―Notats wan nonohniwan walkisak pa tal Kanán wan asik pa in tal Goshen ka ininyolikilme,

sek tanichikolme wehwe ka chibo',

borrego' wan baka' ka mochi niyashka.

2 Kinonan Yosé makwil ninohniwan wan kinwalik pa ni'ishpa para'ó.

3 Kinmili para'ó ninohniwan Yosé:

―Ten tikipanoliste ankimatil?

Yehwante kinankilik para'ó:

―Tehwante motikipanol titakwitawilme tanichikolme ka yolikilme yok kina towichalme yehwante mikik tishkawilik.

4 Niyok kilik para'ó tiwalak pa timochantiske nika kampa onka miyak mayanaliste pa Kanán,

amo onka sakat pa niyolikilme motikipanolme.

Kampa mayanaliste hyero we!

Timishtahtanil kampa titishmakas pa timochantiske pa in tal Goshen.

5 Para'ó kili Yosé:

―Motats wan monohniwan ashka walak ka tewal.

6 Wan in tal Egipto pa mo'ishpa onka tewal.

Shikinmak motats wan monohniwan pa in tal kwal,

ma mochantik pa Goshen.

Ta tihmat ta ka yehwante kat sek kimatil takwitawil yolikilme,

kwakin shikintal pa yeske notatakewalme pa noyolikilme.

7 Yosé kiwik niyok Yakob,

nitats kaha para'ó,

pa ki'ishmatiskya wan Yakob kimashti para'ó.

8 Kwakin para'ó kitahtanili Yakob:

―Kishki shiwim tikpi?

9 Yakob kinankili para'ó:

―Newal nikpi 130 shiwim niyaptinem nika nepa amo myak shiwim nikpi pa niyoltik wan inik shiwim amokwal onipan,

ayamo'ok nikashilti pa niyolis kina ininyoliliste nowichalme yehwante mikik,

pa inik tonatim yaptinemil nika nepa.

10 Kwakin Yakob kimashti para'ó,

wan okis pa ni'ishpa.

11 Yok Yosé kinmak nitats wan ninohniwan talme pa Egipto,

in tal kwal amoyok kina oksek talme kaha ta'itok Ramsés,

kichi kina kili para'ó.

12 Niyok Yosé kinmakaya takwaliste ninohniwan,

pa moshte nikal nitats,

pa kishki myak ininpilwam katkaloya pa sesen nikal.

13 Amo katka ten kikwaloskya,

pa mochi in tal kampa katka miyak mayanaliste pa Egipto wan pa Kanán.

Amo kipiyaloya ten kikwaloskya,

miktiyaloya ka mayanaliste.

14 Yosé kinichiko mochi in tomi pa in tal Egipto wan pa tal Kanán,

kampa kinamakaya trigo wan yewal kitashtawililoya in tomi kiwalikaya pa nikal para'ó.

15 Kwah yahmo katka tomi pa egiptiyo' wan pa Kanán,

kwakin walak moshte egiptiyo' kaha Yosé kilik:

―Shitishmak ten tikwaske!

kampa timikiske pa mo'ishpa kampa amo tikpiyal tomi?

16 Wan kinmili Yosé:

―Shikinwalikak anmoyolikilme,

annimishmakas ten ankikwaske kampa antashtawaske ka anmoyolikilme.

17 Yok kiwalikilik Yosé ininyolikilme,

wan kinmak ten kikwaloskya,

tashtawak ka ininkabayo',

ininborrego',

ininchibo',

ininbaka' wan ininburro',

yok Yosé in egiptiyo' kinnamakiltiyaya ten kikwaloskya yehwante tashtawaloya ka nitanichikolme yolikilme.

18 Kwah otam in shiwit walak ka Yosé oksep pa okse shiwit kilik:

―Amo tikpiyal ten,

kampa otam totomi wan toyolikilme.

Amo tikpiyal amoten pa timishmakaske,

hanwel tokwerpo tonakayo wan totalme.

19 Kampa timikiske mo'ishpa ka tewal wan ka totalme niyok?

Shitishko tehwante wan totalme.

Pa yok tishmakas ten tikwaske.

Tehwante wan totalme tiyeske inintikipanolme para'ó.

Hanwel shitishmak shinashte,

pa yok tiyoliske wan yok in tal amo mo'ihtakos wan mokawas tawak!

20 Kwakin Yosé kinkowili mochi in talme pa Egipto,

wan yok oye kina mokawil mochi in tal para'ó moshte in egiptiyo',

kinnamakak inintalme kampa mayanaliste katka chikawak ipa yehwante,

21 wan yok Yosé kintikipanolti inik egiptiyo' pa itenko in mochital Egipto,

han itenko analko.

22 Amo kiko nitalme in totatsim.

Yehwante amo kinnamakak inintalme,

kampa totatsim takwaloya ka nitomi para'ó,

amo monekya pa kinnamakaloskya inintalme.

23 Wan in egiptiyo' kinmili Yosé:

―Annimishko anmehwante wan anmotalme pa anyeske niyashka para'ó,

ashka nika onka shinashte pa yok tatokaske.

24 Pa sesen makwil kostal se han ka in tapishkaliste kimakaske para'ó.

In oksek nawi kostale' ka in tapishkaliste yeske pa anmehwante,

pa yok tatokaske in talme wan ka kintamakaske yehwante mochantilme pa anmokal wan pa takwaske anmopilwam.

25 Yehwante kinankilik:

―Tewal tishwalkwepil toyoliliste!

Ma tiyek inintikipanolme in para'ó!

26 Yok kina Yosé okital tahtoliste pa mochital Egipto pa kimakaloskya para'ó.

Pa sesen makwil kostal se han ka in tapishkaliste,

wan pa ashka in tahtoliste kipiyal pa yok kichiwaske.

Hanwel in talme ka in totatsim amo temakaloya in sesen makwil kostal,

kampa amo katkaloya pa para'ó.

27 Wan yok ye kina moka mochantiti Isra'El pa in tal Egipto,

pa in pweblo Goshen.

Ompa mokowilik kwahmilme,

wan kinpiyaloya ininpilwam wan momiyaptik hyero myak.

28 Wan mochanti Yakob 17 shiwim pa Egipto,

yolti pa 147 shiwim.

29 Kwah astiwalaya in tonat pa mikiskya Isra'El,

okinots Yosé nikon wan kili:

―Ta melak tinishtasot,

shiktal momahwa itsinta nopyerna wan shinichil motahtol ka ni'itokaliste Dyos.

Kampa tinishchiwilis kwal ka ta'ihniliste wan melak nimishtahtani amo shinishtapach pa Egipto!

30 Kwah nimosewis ompa kaha nowichalme yehwante mikik,

shinishwik pa kiyawak Egipto,

shinishtapach kaha yehwante tapachotikat.

Kili Yosé:

―Nikchiwas kina tinichilitik.

31 Isra'El kito:

―Shinishmak motahtol ka ni'itokaliste Dyos!

Kwakin Yosé kimak se tahtol ka ni'itokaliste Dyos,

kwakin Isra'El motankwakets kaha westotikatka.