Pawlos pa in tal tipichi ipanta wehwe'atim Malta
28
Kwah moshte tikatkaloya takistiliste ka toyoliliste,
tihmatik kampa in tal tipichi ipanta wehwe'atim itoka Malta.
2 Yok in masewalme yehwante mochantiloya ompa kwal tishchiwilik,
kampa otatatik hyero sewa katka wan kiyaptikatkaya,
otishnotsak pa timototoniloskya.
3 Kwakin Pawlos kipehpenaya kwawit,
wan kitastikatka pa teshoshte,
kwah owalkis se kowat ka in totonki wan okikwa pa nimahwa.
4 Kimani okitak inik masewalme salotikatkaya kowat pa nimahwa Pawlos,
wan mo'ilik sek ka oksek:
—In takat se yewal tamiktiyan,
kampa yok mokistil niyololiste pa in wehwe'atim,
ma yok in dyosa tahosgaro amo okika pa yoliskya.
5 Ma yok Pawlos okitsehtsel nimahwa in kowat tamaka wan owets pa teshoshte wan amoten okipan.
6 Wan kichishtikatkaloya moshte pa posawaskya wan pa wetsiskya mihke;
wehkawak kitatiyak,
kampa okitak amoten kipanowaya,
yahmo yok tamatiloya wan kitoloya kampa Pawlos katka se dyos.
7 Amo wehka katka nitalme in takat itoka Publiyus,
se wetatakewan ka yehwante mochantiloya pa itenko in tal tipichi ipanta wehwe'atim,
yewal otishtenamik kwal pa ni'icha wan ompa otimokawak pa yey tonatim.
8 In nitats Publiyus katka kokoshke kipiyaya atonawiste wan mapitsaya yEste.
Pawlos oy okipashal,
wan kitahtoltiyaya Dyos pa yewal,
wan okitalil ininmahwam ipa yewal wan okipahti.
9 Ka in,
walak moshte kokoshkim yehwante mochantiloya ompa pa in tal tipichi ipanta wehwe'atim,
wan oyek tapahtilme.
10 In masewalme pa in tal tipichi ipanta in wehwe'atim tishtenamikik ka myak tamawishtiliste wan kimani tiwalmokwepaloya otishmakak mochiten tishteshmonekiskya pa ot.
Pawlos asi pa Roma
11 Kwah opanok yey meste,
wan otipanotiyak pa se barko yewal ompa opanoya sewalko,
katka in barko pa Alesandríya,
kiwikaya se takopinal ka in ome dyose' ka Kástor wan Pólukes.a
12 Ti'asik kaha asiloya in barko pa Sirakusa,
kampa timokawak yey tonatim,
13 wan ompa titayawalok pa in wehwe'atim itok Regyon.
Pa mostatik walyehyekaya kaha tatsintaSur wan pa in ome tonatim ti'asik pa Putóli.
14 Ompa tikinmitak sek tonohniwan taneltokalme yehwante tishtahtanik pa timokawaloskya inak yehwante pa chikome tonatim,
wan amo otiwehkawak otiyak pa Roma.
15 Inik tonohniwan pa Roma kipiyaloya tanawatiliste ika tehwante;
yok yaloya tishnamikiloya pa Poro in Apyos wan kaha ta'itokaya in yey Tabernas.
Kwah okinmit,
Pawlos okimak tashtawaliste Dyos wan kwal tamat.
16 Kwah oti'asik pa Roma,
in nikapitan gwacho' otimak inik tatsakwalme ka in wetatakewan kaha tatsakwal,
Pawlos kikawak mochantiti oksela,
ka se gwacho yewal kikwitawiyaya.
Pawlos kintakichili nitahtolDyos pa Roma
17 Wan panok yey tonatim Pawlos tatake pa kinnotsaloskya in wehwetatakewalme yudiyo' pa Roma,
wan pa kimani monichikok,
kinmili:
—Nonohniwan,
newal amoten onikchi ten amokwal ika in yudiyo wan niyok ika in ten kimatiloya kichiwaloya yewal kintemakak ininwichalme,
ma yok niye tatsakwal pa Yerushalém ka in romano'.
18 Kwah inik romano nishtahtanililoya miyak tachiwaliste,
ma yok amoten nishitilik ipa newal pa niyeskya tamiktil,
kwakin kinekiloya nishmakawaloskya.
19 Ma yok in yudiyo' mokwalantik wan yok onitahtan pa yok niyeskya tahosgaril ka Kaysar,
amoten nikchi pa nopweblo.
20 Kampa yok nihnek annimichitaskya wan annimishnots anmehwante,
kampa nitaneltok pa in Kristo kina moshte pa Isra'El,
kampa ni'onka tatsakwal ta'ilpil ka kadena'.
21 Kwakin yehwante kilik:
—Tehwante amo kaha tishasi amattakwihkwilol ka in Yudaya ika tewal wan niyok amo'ak ten kito ka inik tonohniwan yudiyo' yehwante o'asik nika amoten tichilil ten amokwal ika tewal.
22 Kampa tehwante tihnikil timishkakiske ten titamat,
kampa tihmatil pa kaha han motakets ika in se yankwik tanichikol.
23 Yok kwakin,
kitalik se tonat,
wan pa in tonat asik myak masewalme kaha Pawlos moseptikatka.
Wan pa watsinko wan pa tyotak Pawlos kintakichiliyaya nireynaroliste Dyos.
Kinekiya pa taneltokaloskya ka in Yehshwa,
kipewaltiyaya ka NitanawatilMoshé wan pa in amam ka niTaketsalme nitahtolmeDyos.
24 Sek masewalme okineltokak Pawlos ten yewal kintachiliyaya,
wan in oksek amo okineltokak;
25 wan amo katkaloya ka in se tahtol ika yehwante,
yok han sesen panotiyak.
Kwakin Pawlos kinmili:
—Kwal kitowaya in EspirituSanto ka anmowichalme ika niTaketsal nitahtolDyos YeshaYah,
kitowaya:
26 Shi wan shikinmil inik masewalme:
Anmehwante antakakiske,
wan amo ankimatiske ankikakiske;
wan ankitaske,
amo ankimatiske ankitaske;
27 kampa inik masewalme kinchikawaltik ininyolme,
wan anmotsakwilik ininnakaswam,
wan ankintsakwak annishtololwam ta amoyok yeskya,
kimatiloskya kitaloskya in ten ankitak,
wan in ten ankikakik,
wan yok kimatiloskya takakiloskya ka ininyolme,
wan amo kinekil walmokwepaske ka newal wan amo kinekil kampa newal nikinpanti.
28 Pawlos kinmili,
kampa Dyos okiwaltitan nitahtol pa yehwante kishki amo yudiyo',
wan yehwante takakiske.
29 Kwakin Pawlos kito,
in yudiyo' miyak mokwalantiloya ika yehwante.