Ganu Malikisada
7
Malikisada vu nam pa mogono maꞋa a̱ likuci i Salem n ganu vu Ka̱shile MalaꞋimili.
Ana Ibrahim wi o kubono a kpaꞋa a ayin a na u lyaꞋi ngono n na̱shi ma n kuvon,
Malikisada wu uta̱i u gasai n a̱yi ɗa u zuwakai ni una̱singai.◊
2 Ɗa Ibrahim u nekei ni ili i te a̱ ka̱tsuma̱ ka kupa dem i na u bonokoi a̱ ubuta̱ u kuvon wa.
Ili i iyain i na ci cigai kudansa adama a Malikisada i ɗaɗa,
kula ka ku ɗaɗa,
“mogono ma na ma ci yaꞋansa ili yu usuɓi.”
A̱yi ɗa kpamu “mogono ma̱ ma̱ta̱na̱” adama a na Salem ɗaɗa “ma̱ta̱na̱.”
3 Babu vuza na u yevei esheku ko a̱na̱ku a Malikisada,
n ubuta̱ u na wu uta̱i,
n ayin a na a matsai ni,
ko ayin a na u kuwa̱i.
Wi ta̱ tsu Maku ma̱ Ka̱shile wi ta̱ kpamu o kokpo ganu ko wanai.
4 Zukai biꞋi n uteku u na Malikisada wi ishi n tsugbayin!
Ko Ibrahim,
akaya a gbayin a aza a Israila,
e yeve ta̱ uteku u na Malikisada wi ishi n tsugbayin ana u nekei ni ili i te a̱ ka̱tsuma̱ ka kupa ki ili i na u ɗikai a̱ ubuta̱ u kuvon.
5 Wila̱ u yotsongu tsu ta̱ u dana anan ganu ra̱ka̱ u gaꞋan ta̱ a̱ uta̱ e kelentsu ke Levi,
ntsukaya mi Ibrahim.
Wila̱ kpamu u yotsongu tsu ta̱ u dana ntsukaya mi Ibrahim ra̱ka̱ sai e neke anan ganu ili i te a̱ ka̱tsuma̱ ka kupa a ili i na a̱ ciya̱i dem,
ko a na anan ganu a nan lo i punu a̱ ka̱tsuma̱ ke kelentsu ke le.
6 Malikisada a̱yi kelentsu ke Levi kaꞋa ba,
amma ɗa wi isai ili i te a̱ ka̱tsuma̱ ka kupa a̱ ubuta̱ wi Ibrahim.
Ɗa u zuwakai Ibrahim una̱singai,
vuza na wi isai ɗe uzuwakpani u Ka̱shile.
7 Yaba dem u yeve ta̱ a na vuza na wi n utsura u zuwaka vuza yoku una̱singai,
u tsu laꞋa ta̱ vuza na wi isai una̱singai wa n tsugbayin.
8 Anan ganu a ci isa ta̱ ili i te a̱ ka̱tsuma̱ ka kupa ki ili i na uma a̱ ciya̱i,
ko a na i uma koci a na a̱ kukuwa̱.
Amma Malikisada u laꞋa le ta̱ m gbayin,
adama a na Katagarda ka Ciɗa ko yotsongusu ta̱ a na wi n wuma.
9 Ci ta̱ feu a kufuɗa kudana a na ntsukaya n Levi,
aza a na a ci isa ili i te a̱ ka̱tsuma̱ ka kupa,
a tsupa ta̱ feu i ɗa ana Ibrahim u tsupai Malikisada ili i te a̱ ka̱tsuma̱ ka kupa.
10 Babu na a matsai Levi,
amma a̱yi biꞋi a ikyamba ya akaya a̱ ni Ibrahim ana Malikisada u gasai n a̱yi.
11 Ko a na Wila̱ u Musa u danai anan ganu sai a yaꞋan ntsukaya n Levi,
anan ganu a nan lo a kufuɗa kuzuwa vuza te wo okpo vuza vu ma̱riki uteku u na u yotsoi ba.
Adama nan lo sai a̱ ciya̱ ganu tsu Malikisada,
amma a umaci u Haruna ba.
12 Ayin a na baci kpamu ganu vi yoku kau u ta̱wa̱i,
mayun ɗa a sabaꞋa Wila̱ wa feu.
13 Ci ta̱ a kudansa ukuna u nam pa adama a̱ Kishi,
vuza na wu uta̱i e kelentsu ko yoku kau.
Babu vuza e kelentsu ka nan lo vu na u saꞋwai kuyaꞋan ulinga u tsuganu a katalikalyuka.
14 Yaba dem u yeve ta̱ a na wu uta̱i e kelentsu ka Yahuza,
Musa ta na u dana a na anan ganu a̱ kuta̱ e kelentsu ka nan lo ba.
Kishi ki ta̱ tsu Malikisada
15 Na va ta na wo okpo ta̱ kpamu teshe ana ce enei ganu vi yoku vu ta̱wa̱i,
vuza na wi tsu Malikisada.
16 Vuma vu nan lo e ɗeke yi ganu adama a ikaya i ni ko wila̱ ba,
amma adama a utsura u wuma u ni u na wi o kukotso ba.
17 Katagarda ka Ciɗa ka danai adama a̱ ni,
“Avu ganu ɗa ko wanai,
tsu na Malikisada wi ishi ganu.”◊
18 Gogo na a zuwa ta̱ wila̱ u cau paki,
adama a na u ɗa wi ta̱ babu utsura n wasasa kpamu.
19 Wila̱ u Musa u fuɗa u zuwa ili yo okpo uteku u na u yotsoi ba.
Amma gogo na Ka̱shile ke neke tsu ta̱ ili i na i laꞋi n kugaꞋan,
ci keɗe a̱pa̱Ꞌa̱ n i ɗa.
Tsu nan lo tsu ɗa ta na tsa kuyawa ɗevu n Ka̱shile.
20 Ka̱shile ka kucina ta̱ a na Kirisiti Kishi u kokpo ganu ayin tutu,
amma u yaꞋanka ganu vi yoku lo tsu nam pa ba.
21 Yesu koci ɗa u danakai:
“Mpa,
Vuzavaguɗu,
n kucina ta̱ n ili i nam pa,
mi ta na a kusabaꞋa ka̱ɗu ka̱ va̱ ba.
‘Avu ganu ɗa ko wanai.’ ”◊
22 Yesu ɗa vuza na u zuwai uzuwakpani wa wo okpo mayun,
u na u laꞋi u na Ka̱shile ka yaꞋin m Musa a kugaꞋan.
23 N ayin a cau,
ganu u kuwa̱ baci,
wi a kulyaꞋa kelime n kokpo ganu ba.
Ɗaɗa i zuwai ɗa anan ganu o yongoi lo n a̱bunda̱i.
24 Amma Yesu ganu ɗa wi ko wanai;
tsuganu ci ni tso kukotso ba.
25 Adama a nannai,
a̱yi ɗa wi gogo na,
n ayin tutu,
vuza na u kufuɗa wa kisa aza a na a̱ ta̱wa̱i u Ka̱shile n ubuta̱ u ni.
Wi ta̱ n wuma ko wanai adama a na u folono Ka̱shile adama a ele.
26 Yesu ɗa mogono ma anan ganu ma na ci a kuciga,
adama a na u tsu ɓa̱nka̱ tsu ta̱ a̱ uye dem.
Ili i na u ci yaꞋan i ci yokpo ta̱ Ka̱shile.
Wi ta̱ babu unushi.
Ka̱shile keꞋwe yi ta̱ kau n aza a aduniyan a na a ci yaꞋan unushi.
Ɗa u nekei ni ubuta̱ u na u laꞋi n tsugbayin na ɗe gaɗi.
27 A̱yi wi tsu anan ganu vu na vu buwai ba,
aza a na sai a yaꞋan alyuka kanna dem,
a ci lyuka ta̱ biꞋi adama a unushi u le,
ka̱ta̱ e yeve a lyuka adama a unushi u uma.
Amma Yesu u yaꞋan ta̱ ili i nam pa kute,
ɗa ta na wu untsakai adama a ayin ra̱ka̱,
ana u lyukai ka̱ci ka̱ ni a maɗanga ma atakaci.
28 Wila̱ u danai uma o okpo ta̱ ngono n anan ganu,
ko a na a fuɗa a yaꞋin uteku u na u yotsoi a yaꞋan ba.
A̱ ugiti biꞋi,
Ka̱shile ke nekei Musa Wila̱ wa.
Ana u kotsoi kuyaꞋan nannai,
ɗa u yevei u zuwai Maku ma̱ ni mo okpo mogono ma anan ganu n akucina.
A̱yi ɗa u fuɗai u yaꞋin ili ra̱ka̱ i na Ka̱shile ka cigai ni u yaꞋan.