Yesus Ipiit Lama Pegbiaa' Nya, Turu' Pulu' Dua Tuni
10
1 Punga ina Yesus mili' lama turu' pulu' dua tuni pegbiaa' nya.
Inubu' sia ipiit siga lama na dua-dua tuni nggulu tidi deirdn na kindi tiap-tiap bandar ma' kampukng nggien nya ngonong.
2 Nda' pa siga lama na mbiakng ma' nya,
Yesus igsuad di siga lama na.
Uubm nya,
“Ntook na padi,
tei' kurakng lama madi.
Ayad uhu nguduaa di lama sengompu' perook na,
supaya sia piit pa lama suru' nya madi.
(Padi,
ina na sikng lama mingin kidoor birta tidi Itala.
Lama madi,
ina na sikng lama pompot birta tidi Itala.
Ma' lama sengompu' perook na,
ina na Itala.)
3 “Panu uhu na!
Ou mpiit dihu singgurua anak kambikng biri'-biri' di tenga'-tenga' asu toidn.
4 Dei uhu pigiit kupuyu',
pitaha',
atau pudn kasut leidn!
Ma' dei uhu pegsusuad meleid ma' lama metomu nyu di tenga' daidn!
Ayad pa uhu lemombus tanggas.
5 “Waktu nyu sumuak di soig bali na,
bu' pegsuad uhu sikng nti di siga lama na,
‘Itala merahat dihu.’
6-7 Bakng siga lama na senang guakng ma' mingin kidoor birta na,
siga lama na ngkaap berahat.
Uhu mien dia ma' dei uhu pegindur kindi bali leidn!
Bakng siga lama na mmohodn dihu ma' mpinum dihu,
pinginum uhu ga pasal sitiap lama kerai mistii' mohodn.
Tei' bakng nda' nirima dihu,
berahat na ngien tidi siga lama na ma' ibori di dihu.
8 “Ina hai waktu nyu kompot di bandar na,
bakng kiara lama nirima ma' mmohodn dihu,
ohodn uhu ga!
9 Bakng kiara lama kiladu dia,
nua' nyu pekemaa' siga lama na!
Ma' perai nyu di lama dia Itala mpusag pirinta nya di tenga'-tenga' siga lama na!
10 Ina hai bakng ndara lama di bandar na nirima dihu,
kaadn uhu na kindi aludn-aludn ma' perai nyu di siga lama na
11 uhu mapag abuk tidi kaad uai nyu,
supaya siga lama na kintabm ma' kempandi Itala mingin pusag pirinta nya dia,
tei' siga lama na nda' nirima.
12 Intomo' nyu pegodu kiamat Itala lobi pa mingisiadn bandar Sodom tidi bandar nda' nirima dihu.”
13 Uubm Yesus,
“Ou ndoot guakng di lama mien di bandar Kurajin ma' Betsaida,
pasal bas ku na mbuat mbisa dia,
tei' siga lama na nda' ngahudn timiligud tidi dusa nda.
Bakng ou mbuat mbisa di bandar Tirus ma' Sidun,
siga lama na timiligud tidi dusa nda sampai mahi baju' romuk ma' nguluukng deirdn nda ma' abu.
14 Pegodu kiamat,
Itala lobi mingisiadn lama Tirus ma' Sidun tidi lama Kurajin ma' Betsaida.
15 Ina hai lama di Kepernaum mpihir deirdn nda kompot di suruga',
tei' nda'.
Itala asal ngedabu' siga lama na di neraha'.”
16 Yesus susuad di lama pegbiaa' nya,
“Esi-esi ga lama kidoor susuad nyu,
sia kidoor susuad ku hai.
Ma' esi-esi ga nda' nirima dihu,
nda' nirima diaadn kai.
Ma' esi-esi ga nda' nirima diaadn,
sia pudn nda' nirima Itala.”
Lama Pegbiaa' Yesus Turu' Pulu' Dua Tuni Na Pibelik
17 Na lama bas piniit Yesus,
turu' pulu' dua tuni na pibelik kindi nya.
Siga lama na senang guakng.
Uubm siga lama na,
“Guruadn,
kuakng pudn miaa' pirinta mi,
bakng ihi nula' ngaardn nu.”
18 Yesus igsuad di siga lama na,
“Bas ku na ikiliid kupala kuakng inala ma' ndabu' tidi langit singgurua minyait.
19 Pikidoor uhu na!
Bas ku na mori dihu kuasa lemanjakng ulakng ma' tingaang.
Uhu ngkaap ngala musu nyu ma' ndara esi-esi pudn ngkaap ngeladu dihu.
20 Dei uhu na senang guakng pasal kuakng na miaa' pirinta nyu!
Ayad pa uhu senang guakng pasal ngaardn nyu kiara sinuart di suruga'.”
Yesus Senang Guakng
21 Waktu ina Yesus senang guakng.
Sia kimosog ga' Midua Itala.
Inubu' sia nguduaa.
Uubm nya,
“Ama',
ou mantug diha.
Aha na mirinta langit ma' dunya' nti.
Bas nu na nuud lama ndara pengelaman medadi kempandi,
tei' ndaha nuud lama kiara pengelaman kempandi.
Ama',
ina na kendahadn nu.”
22 Uubm Yesus di lama dia,
“Nentaadn na kipindiaadn bineri ny Ama' di diaadn.
Ndara lama ketondu' diaadn bakng nda' si Ama'.
Ndara hai lama ketondu' ny Ama' bakng ndou moro'.”
23 Nubu' Yesus inginonong lama pegbiaa' nya deirdn nda ga dia.
Uubm nya,
“Ayad uhu senang guakng,
onu ga bas kinidadn nyu.
24 Ou moro' di dihu mbarabm nabi ma' raja ringa' bu' mingin kidoor ma' kiliid onu ga bas na ndengoordn ma' inidadn nyu,
tei' siga lama na nda' na ikaap kidoor ma' kiliid.”
Susuad Ndalabm Lama Samaria Mpia
25 Kiara sigu ugama ingua' inginam imasukng Yesus.
Uubm nya,
“Sigu,
pungga' ga' ku ngkaap kibiagadn seleid-leid na?”
26 Yesus miabat,
“Onu gisi sinuart di soig Kitab?
Pungga' gisi pihiardn nu?”
27 Uubm lama na,
“Nua' na mingisiadn Itala ma' nentaadn na guakng nu,
nentaadn na pihiardn nu,
ma' nentaadn na kekosogodn nu!
Ma' aha mistii' mingisiadn nentaadn na munusia' singgurua deirdn nu hai.”
28 Uubm Yesus,
“Baar na susuad nu na.
Biaa' na susuad ina,
supaya aha ngkaap kibiagadn seleid-leid na!”
29 Tei' lama na ngegaga ma' kimuat Yesus.
Uubm nya,
“Esi gisi lama nuan ku mingisiadn?”
30 Yesus miabat lama na.
Uubm nya,
“Kiara lama Yuhudi tidi bandar Yurusalam kindi bunua Yiriku.
Di tenga' daidn na sia riampas medoot ma' liabas.
Sia liadu sampai setanga' mati ma' tietak dia.
31 Inubu' kiara lama pegogot ugama Yuhudi limalu dia,
tei' set nya ga ikiliid ma' limolig di seborokng daidn na.
32 Ina hai kiara lama tidi paan Lewi limalu dia,
tei' set nya ga kimingad ma' ikiliid.
Nubu' sia limalu.
33 “Punga ina kiara lama tidi bunua Samaria ipanu dia.
Pegliid nya lama na,
sia mingisiadn nya baar-baar.
34 Inubu' sia ingua' lama na ma' inguru damat nya.
Pegpunga ina,
sia ingelobod damat na.
Nubu' sia ipeselehei lama na di arag keledai nya.
Inubu' iniit kindi bali sewa nggien nya nguru.
35 Pegsikng suub,
sia imori dua nggiab siidn pirak di lama sengompu' bali na.
Uubm nya,
‘Nua' na muduli' lama nti!
Ma' nua' na nguru!
Pebalik ou kinditi malik ma' ou biaar onu ga bas biniaardn nu adi nya.’ ”
36 Nubu' Yesus ikimuat sigu ugama na,
“Onu pihiardn nu?
Lama tolu tuni na,
esi gisi mingisiadn lama riumpak na?”
37 Uubm sigu ugama na,
“Na lama bas muduli' nya.”
Uubm Yesus di nya,
“Panu na!
Biaa' na singgurua ina!”
Yesus Kindi Bali I Marta Ma' I Miria
38 Waktu Yesus ma' lama pegbiaa' nya di soig pemenoon,
sia ikompot di simbatu bunua.
Dia kiara libudn,
ngaardn nya si Marta.
Sia ngujumput Yesus kindi bali nya.
39 Si Marta kiara pusud libudn,
ngaardn nya si Miria.
Si Miria miupug di sodi uai Yesus,
sembela' nya kidoor ajaardn nya,
40 tei' si Marta merogo kerai di soig bali na.
Ina na,
sia mususaadn deirdn na ga kerai.
Inubu' sia ingua' Yesus.
Uubm nya,
“Guruadn,
aha nda' padul diaadn kerai deirdn ku?
Surua' na pusud ku temabakng diaadn kerai!”