Yesus Biag Melik
16
1 Pegpunga odu simbiangan,
si Miria tidi bunua Megdelena,
ma' Seluma,
ma' indu' Yusas imoli amut nggien ngamut banggi Yesus.
2 Kahal pa sarap odu ari minggu' na set ga limuas mata odu ipanu na siga lama na ngua' ngahap lobokng na.
3 Atakng siga lama na di tenga' daidn,
siga lama na pudn nigsuad deirdn nda,
“Esi ga bila' nuud dihiti ngulubid indu' gia batu tidi bobo' lobokng na?”
(Siga lama na nigsusuad oo' nga rua,
pasal batu na landu' gia ma' siga lama na nda' kegoos ngulubid.)
4 Pegdatakng di lobokng na,
siga lama na ikiliid batu lulubid na tidi bobo' lobokng na.
5 Siga lama na pudn simuak di soig na.
Pegsuak siga lama na,
ikiliid kenahadn gugupug di sembela' kuaan.
Sia nigbaju' puti' ma' siga lama na pudn ikondog baar-baar.
6 Uubm nya,
“Dei uhu kolok!
Ou pandi dihu ngirubm Yesus tidi bandar Nejarat.
Sia bas na sialib di kiou.
Kida' nyu gulu ndaardn na hati',
sia biag melik.
Nti na bas nya pinilakng.
7 Na haa' na kaadn uhu na kindii!
Perai nyu di lama pegbiaa' nya ma' i Petrus kai,
sia igulu tidi siga lama na kindi bunua Gililia nggien temomu siga lama na,
sikng bas na sinisuad nya di siga lama na!”
8 Nubu' si Miria ma' siga ibal na limuas tidi soig gogu' batu na ma' irari iggolok ma' igisik onsi.
Siga lama na nda' imoro' lama ma' simbatu pudn pasal gegolok baar-baar.
Yesus Ipiliid Deirdn Na Di I Miria Tidi Bunua Megdelena
9 Pegbiag Yesus melik rigiodu ari minggu' na,
sia bu'-bu' ipiliid deirdn na di Miria tidi bunua Megdelena.
Sia bas na ipuhad kuakng turu' tidi nya.
10 Pegliid i Miria Yesus,
sia ingua' imoro' di lama pegbiaa' nya kahal pa temeis ma' susa guakng.
11 Pegdoor siga lama na Yesus biag melik ma' bas na ipiliid deirdn na di i Miria,
siga lama na nda' pisiaa onu ga sinisuad i Miria.
Yesus Ipiliid Deirdn Na Di Lama Pegbiaa' Nya Dua Tuni
12 Punga na ina Yesus ipiliid deirdn na di lama pegbiaa' nya dua tuni,
atakng siga lama na ipanu kindi bunua leidn.
Bu'-bu' siga lama na nda' ketondu' nya.
13 Pegtondu' siga lama na nya,
siga lama na pibelik ingua' imoro' lama pegbiaa' nya leidn,
tei' na siga ibal nda' pisiaa.
Yesus Ipiliid Deirdn Na Di Lama Pegbiaa' Nya Pulu' Esa Tuni
14 Punga na ina Yesus ipiliid deirdn na di lama pegbiaa' nya pulu' esa' tuni.
Atakng siga lama na iginohodn,
sia ingua' igerampus siga lama na,
pasal siga lama na nda' pisiaa sia biag melik,
walaupudn lama bas na ikiliid deirdn na ma' imirta kentangan deirdn na.
15 Inubu' sia igsuad di siga lama na.
Uubm nya,
“Panu uhu na kindi nentaadn na bunua di dunya' nti!
Nua' nyu mpompot birta mpia nti kindi nentaadn na munusia'!
16 Esi-esi ga pisiaa birta mpia nti ma' punsuudn,
siga lama na nuan Itala nelamat.
Esi-esi ga nda' pisiaa,
dubuadn Itala uhuman,
pasal dusa siga lama na.
17 Esi-esi ga pisiaa di diaadn,
biriadn ku kuasa mbuat mbisa.
Siga lama na ngkaap mpuhad kuakng nabut ga ngaardn ku.
Siga lama na pudn ngkaap susuad uubm leidn biriidn Itala.
18 Bakng siga lama na ngkogot ulakng atau pudn ngkinum rasudn,
siga lama na ndara onu-onu.
Ma' ngkaap pekemaa' lama nuan ga neronggodn ma' lama na pudn kemaa'.”
Yesus Inanggat Kindi Suruga'
19 Yesus na Itala.
Pegpunga Yesus igsuad ma' lama pegbiaa' nya,
sia inanggat kindi suruga'.
Dii na sia miupug di sembela' kuaan Itala nggien mbiaa' mirinta.
20 Nubu' lama pegbiaa' nya kindi nentaadn na bobo' bunua nggien ngua' mpompot birta tidi Itala.
Siga lama na biniriadn Itala kuasa nggien mbuat mbisa,
supaya lama pisiaa baar-baar birta na tidi Itala.