Mi ta̱ a kuɗanaka Filimo,

vuza na wi vutoku vu ulinga vu tsu,

vuza na kpamu ci cigai ka̱u n aza o Kutoni a na a tsu gasa a kpaꞋa ku ni.

Mi ta̱ feu a kuɗanaka taku vu tsu Afiya koɓolo n Arikibu vuza na wi toku vu tsu kosoji ka̱ Ka̱shile.

3 N folono ta̱ Ka̱shile Esheku a̱ tsu n Vuzagbayin Yesu Kirisiti Kishi o yotsongu ɗa̱ kasingai ke le,

ka̱ta̱ a̱ tuka̱ ɗa̱ m ma̱ta̱na̱ ma̱ a̱ɗu.

4 Filimo,

mi baci a kuyaꞋan kavasa adama a̱ nu,

n ci cikpa ta̱ Ka̱shile ayin tutu.

5 N ci yaꞋan ta̱ nannai adama a na mi ta̱ a kulyaꞋa kelime n kupana uneki u ka̱ɗu u nu u Vuzagbayin Yesu.

M pana ta̱ kpamu uteku u na vi cigai uma a̱ Ka̱shile ra̱ka̱.

6 N vasa ta̱ adama a na uneki u ka̱ɗu u nu u na u ɓolongi ɗa̱ u yimkpa,

ka̱ta̱ kpamu vu pana uyoꞋo wi ili i singai dem i na Ka̱shile ke nekei tsu.

Ka̱sa̱kpa̱ ka yaꞋan nannai adama a na e neke Yesu tsugbayin.

7 Ucigi u nu a kubana a̱ ubuta̱ u uma a̱ Ka̱shile u ci neke mu ta̱ ma̱za̱nga̱ ka̱u n utsura u ka̱ɗu.

Avu,

vuza va̱,

vu zuwa ta̱ uma a̱ Ka̱shile ra̱ka̱ a̱ ciya̱i ugaꞋin u singai punu a̱ a̱ɗu e le.

8 Mi ta̱ o kufolono wu vi yaꞋan ili i yoku,

adama a na vi ciga ta̱ uma a̱ Ka̱shile.

A̱ ka̱tsuma̱ ka kula ku Kishi,

mi ta̱ a kufuɗa ma gutsa wu n kadanshi,

amma n kuyaꞋan nannai ba.

9 Gogo na n folono wu ta̱ ili i nam pa,

ka̱ja̱Ꞌa̱ ka̱ va̱ adama a maciganai ma na ci m maꞋa,

ciɓa mpa ɗa Bulusu,

ciɓa kpamu a na mpa mokoshi ma̱ gba̱ra̱ maꞋa ma na mi a ugbashi adama a kadanshi ke Yesu Kirisiti Kishi.

10 Ili i na n folonoi nu i ɗa na:

vi yaꞋanka Unisima kasingai.

A̱yi maku ma̱ va̱ maꞋa,

gogo na wo okpo ta̱ vuza vu Kutoni,

a ayin a na mpa mi punu na a̱ ubuta̱ wu ugbashi.

11 Ayin a cau a̱yi vuma vu gbani ɗa wa̱ nu.

Amma gogo na wi ta̱ n ulinga u singai wa̱ tsu dem.

12 Mi ta̱ a̱ kusuku yi u bono wa̱ nu,

wi ta̱ adanshi mi ta̱ a̱ kusuku ka̱ɗu ka va̱ wa̱ nu.

13 Mi ishi n ciga kushamkpa yi na nu mpa,

a na mi ushiyi n ikani yu ugbashi adama a kadanshi ka Arabali a Singai.

Wi ta̱ na a kuyaꞋanka mu ulinga u na vi ishi a na va yaꞋanka mu.

14 Amma n ciga kuyaꞋan ili babu vu ushuku ba.

N ciga vu ɓa̱nka̱ mu adama a na mpa ɗa n gutsakai nu ba.

N ciga ta̱ vu ɓa̱nka̱ mu adama a na ka̱ɗu ka̱ nu ka ciga ta̱ kuyaꞋan nannai.

15 Ili i na i zuwai ɗa u ka̱sa̱kpa̱i wa̱ nu kaikulu i ɗaɗa:

adama a na ta̱wa̱ baci u bono ka̱ta̱ u yongo n avu na ali ko wanai.

16 U buwa kagbashi koci ba,

amma u laꞋa ta̱ kagbashi,

a̱yi vuza tsu ɗa vu ucigi.

N ciga yi ta̱ ka̱u,

gogo na ka̱ta̱ vi ciga yi ka̱u.

Ka̱ta̱ vi ciga yi an vuma,

ka̱ta̱ feu vi ciga yi an vuza nu a̱ ubuta̱ u Vuzagbayin.

17 Gogo na vi ɗika mu baci ana mpa tovu ɗa vu ulinga,

isa yi uteku u na va kisa mu,

adanshi mpa ɗa n ta̱wa̱i n ka̱ci ka̱ va̱.

18 U nusaka wu baci ɗe ko nini ɗai u ɗa wi ko vi baci o kutono yi ili,

mi ta̱ a kutsupa wu i ɗa.

19 Mpa ɗa Bulusu,

ekiye a̱ va̱ a ɗa kpamu a ɗanai kadanshi ka nam pa,

“Mi ta̱ a kutsupa wu.”

N dansa kpamu ka nam pa biꞋi ba:

Ana vi ciya̱i wishi u nu a̱ ubuta̱ u va̱.

20 Vuza va̱,

n folono wu ta̱ yaꞋan ili i nam pa i na n folonoi nu,

yaꞋan i ɗa ka̱ta̱ wo okpo uteku u na va kuyaꞋanka Ka̱shile tsugbashi.

Nahannai wi ta̱ a̱ kuɓa̱nka̱ mu n yaꞋan utsura a̱ ubuta̱ u Kishi.

21 Ko n gogo na an mi a kuɗana kadanshi ka nam pa,

n zuwa ta̱ ka̱ɗu a na vi a kufuɗa kuyaꞋan ili i na n folonoi nu,

n yeve ta̱ kpamu vi ta̱ a kufuɗa kuyaꞋan ili i na i laꞋi nannai.

22 N folono wu ta̱ lapula kunu ko omoci adama a̱ va̱,

adama a na n keɗe ta̱ a̱pa̱Ꞌa̱,

Ka̱shile ki ta̱ a kupana avasa a̱ ɗa̱,

ka̱ta̱ a̱ ka̱sa̱kpa̱ mu m bono wa̱ ɗa̱ babu megeshe.

23 Abafa wi ta̱ a̱ kukya̱sa̱ ɗa̱.

A̱yi wi ta̱ punu a ugbashi koɓolo nu mpa a̱ ubuta̱ u Yesu Kirisiti Kishi.

24 Otoku a ulinga a̱ va̱ Marukusu,

n Arisataka,

n Dima,

n Luka,

dem vi le i ta̱ ikya̱shi i ɗa̱.

25 Ka̱sa̱kpa̱ kasingai ka Vuzagbayin Yesu Kirisiti Kishi ko yongo n wuma u nu.