Yesus Simuak Bandar Yurusalam
11
1 Yesus ma' lama pegbiaa' nya mingad na Yurusalam.
Siga lama na limalu na bandar Baitpagi ma' bandar Baitani.
Miatakng na di Buig Jaitun,
nubu' Yesus ipiit lama pegbiaa' nya dua tuni igulu.
2 Uubm nya,
“Panu uhu na!
Kaadn uhu na di bunua kuii' tingguangan nyu na!
Pegdatakng nyu dia,
uhu kiliid anak keledai sisigat dia.
Nda' pa bas inanu lama miudadn.
Iada' nyu!
Uta' nyu kinditi!
3 Bakng kiara lama kimuat dihu man rati uhu nggiit anak keledai na,
perai nyu Itala mingin mudadn,
tanggas hai nuan nyu pupuli'.”
4 Lama pegbiaa' Yesus dua tuni na pudn ipanu na.
Pegdatakng siga lama na dia,
ikiliid anak keledai na sisigat di daidn mingad di sodi bali lama ma' siga lama na ingiad.
5 Atakng siga lama na ngiad,
kiara lama dia ikisipat.
Uubm lama na,
“Man rati pa' iniad nyu?”
6 Siga lama na miabat onu ga bas sinisuad Yesus.
Lama na pudn nda' na puduli' siga lama na igiit anak keledai na.
7 Pegdatakng keledai na di Yesus,
siga lama na ingelapik arag keledai na ma' kumut nggien Yesus miudadn.
8 Barabm lama ingelad kumut nda di daidn na ma' kiara hai lama ingai pelapa' ngipa' di daidn na,
pasal siga lama na ngurmat Yesus miatakng dia singgurua raja.
9 Barabm lama di puguluadn ma' di kimidiadn.
Yesus ipanu di tenga'-tenga',
sembela' siga lama na igkapak mantug Itala.
Uubm siga lama na,
“Sia na nti miatakng ma' kuasa Itala.
10 Itala pudn mori berahat di nya,
pasal sia mirinta dihiti singgurua raja Daud,
apu'-otud ti.
Itala mpia baar-baar.”
11 Yesus ikompot di Yurusalam.
Sia simuak di bali migia nggien simbiaakng na,
set nya nginonong gibakng kuaan nya sei.
Sia limuas tidia tanggas,
pasal bunua gibiidn na.
Mili' kindi Baitani ma' lama pegbiaa' nya,
pulu' dua tuni.
Yesus Inumpa Puudn Nunuk
12 Sikng suub rigiodu Yesus ma' lama pegbiaa' nya pibelik kindi Yurusalam tidi Baitani.
13 Atakng siga lama na ipanu,
sia mudapadn ma' ikiliid nunuk tidi modu'.
Sia ingua' kimingad ikiliid bakng kiara bua',
tei' ndara bua' doudn sei,
pasal leidn ga musibm bua'.
14 Nubu' Yesus igsuad di puudn nunuk na,
“Ndaha mbua' malik tidi na haa' na sampai seleid-leid na!”
Lama pegbiaa' nya ikidoor susuad nya.
Yesus Simuak Di Soig Bali Migia Nggien Simbiaakng
15 Pegdatakng Yesus di Yurusalam ma' lama pegbiaa' nya,
sia simuak di bali migia nggien simbiaakng na.
Sia ikiliid lama igbedagakng medoot dia.
Inubu' sia ingua' nunsub siga lama na ma' ipeloub mija' nggien igtuhar siidn ma' bangku' nggien peboli egsakng.
16 Ma' sia mpeberanti lama nggiit medoot sumuak di bali simbiangan na.
17 Pegpunga ina,
sia ngira' lama dia.
Uubm nya,
“Kiara susuad di Kitab:
‘Bali nti nggien nentaadn na bangsa nguduaa.’
“Tei' uhu bas na nuhar bali nti nggien nyu nipu lama!”
18 Kiara kupala lama pegogot ugama ma' sigu ugama ikidoor susuad na.
Siga lama na ngirubm daidn nggien mmati Yesus,
tei' siga lama na molok nya,
pasal barabm lama kibunggakng baar-baar ajaardn na.
19 Peggibiidn,
Yesus ma' lama pegbiaa' nya miuhad tidi bandar na.
Pelajaardn Tidi Puudn Nunuk Na
20 Sikng suub rigiodu Yesus ma' lama pegbiaa' nya limalu ma' ikiliid puudn nunuk na meti na sampai pahat.
21 Inubu' si Petrus ikintabm susuad Yesus.
Uubm nya,
“Guruadn,
kida' gulu puudn nunuk na meti na.
Siumpa nu kirab.”
22 Uubm Yesus,
“Pisiaa uhu na di Itala!
23 Pigintabm uhu na!
Esi-esi pisiaa di Itala baar-baar ma' nda' separu-separu,
sia ngkaap susuad di buig nti,
‘Pegindur na kindi loud!’
Buig na pudn nggindur.
24 Ina na,
ou moro' di dihu mipa'-mipa' nyu ga nguduaa,
uhu mistii' pisiaa Itala mori onu ga kibiriidn nyu.
25 Bakng uhu mulei nguduaa,
esi-esi ga kidusa di dihu,
uhu mistii' ngampudn nya,
supaya Itala,
Ama' ti di suruga',
ngampudn dihu hai.
26 Bakng uhu nda' ngampudn lama kisala' di dihu,
Ama' ti di suruga' pudn nda' ngampudn dihu hai.”
Kimuatadn Tangga Yesus Kaap Kuasa
27 Yesus ma' lama pegbiaa' nya pibelik kindi Yurusalam melik.
Atakng nya ipanu di soig bali migia nggien simbiaakng na,
kiara kupala lama pegogot ugama,
ma' sigu ugama,
ma' kutua' lama Yuhudi ingua' nya ma' ikimuat.
28 Uubm siga lama na,
“Esi mori diha kuasa nunsub lama tidi bali simbiangan nti ma' esi gisuru' diha mbuat oo' nga rua?”
29 Yesus miabat,
“Ou pudn kimuat di dihu simbatu susuad sei,
bakng maap nyu mabat.
Bakng nda',
ndou moro' dihu tangga hu kuasa mbuat oo' nga rua.
30 Tangga gisi ny Yohanes kaap kuasa mmonsu' lama,
tidi Itala atau pudn tidi munusia'?
Ebata' nyu!”
31 Nubu' siga lama na igpihir.
Uubm siga lama na,
“Bakng kiti moro' tidi Itala,
bengkali sia kimuat dihiti man rati kiti nda' pisiaa ny Yohanes,
32 tei' kiti nda' kaap moro' tidi munusia'.”
Ina na,
siga lama na suad oo' nga rua pasal molok barabm lama munu' deirdn nda ga' nda' pisiaa di ny Yohanes ina nabi.
33 Ina na,
siga lama na imoro' di Yesus,
“Ndihi pandi.”
Uubm Yesus,
“Ou pudn nda' moro' di dihu esi mori diaadn kuasa mbuat oo' nga rua.”