Petros wan Yuhanes ininishpa yehwante inintanichikolme wehwetatakewalme yudiyo'
4
Kimani Petros wan Yuhanes tahtotikatkaloya inak in masewalme,
walak sek TotatsimWehwe,
wan in nikapitan in tyopWe wan sek saduseyo'.
2 Hyero kwalantikatkaloya kampa in tatitanilme taneshtililoya pa in pweblo,
taketsaloya kampa Yehshwa yoliyaya oksep pa in mihmihke.
3 Kinkitskik yehwante wan kintsakwak kina katka tyotak ompa kinkawak pa mostatik.
4 Ma yok myak masewalme inik kikakiloya nitahtolmeDyos taneltokaloya;
wan tapowalme han katkaloya inik takam,
katkaloya kina makwil mil yehwante taneltokaloya pa Kristo.
5 Pa mostatik monichikok pa Yerushalém inik niwetatakewalme yudiyo',
wan inik Abwelolme Wehwetsim wan inik niTamashtinilme NitanawatilMoshé;
6 niyok ompa ka yehwante katkaloya in toTatsWe Hanás wan Kaypas,
Yuhanes,
Alesandros wan moshte inik kishki katkaloya nikolinchim ka inik TotatsimWehwe.
7 Petros wan Yuhanes okinketsak ipanta pa kintahtanililoskya:
—Ika ak nichikawaliste wan nitatakewaliste ankichiwak anmehwante in?
8 Kwakin Petros,
oye tatimiltil ka in EspirituSanto,
kinmili:
—Niwehwetatakewalme in pweblo wan Abwelolme Wehwetsim pa Isra'el:
9 kampa ashka antishtahtanilitikat ka in ten kwal tikchiwilik in takat kokoshke,
pa momatis kina oye tapahtil,
10 Shihmatik anmehwante,
wan mochi in pweblo Isra'El,
nika onka anmo'ishpa anmehwante yewal oye tapahtil ka ni'itokaliste Yehshwa-Kristo in nasareteko,
in anmehwante ki'ilpik pa se Kruskwawit.
Ma yok,
Dyos okiyolti oksep pa in mihmihke.
11 Ina yewal in tet,
in yewal amo ankinekik ankitalik anmehwante ankichiptikatkaloya in kal,
ma yok in tet omochi nitsontek mochi in kal.a
12 Hanwel pa Yehshwa onka takistiliste pa toyoliliste.
Amonka okse itokaliste pa in mochital pa kati yewal inik masewalme pa yeloskya takistiliste pa in poliwiliste.
13 Inik wehwetatakewalme motapololtiloya kampa kinmitaloya kina amo tamakasiloya pa tahtoloskya Petros wan Yuhanes,
yehwante katkaloya takam kampa amo motaneshtililoya pa takwihkwiloloskya,
ma yok yehwante okimatik kampa oyek inak Yehshwa.
14 Wan niyok moketstikatkaya in takat ka yehwante yewal oye tapahtil,
wan amo kipiyaloya ten amokwal pa kitoloskya inak in yewal.
15 Kwakin kintakewak pa kisaloskya yehwante pa in kaha tahosgaroloya in tanichikolme tatakewalme wan taketsaloya yehwante ten kwal pa kichiwaloskya.
16 —Ten tikinchiwiliske inik takam?
Moshte pa Yerushalém kimatil kampa kichiwak se taneshtiliste,
kampa melak ka in amo nehnemiya wan amokwal pa tikitoske kampa amoyok.
17 Ma yok pa yahmo momashtitiyaloskya inik masewalme isra'elita' ika ten kipano in takat,
ma tikinmaptik ka tahtolme chikawak pa yahmo taketstiyaske ka ni'itokaliste Yehshwa pa amo'ak.
18 Kwakin kinnotsak,
Petros wan Yuhanes wan kintakewak pa yahmo taketstinemiloskya wan yahmo tamashtitinemiloskya ka ni'itokaliste Yehshwa.
19 Wan otanankilik Petros wan Yuhanes kinmilik yehwante:
—Ta kwal katka pa ni'ishpa Dyos pa timishneltokaske anmehwante ma yok amo tihneltokaske ta'ishpa Dyos.
20 Kampa tehwante amokwal pa tihkawaske pa titaketsaske in mochiten yewal tikitak wan tihkakik.
21 Wan yehwante kinmaptiloya ka tahtolme chikawak,
wan kinmakawak.
Amo okitak kina pa yeloskya takokolilme,
kampa kwalaniloskya in masewalme kampa moshte kililoya tahtolme wehwe pa Dyos ka in ten panowaya.
22 Pa yewal oye taneshtiliste kwah oye tapahtil mopanoltiyaya in 40 shiwim.
In taneltokalme kitahtoltiloya Dyos pa kinpalewiskya
23 Kimani oyek tamakawalme Petros wan Yuhanes oyak kampa katkaloya ninihniwan,
kintakichilik mochiten yehwante kinmililoya inik TotatsimWehwe wan inik Abwelolme Wehwetsim.
24 Kwah yehwante okikakik in,
wan moshte ka se tahtaniliste wehwe kitahtoltiloya Dyos,
wan kitoloya:
—TatsDyos,
otikchi in takpakIlwikak,
wan in mochital,
wan in wehwe'atim wan mochiten onka pa in mochital.
25 Tewal,
ika in EspirituSanto tikito pa ikamak Dawid,
motekipanol:
Pates inik masewalme mo'onanal pa se pweblo' ika okse pweblo',
wan yehwante masewalme kichiwal ten yewal amo monots?
26 Inik weReye' pa in tal,
wan wehwetatakewalme monichikoloya pa mochiwililoskya se taketsaliste
pa momiktiloskya ika in TATS wan ika niKristo.
27 ’Wan melak monichikok nika pa Yerushalém in weRey Herodes wan Pontyus Pilatos ka in masewalme amo yudiyo' wan nimasewalme Isra'El,
pa ika moTikipanol ta'onanal Yehshwa,
yewal tiktahtolti pa yeskya in Kristo.
28 Yehwante kichiwaloya yok kina tewal tiktaliyaya pa panoskya;
mochi in yewal opan ka mochikawaliste kampa yok otiktal pa yok motachiwaskya.
29 Wan ashka,
TATS,
shikit kina kinmaptitikat yehwante,
wan shikinmak motekipanolme pa tamashtiske motahtolme pa amo kipiyaske tamaptiliste,
30 ma yok,
shihmela momahwa pa mopahtiske kokoshkim wan pa moneshtiske tachiwaliste wan mochiwaske taneshtiliste ka tapololtiliste ka ni'itokaliste moTikipanol mota'onanal Yehshwa.
31 Kimani tamik kitahtoltik Dyos,
kwakin omolin tal ompa kaha nichikotikatkaloya;
wan moshte oyek tatimiltilme ka in EspirituSanto,
wan taketsaloya nitahtolmeDyos wan amo tamakasiloya.
Inik taneltokalme motemakaloya ininyashka
32 Wan moshte inik taneltokalme,
kipiyaloya se han tamatiliste pa ininyolme.
Amo'ak kitowaya kampa katkaya pa iselte in ten kipiyaloya,
kampa in ten kipiyaloya katka pa moshte yehwante taneltokalme.
33 Wan ka chikawaliste taketsaloya nitahtolmeDyos in tatitanilme kampa yehwante yoliloskya oksep ka in Tats Yehshwa,
wan nita'ihniliste Dyos ma kinmashti miyak ipa moshte yehwante.
34 Wan amo'ak katkaya ka yehwante yewal amoten kipiyaya,
kampa moshte kishki kinpiyaloya inintalme wan ininkalme kinnamakaloya,
wan in tomi yewal tanamakaloya kinwikililoya
35 wan kinmakaloya inik tatitanilme,
in tomi pa kinmakaloskya kina kinteshmonekya pa sesen.
36 Katkaya se itoka Yosé,
yehwante inik tatitanilme kitokayoltiloya BarNabás,
in kinek kito,
yewal masewal tayolsewi,
katka lewita,
otakat pa Kipros;
37 yewal kipiyaya se kwahmil okinamak wan okinmak tomi in tatitanilme.