Turu' Tuni Lama Pinili' Nggien Nuud Lama Piniit Yesus
6
1 Waktu ina kimonop na tuni lama pegbiaa' susuad Yesus.
Kiara lama Yuhudi pandi uubm Yunani ma' kiara hai pandi uubm Iberani.
Na lama pandi uubm Yunani ndoot guakng.
Poro' siga lama na,
nipuud nda nda' suhup bigiadn odu-odu.
2 Ina na,
lama piniit Yesus,
pulu' dua tuni na,
imompodn ma' nigsuad di suhu lama pegbiaa' susuad Yesus.
Uubm siga lama na,
“Ndoot bakng ihi niliu mpompot birta tidi Itala ma' ngurus buntuadn nipuud.
3 Gaabm uhu pa mili' turu' lama tidi dihu nuan lama leidn kemengaan.
Siga lama na mistii' baar-baar miaa' susuad Midua Itala ma' pintaardn.
Inubu' ihi mori siga lama na kerai mpompot buntuadn
4 supaya ga ihi mahi masa mi nggien nguduaa ma' mpompot birta tidi Itala.”
5 Suhu lama pisiaa di Yesus ingahudn susuad ina.
Siga lama na imili' Stepanus.
Sia pisiaa baar-baar di Itala ma' kimosog ga' Midua Itala.
Siga lama na imili' hai i Pilipus,
si Perekorus,
si Nikanar,
si Timun,
si Permenas,
ma' i Nikelaus.
Sia tidi bandar Antiokia ma' bangsa leidn,
tei' sia bu' bas na simuak ugama Yuhudi nda' pa sia pisiaa di Yesus.
6 Na turu' tuni na iniit kindi lama piniit Yesus inanu inguduaa ma' sineronggodn nggien ingelantik siga lama na ngkerai.
7 Barabm lama kimpandi kentangan birta tidi Itala ma' di bandar Yurusalam kimonop na lama pegbiaa' susuad Yesus.
Ma' kiara hai barabm lama pegogot ugama pisiaa di Yesus.
Stepanus Diahap
8 Stepanus biniriadn Itala berahat ma' kuasa sampai nyata' na mbisa binuat nya di tingguangan kuberaman lama.
9 Tei' kiara lama limoon nya tidi bali simbiangan,
bitangan Bali Simbiangan Pinelepas.
Siga lama na bangsa Yuhudi tidi bandar Kirena ma' Iskandaria,
bunua Kilikia duma' Asia.
Siga lama na igiit Stepanus nigtangkar,
10 tei' nda' ikeloon nya pasal sia pintaardn ma' Midua Itala ingosog nya.
11 Inubu' siga lama na inupahat ma' inuap lama imoro' bas ikidoor Stepanus ingijampa nabi Musa ma' Itala.
12 Ina na,
siga lama na ipitindag bani kutua' lama Yuhudi,
sigu ugama,
ma' lama leidn sampai Stepanus diahap ma' iniit kindi mekama ugama Yuhudi.
13 Siga lama na igiit saksi' nggien inaksi' ma' igitoot imukti' kibilu.
Uubm siga lama na,
“Stepanus nda' pandi beranti ngijampa bali simbiangan nti nuan Itala sengompu' ma' undakng-undakng nabi Musa.
14 Bas mi na ikidoor nya susuad Yesus tidi bandar Nejarat mingin minasa nggien ti simbiaakng ma' nguba adat tietak nabi Musa ringa' bu' adi dihiti tuurdn-munuurdn.”
15 Nentaadn na lama gugupug di mekama na inondu' Stepanus.
Siga lama na ikiliid rua nya kiara siur nda' sala' meleyhat.