―Shimokwepak,

wan shiyak shihkowak oksep trigo pa titakwaske.

3 Wan Yehudá tanankili:

―Wan yewal takat otichil ta amo ankwalikal anmonohni tipichi,

amo shiwalak shichitak.

4 Ta tiktitan tonohni ka tehwante,

titemoske timishkowiliske trigo.

5 Ta amo tihnek tiktakewas amo titemoske.

Kampa in takat tichili amo annimichitas ta amo ankwalikal ka anmehwante.

6 Kwakin kito Isra'El:

―Pates yok okilik kampa ankipiyaloya okse takat anmonohni?

7 Yehwante tanankilik:

―Kampa tishtahtanili in takat ka myak tahtolme ka tehwante pa tokal.

“Yoltik anmotats?

Tishtahtanili:

Ankipiyal okse anmonohni?”

Tihnankilik ten tishtahtanilitikatkaya.

Kina tihmatiloskya kampa yewal tichiliskya shihwalikak anmonohni?

8 Kwakin Yehudá kili Isra'El:

―Shiktitan takatYankwik ka newal wan ma tiyaptiyak,

kampa yok tewal wan topilwam tiyoliske amo timikiske.

9 Newal nihkwitawis;

pa amoten kipanos yewal.

Newal tinishtahtanis in tapowaliste ten panos,

ta amo nimishwalkwepil nika kaha tikat,

newal nikpiyas tateshpawiliste pa hanse.

10 Ta amo inik timochiptiyaloskya,

ashka yatiyaloskya wan tiwalmokwepalosya ohpa!

11 Kwakin nitats Isra'El,

kinmili:

―Ta amo onka kina kwal,

kwakin shikchiwak in:

Shihwikilik pa anmotamamal temakaliste kwal in takat,

yewal tikchiwal wan mo'apawal pa in tal,

shihwikilik tipit balsamo,

tipit nekti,

wan sek yewal fragante,

wan mira yewal fragante,

wan sek nwese',

wan almendra'.

12 Shihwikilik in tomi yewal anmishwalkwepil kwah anwalmokwepak,

yewal ankitak pa nikamak anmotamamal.

Wan shihwikilik oksep in tomi wan niyok shihwikak ka tashtawaske,

kampa oksela okital.

13 Shihwikak anmonohni tipichi wan shimokwepak ka in takat.

14 Yewal in Dyos kipi chikawaliste ma kichi pa in takat pa kipiyas ta'ihnililiste pa anmehwante pa yok kimakawas in okse anmonohni wan BenYamín!

Pa kishki newal,

hanwel ta monek pa nikinpolos nopilwam,

yewal ten nikchiwas!

Ma nimoka ka amoten nokon!

15 Kwakin kiwikak yehwante takam inik temakaliste,

wan niyok kiwikak tomi,

pa kikwepililoskya wan ka takowaloskya wan niyok kiwikaloya ninohni BenYamín,

temok pa Egipto.

Wan moneshtik pa i'ishpa Yosé.

16 Kwah kit Yosé ninohni BenYamín ka yehwante,

kili yewal niwetatakewan pa nikal:

“Shikinwik inik takam pa nokal.

Wan shihmikti se yolke wan shikyokshit,

kampa yehwante takwaske takwalispa nonawak.”

17 In takat kichi kina kili Yosé wan kinwik pa nikal.

18 Kampa yehwante momaptitikatkaloya in takam kwah kinwikaloya pa nikal Yosé:

“Kitoloya ka in tomi yewal tishkwepilik kwah timokwepaloya pa tokal.

Ashka kinek tishkitskis,

pa tishchiwas inintikipanolme,

wan pa tishkishtilis toburro'.”

19 Kwakin ki'asik in wetatakewan pa nikal Yosé,

wan pa in tatapoli pa in kal tahtok inak yewal kilik:

20 Shitishihnil,

tats:

―Melak setonatim tehwante tiwalak timokowilik takwal;

21 kwah timokwepak,

timoketsak kaha timosewiloskya in yowal,

kwah tikintapok totamamal ompa katka totomi pa sesen nikamak totamamal mochi totomi.

Yok tihwalikak oksep in tomi ka tehwante!

22 Niyok tihwalikak tomi pa titashtawaske in trigo yewal tihkowaske.

Amo tihmatil akyewal kital totomi pa totamamal!

23 Wan in wetatakewan pa nikal kinnankili:

―Amo shimomaptik.

AnmoDyos anmehwante wan niDyos anmotats anmishtalil in tomi pa anmotamamal.

Newal nikonan anmotomi yewal nishtashtawilik.

Kwakin kiwalikak Shime'ón ka yehwante,

24 wan in wetatakewan pa nikal kinwik in takam pa kalitik pa nikal Yosé.

Kinmak at pa kinpakaloskya nikshiwam,

wan kintamak ininburro'.

25 Yehwante,

kichiwak temakaliste,

inik yewal kiwalikilik Yosé kwah asiskya takwalispa,

kampa takakik ompa takwaloskya.

26 O'as Yosé pa nikal,

ninohniwan kimakak inik yewal kiwalikilik,

wan mopachok ni'ishpa pa in tal.

27 Kintahtanili Yosé kina katkaloya,

kwakin kinmili:

―Kina onka anmotats,

in tats kolinche yewal annichilik?

Yoltik?

28 Yehwante kinankilik:

―Totats,

motikipanol,

kwal onka,

wan yoltik.

Wan mopachok ni'ishpa yewal pa kichiwililoskya tamawishtiliste.

29 Kwakin Yosé otachi wan okit BenYamín,

ninohni in okse nikon nitats wan ninantsi,

wan kito:

―In yewal anmonohni tipichi,

in yewal nishtakichilik anmehwante?

Ma mishmashti Dyos,

nokon!

30 Kwah kit Yosé ninohni,

kinekiya chokaskya,

kampa kinekiya kinapaloskya yok yewal mo'isiwilti.

Okalak pa nikwarto wan ompa chokaya.

31 Kwakin mosham,

wan mopohpo nishayak wan okis,

wan kito:

“Shihwalikak takwaliste!”

32 Yosé takwaya oksela,

katkaloya ninohniwan pa okse,

kaha takwal wan in egiptiyo katkaloya ka Yosé takwaloya pa okse kaha takwal.

Katka in egiptiyo' kampa amokwal takwaloskya kaha takwaloya hebreteko',

kampa tatatsotal katka pa egiptiyo'.

33 Motalik Yosé ninohniwan pa annimesa han kina shiwim kinpiyaloya,

kina takatiloya yewal we ka Rubén wan tam ka BenYamín kwah tamik motalik,

ninohniwan Yosé mokawak mo'itatikat.

34 Katka in takwaliste kaha takwa Yosé,

wan nitikipanol ki'onan in takwaliste wan kinwalikilik sesen wan sesen ninohniwan se shikal temtiyaya ka takwaliste wan kiwikilil BenYamín we takwal kina makwil shikalme pa nishikal,

yok we katka nitakwal.

Wan takonik ka Yosé,

wan kipiyaloya pakiliste ka yewal.