Yesus Ingira' Pungga' Ga' Nguduaa
11
1 Odu leidn Yesus inguduaa.
Pegpunga nya nguduaa kiara simbatu lama pegbiaa' nya igsuad di nya.
Uubm lama na,
“Guruadn,
iroo' ihi na nguduaa sikng kedaadn ny Yohanes bas na ingira' lama pegbiaa' nya nguduaa!”
2 Uubm Yesus di siga lama na,
“Waktu nyu nguduaa,
duu nyu nguduaa sikng nti:
‘Ama' di suruga',
tudi ihi kemengaan ngaardn nu!
Pusaga' na pirinta nu di dunya' nti!
3 Biri ihi ngkoon suhup odu-odu!
4 Umpuna' na dusa mi,
singgurua mi ngampudn lama kisala' di dihi kai!
Tudi ihi na,
supaya ndihi kinaman kupala kuakng!’ ”
5 Inubu' Yesus nigsuad di lama pegbiaa' nya.
Uubm nya,
“Supama na,
bakng sikng kiara lama kindi bali pangan nya di tenga' robi ma' igsuad di pangan na,
‘Pebeloso' ou na ruti tolu nggiou
6 nggien hu mmohodn pangan ku baru miatakng tidi bunua leidn,
pasal ndara ngkoon kii' bali mi.’
7 “Tei' lama di soig bali na miabat sikng nti.
Uubm nya,
‘Dei pumunggar dihi!
Ihi ikodop ma' pintu' kiunsi' ku na.
Ou kaya' mudukng mori diha ngkoon!’ ”
8 Uubm Yesus,
“Ou moro' dihu walaupudn lama na kaya' mudukng mori pangan na ruti,
pasal na pangan ketogu' kibori nda' pandi beranti,
sia mori hai onu-onu ga kibiriidn nya.
9 “Ou moro' di dihu pikibori uhu ga,
uhu pudn ngkaap.
Pingirubm uhu ga,
uhu pudn ketomu.
Pununtug uhu na pintu',
pintu' pudn buhaadn adi dihu.
10 Pasal esi-esi ga kibori,
sia ngkaap.
Esi-esi ga ngirubm,
sia ketomu.
Ma' esi-esi ga nuntug pintu',
pintu' na buhaadn adi nya.
11 “Suhu dihu kati' kianak,
bakng anak nyu kibori seda',
leidn ga uhu mori ulakng,
koo ga na?
12 Atau pudn bakng sia kibori tilug,
leidn ga uhu mori nya tingaang.
13 Walaupudn uhu ndoot,
nduhu mori medoot ngkedoot di anak nyu.
Onu pa bakng Ama' ti di suruga'!
Sia mori Midua Itala di suhu lama kibori tidi nya.”
Yesus Ma' Beljabul
14 Di na odu leidn Yesus puhad kuakng tidi lama bobu.
Pegluas kuakng na,
lama bobu na ikaap igsuad.
Mbarabm lama dia kibunggakng,
15 sembela' siga lama na susuad.
Uubm siga lama na,
“Sia ngkaap mpuhad kuakng,
pasal kupala kuakng,
ngaardn nya Beljabul,
imori nya kuasa.”
16 Kiara hai lama leidn dia nginam masukng Yesus.
Siga lama na suru' nya piliid kuasa nya,
supaya kiara bukti' kuasa na tidi Itala.
17 Tei' Yesus pandi pihiardn siga lama na.
Sia susuad ndalabm.
Uubm nya,
“Supama na,
bakng kiara lama simbatu pirinta megloon,
pirinta na medabu',
medadi ndara guna.
Ma' bakng kiara lama senga anak mbunu' sei,
siga lama na medadi mbiakng.
18 Ina hai bakng pirinta kupala kuakng megloon deirdn nda,
pirinta na nda' taadn.
Ina na,
uhu nentabm diaadn mpuhad kuakng pasal Beljabul mori diaadn kuasa.
19 Bakng oo' nga rua,
esi gisi mori lama pegbiaa' nyu kuasa nggien mpuhad kuakng na?
Lama pegbiaa' nyu mukti' pendapat nyu sala'.
20 Midua Itala imori diaadn kuasa nggien mpuhad kuakng.
Ina na bukti' Itala pusag pirinta nya di tenga'-tenga' nyu.
21 “Bakng kiara lama kosog ngejaga bali nya ma' pekahas na,
arta' nya nda' meteirdn.
22 Tei' bakng kiara lama lobi kosog ngua' ngala ma' ngerampas nya,
na lama pengerampas magi arta' bas riampas na.
23 “Ina hai esi-esi ga lama nda' miaa' diaadn,
sia na lemoon diaadn.
Ma' esi-esi ga lama nda' sama-sama ma' diaadn ngkerai,
sia na minasa kerai hu.
24 “Bakng kiara kuakng muhad tidi lama,
sia mpanu kindi tenga'-tenga' bunua ngirubm gien nya temalakng tei' nda' ketomu.
Kuakng na mpihir deirdn na,
‘Ayad pa ou pebalik kindi bas ku minien ringa' diti.’
25 Pegbalik kuakng na,
sia kiliid gien bas nya minien meloos ma' kekamas.
26 Inubu' sia lumuas ngua' noog ibal nya,
turu' tuni lobi pa ndoot tidi nya.
Siga lama na mien dia ma' kedaadn lama na pudn lobi pa susa tidi bu' na.”
27 Atakng Yesus susuad,
kiara simbatu libudn dia igsusuad di Yesus.
Uubm nya,
“Untukng baar-baar libudn iganak diha ma' ipudu' diha.”
28 Tei' Yesus miabat libudn na,
“Leidn ga ina,
palikng untukng lama kidoor ma' miaa' birta tidi Itala.”
Tanda' Ny Yunus
29 Siga lama na kimbarabm ma' Yesus igsusuad.
Uubm nya,
“Lama na haa' na landu' na ndoot.
Siga lama na suru' diaadn piliid kuasa ku,
tei' ma' simbatu pudn ndou piliid siga lama na,
set ku ga mori tanda' nabi Yunus.
30 Sia ringa' bu' ndedi tanda' di bunua Niniwa.
Ina na hai,
ou na piniit Itala medadi tanda' adi lama na haa' na.
31 “Waktu dunya' kiamat,
kiara raja libudn tidi bunua selatadn.
Sia ngua' nentabm lama biag na haa' na,
pasal ringa' bu' sia bas na ingua' ikidoor ajaardn raja Selomo,
tei' kiara hai lama kati' lobi pa pandi tidi raja Selomo.
32 “Waktu dunya' kiamat,
kiara lama tidi bunua Niniwa.
Siga lama na ngua' nentabm lama biag na haa' na,
pasal ringa' bu' siga lama na bas na timiligud tidi dusa nda,
tei' kiara hai lama kati' lobi pa pandi tidi nabi Yunus.”
Ntelak Ma' Tuakng
33 “Ndara lama masakng lampu nuan naru' atau pudn ngipa' di soig pasu',
tei' lampu na pupugudn di tempak datag,
supaya suhu lama sumuak kiliid telak.
34 Mata nyu sikng lampu nelak guakng nyu.
Bakng mata nyu ntelak,
uhu kiliid meloos.
Bakng mata nyu robor,
nduhu kiliid meloos,
tuakng sei.
35 Undaa'-undaa' nyu!
Dei sampai ntelak di soig guakng nyu tumuang!
36 Bakng guakng nyu ntelak ma' ndara kutuangan di soig guakng nyu,
ina hai singgurua odu nelak dihu.”
Yesus Pesala' Lama Pirisi Ma' Sigu Ugama
37 Pegpungaan Yesus susuad,
kiara lama Pirisi igiit nya minili' miohodn di bali na.
Yesus pudn miniaa' iginohodn.
38 Lama Pirisi na kibunggakng kiliid Yesus miohodn nda' masa' pii' na.
39 Uubm Yesus di lama Pirisi na,
“Asal,
uhu lama Pirisi mubas masa' luar gelas ma' pinggadn,
tei' di soig guakng nyu lobi pa loki' ma' dama'.
40 Uhu bobu!
Itala bas na igbuat di luar ma' di soig hai.
41 Biri nyu na lama miskidn koon tidi soig pinggadn nyu,
supaya guakng nyu kimpia!
42 “Landu' na doot nyu lama Pirisi!
Uhu mori asil tana' nyu di Itala simbatu tidi pulu',
tei' nduhu padul lama ma' nduhu mingisiadn Itala.
Lobi ayad uhu muduli' lama,
ma' mingisiadn Itala,
ma' nda' kilipat mori asil nyu di nya!
43 “Landu' na doot nyu lama Pirisi!
Uhu mingin mupug di bangku' ayad di soig bali simbiangan,
ma' uhu mingin lama ngurmat dihu di keramaian.
44 “Landu' na doot nyu lama Pirisi!
Uhu singgurua lobokng ndara sunduk.
Peglanjakng-lanjakng lama,
pasal nda' mpindiaadn siga lama na.”
45 Kiara simbatu sigu ugama miabat Yesus.
Uubm nya,
“Sigu,
susuad nu ngedama' dihi.”
46 Yesus miabat nya.
“Landu' na doot nyu hai sigu ugama!
Uhu mpesaan lama medoot megat,
tei' nduhu bas timabakng lama na ma' kesa pudn.
47 “Landu' na doot nyu!
Uhu ngayad lobokng nabi ringa' bu' bas peti apu'-odu' nyu.
48 Ina na,
uhu mpebaar bas kerai apu'-odu' nyu.
Siga lama na imati nabi na ma' uhu ngayad lobokng na.
49 Poro' Itala,
pasal kerai nyu,
sia mpiit nabi ma' lama susuruadn nya kindi lama Yuhudi.
Siga lama na ngua' moro' birta tidi nya,
tei' sebagi pitiaadn ma' sebagi luduudn.
50 Ina na,
lama waktu na haa' na dubuadn uhuman,
pasal kipitiaadn kuberaman nabi.
Mulei tidi kipitiaadn ny Abil ringa' dunya' biantur
51 sampai na kipitiaadn n Jikiria di tenga'-tenga' oit bali simbiangan ma' nggien nunu punganyam.
Ou moro' di dihu lama waktu na haa' na dubuadn Itala uhuman pasal kipitiaadn nabi na.
52 “Landu' na doot nyu sigu ugama!
Uhu bas na naru' kunsi' pintu' kipindiaadn,
tei' uhu deirdn nyu nda' mingin kempandi.
Leidn ga ina ga,
uhu nasat lama mingin kempandi kentangan Itala!”