Dyos kititani Pawlos ka masewalme amo yudiyo'
3
Yok nika newal, Pawlos, ni'onka tatsakwal kampa nitekipanol Yehshwa-Kristo ika kwal ka anmehwante amo kat yudiyo'. 2 Anmehwante antakakik kampa Dyos ka nitasotalisteWe onishmak in tekipanoliste pa anmishpalewis anmehwante. 3 Dyos onishmashti in ten kitatitikatkaya pa kichiwaskya in amo'ak kimatiya, kina ta'ishpa annimishtakwihkwilolil tipit. 4 Ta anmomashtik in, ten annimishkwihkwilil, ankimatiske kina nihmat in ten kitatitikatkaya pa kichiwaskya Dyos in yewal amo'ak kimatiya inak Kristo, 5 kampa Dyos amo okinmashtil inik yehwante yoliloya ta'ishpa kwah ayamo tikatkaloya in ten kitatitikatkaya, ma yok ashka Dyos okinmashti ka inik yehwante nita'onanalme in tatitanilme wan niTaketsalme nitahtolmeDyos ika ni'Espiritu. 6 In yewal ten kitatitikatkaya pa kichiwaskya in amo'ak kimatiya: inik amo yudiyo' konanaske niyok nitakawaliste Dyos yok kina inik yudiyo', in ankat moshte omente pa se han nikwerpo Kristo, wan kipiyaske nitatinewiliste Dyos yewal okichi pa Yehshwa-Kristo ika nitamashtilisteKwal.7 Ka in nitamashtilisteKwal onishmak Dyos tekipanoliste. Ina yewal nitemakaliste Dyos onishmak ka nitasotalisteWe, yok nichikawaliste tekipano ipa newal. 8 Newal nika akyewal amo wenimonots kina inik oksek pa moshte nita'onanalme nitekipanolme Dyos, ma yok kwal onishihnil Dyos pa nikinnawatis yehwante amo yudiyo' in nitamashtilisteKwal yewal kipi miyak tamashtiliste pa Kristo wan yewal amo'ak kwal kipowas. 9 Wan niyok onishtake pa annimishmashtiskya mochi, in yewal ten kitatitikatkaya pa kichiwaskya Dyos in amo'ak kimatiya, kampa yewal, kitatitikatkaya pa kimani ayamo kipewaltiyaya in mochiten ta'onka, kampa yewal okichi mochiten. 10 In opan pa yehwante moshte inik patrone' pa taneltokal wan nichikawaliste pa inik kaha takpakIlwikak pa ki'ishmatiloskya nitamatiliste Dyos kina han, pa ika taneltokalme. 11 Hanwel in okital Dyos kwah ayamo'ok kipewaltiyaya mochiten wan okichi ika toTats Yehshwa-Kristo. 12 Kampa titaneltokal pa Kristo, tikpiyal tamakawaliste pa timo'asiltiske ka Dyos amo tikpiyaske tamaptiliste. 13 Ma yok annimishtahtani pa amo'ik anmomakawaltiske ika in ten nipanotik ka in yolkokoliste pa anmehwante, hanwel, in yolkokoliste yes se tanotsaliste kwal pa anmehwante.
Nitasotaliste Kristo
14 Kampa yok nimotankwakets pa niktahtoltis i'ishpa niTATS in toTats Yehshwa-Kristo, 15 ininTats moshte inik kishki kat pa in takpakIlwikak wan pa in tal kampa yewal okinchi. 16 Wan yewal niktahtani in ten miyak tapi ka nitawiliste pa anmishmakas anmehwante chikawaliste pa anmoyolme ika in Espiritu, 17 kampa ka anmotaneltokaliste pa Kristo ma yol pa anmoyolme. Wan nitahtani kampa ma ye ninelwa wan nitakon ka tasotaliste, 18 yok ankwal ankimatiske ankikakiske inawak ka moshte inik nita'onanalme nitekipanolme Dyos kishki patawak wan weyak, kishki takpak wan wehkat yok we tishtasot Kristo. 19 Wan yok ki'ishmatiske nitasotaliste in Kristo, kampa in hyero we kitanili mochi kishki totamatiliste wan yewal kichi kampa mochi pa yes tatamilme wan kintemiltili mochiten moteshmonektiyas.
20 Dyos ma tikipan ipa tehwante ka nichikawaliste, yewal kwal pa kichiwas ka nichikawaliste in ten hyero miyak in yewal tehwante amo'ik pa titahtaniloskya wan amo'ik pa tihmatiloskya tihkakiloskya. 21 Pa kishki tonatim wan pa hanse ma tiktahtoltitiyak Dyos, tehwante inik taneltokalme wan tikat inak Kristo-Yehshwa! Yok ma ye.