ipaunibuki.
Hawa piti hayama bunihairai habu mapukubaini
hanu tsua hiweabuma anushũ meshu merã
hi tapũ shanabiakẽ pikĩ sheru sheru aki inũ
4 hi pusi mukabiakẽ betseshũ tapũ betsa betsapa pukĩkĩ
betsetã pikubainibuki.
5 Haburã, huni yumetsubu keska wakĩ
hatuki sinatakĩ hatu danãkĩ hau txai bunũbũ
hatu txibaĩ sai sai ikubaĩkĩ
mae tibi anushũ hatu putakubainabu pashai
6 mananã mashash kini anu inũ
mashash ewapabu mania anu hiwekubainibuki.
7 Habu haskai nuitapahairai txaka musha namã hanus
itxa mania kashakubainibuki.
8 Ha yurabu hamẽburã, tsuã bakeki, iwanã, hatu unãbuma
dasibibũ danãkĩ txai hatu nitxĩkubainibuki.
9 Hakia ikis hatũ bakebũ ea dapishũ ea yuaĩ eki kashekanikiki.
10 Ẽ besuki kemu mitxukĩ ea danãhairakĩ
ana eki kemakatsi ikama benãtashũ ea daĩbaĩkanikiki.
11 Deusũ ẽ kushipa mebĩkĩ ea dakewaya
tsuã hawa ea ana nĩkakatsi ikama
eki ana meseabumaki.
12 Habũ ea danaĩbu itxapa beshũ
ea hawẽ tĩ akatsi birũwãtã
txakabuwakĩ ea tenãkatsis ikanikiki.
13 Ẽ shushakatsis ibiaya ea yamawanũ, iwanã,
ẽ hanu kai anu eki bai kebeãbuki,
tsuã ea hatu nemashunamarã.
14 Maewã mishki kenebaunibu namakis
purekĩ shui wanibu anu hikibirã
eanu butui ishtxubirani mesebirã ea datekanikiki.
15 Mesehairai ẽ datekũkainaii.
Ekiri ibubis pe ẽ shinãkubainima ana ẽ haskamaki.
Unanuma ẽ pe hiwebiakũkainima
nai kuĩ dunua yamakaĩmis keskai ẽ ana haskatã hiweamaki.
16 Isinĩ ea aka tenei nuitapai ẽ ana hiwekatsi ikamaki.
17 Isĩ tenetxakayamai ẽ shauki dikabis hikishũ
ea isĩwãkĩ heneama meshu tibi ẽ bika tenekũkainaii.
18 Deusũ hawẽ kushipawẽ ẽ tariyabi ea tetsũshũ
19 txi mapu inũ mai mishpu keska ea wakĩ pupus anu ea putaimaki.
20 Deusuũ, ẽ mia merabewati yukabia
ea merabewakĩ mĩ ea hawa kemamaki.
Ẽ mia ea a txakayamabia mĩ ea hawa nĩkamaki.
21 Ha dukũ mĩ ea betxipaibiakubainima
hakia ikis ea ana betxipaiama
mĩ ea itxakawakubainaii.
22 Niwe kushipa keskawẽ ea benikĩ
mĩ kushipawẽ ea bini bini akĩ mĩ ea taaii.
23 Hanu mawa bushanaibu anu mĩ ea iyukatsis ikai ẽ unaiĩ,
dasibi mawabu hanu hatu mekekĩ mĩ iyumis anurã.
24 Ha nuitapai hawa hayabumarã, eanã,
ẽ hatu merabewama ikimamẽ?
25 Nuitapai hawara bika teneaibu inũ
habu hawa hayabumawẽ taea hatu uĩ
ẽ hatuya kashama ikimamẽ?
26 Ẽ haska hatu merabewakubainimawẽ taea
ẽ benimati manakabiaya
natiã haskawẽ mĩ ea kupia ẽ nuitapakũkainaii.
27 Ẽ huĩtinĩ bika tenei hawa huĩrukuãma
shaba tibi bika betsa betsapa besti ẽ mekubainaii.
28 Bari txashama anu ẽ ana hiweama
isĩ txakabũ ea atxia
ana unanumama punu nuka bestia dasibibu bebũshũ
“Ea merabewakãwẽ”, iwanã, ẽ hatu yukakubainaii.
29 Ea nuitapairã, yuinaka kamã inu inũ avestruzrã,
ẽ haibu inũ ẽ betsabu keska ẽ hatu shinaiĩ.
30 Ẽ bitxi ana meshui yuna tenei
ẽ yura shana bakakũkainaya
31 ha mimawati harpa inũ teperewewẽ ana benimama
isĩ pae tenekĩ ẽ kasha besti kaiaĩ ẽ nĩkakubainaii.