3 Tsu nan lo feu,

yotsongusu a̱ma̱ci a̱ gba̱ra̱-gba̱ra̱ o yongo uteku u na u yotsoi vuma vu na vi a kuyaꞋanka Vuzagbayin tsugbashi.

Ka̱ta̱ a̱ ka̱ra̱Ꞌa̱ n a yaꞋin kadanshi ka kavama ka uma ba,

ka̱ta̱ kpamu o okpo aza a na o kusoꞋo ma̱ra̱ ba.

Amma a kucikpa o okpo aza a na o kuyotsongusu ili i singai.

4 A̱ma̱ci a̱ gba̱ra̱-gba̱ra̱ a nam pa o yotsongusu a̱ma̱ci a wawaꞋa a ciga ali e le m muku n le.

5 O yotsongusu le o yongo n ugboji ka̱ta̱ o yongo kpamu ciɗa.

Ka̱ta̱ kpamu o yotsongusu le a̱ la̱na̱ iꞋuwa i le ka̱ta̱ a yaꞋan ili i na i gaꞋin.

Ka̱ta̱ o yotsongusu le a panaka ali e le.

A yaꞋan baci nannai a̱ kutuka̱ n kugoyi a̱ ubuta̱ u Kadanshi ka̱ Ka̱shile ba.

6 Tsu nan lo feu,

dana olobo a utsura o yongo n ugboji a̱ ubuta̱ wi ili i na a kuyaꞋan dem.

7 Ka̱ta̱ avu a̱ ka̱ci ka̱ nu vo okpo agisana we le a̱ ubuta̱ u kuyaꞋan ili i singai dem.

Ka̱sa̱kpa̱ ili i na vi a kuyaꞋan dem i yotsongu ida̱shi i singai n asuvu a̱ yuwu a̱ ubuta̱ wi ili i na vi o kuyotsongusu.

8 Ka̱sa̱kpa̱ kuyotsongusu ku nu ku yaꞋan derere,

ta lo vuza wa dansuka wu a̱ ubuta̱ u kuyotsongusu u nu.

Ka̱ta̱ aza a na baci i a kuciga kanananai n avu i ta̱ o kokpo n wono adama a na a̱ kuciya̱ ili i gbani-gbani i na a kudansuka wu ba.

9 Agbashi a panaka azagbagbaꞋin e le,

ka̱ta̱ a yaꞋan tsu na u yotsoi adama a na a̱ɗu a azagbagbaꞋin e le a pana uyoꞋo.

Ka̱ta̱ a yaꞋanka le ugbawansuvu,

ko a yaꞋan uboki ba.

10 Amma o okpo aza a na uma a̱ kushuku n ele,

ka̱ta̱ kpamu o yongo mayin.

A yaꞋan baci nannai a kuzuwa ta̱ kuyotsongusu ku Ka̱shile Kishi ko okpo ili i na uma a i a kuciga a̱ ubuta̱ wi ili dem.

11 Ta u yotsoi ili i yaꞋan nannai,

adama a na Ka̱shile ko yotsongu ta̱ ugaꞋin u ni u uma ra̱ka̱,

adama a na a̱ ciya̱ wishi.

12 UgaꞋin u Ka̱shile u yotsongusu tsu ta̱ tsu ka̱sa̱kpa̱ kuyongo babu Ka̱shile,

ka̱ta̱ tsu ka̱sa̱kpa̱ kupana uyoꞋo wi ili yu unushi.

Aduniyan a nam pa a̱ na̱mgba̱ ta̱,

amma ci yongo punu n kuka̱na̱ ku ka̱ci ka̱ tsu.

U yotso ta̱ feu ci yongo m ma̱riki ka̱ta̱ Ka̱shile ka pana uyoꞋo.

13 A̱ ka̱tsuma̱ ka ayin a nam pa a,

ci ta̱ feu a kinda kelime ayin tutu a̱ ubuta̱ u kanna ke mereve ku Uba̱nga̱ri Ka̱shile n Kishi,

a̱yi Yesu Kirisiti.

A kanna ka nan lo,

Yesu Kishi wi ta̱ o kubono n tsugbayin ci ni ra̱ka̱.

14 U neke ta̱ wuma u ni adama a na wi isa tsu a̱ ubuta̱ wu unushi dem,

ka̱ta̱ feu u za̱Ꞌa̱ tsu ciɗa.

Ɗa u nekei wuma u ni adama a na u zuwa tsu tso okpo uma a̱ ni,

adama a na ci neke ka̱ci ka̱ tsu ra̱ka̱ a̱ ubuta̱ u kuyaꞋan ili i singai.

15 Ka̱ta̱ vi yotsongusu ili i nam pa,

ka̱ta̱ vu dana uma a̱ nu a yaꞋan i ɗa.

Ka̱ta̱ vu lapulaka le ayin a na baci de dem u yotsoi vu lapulaka le.

Vi ta̱ n utsura vi yaꞋan nannai,

adama a nannai ka̱ta̱ vu ka̱sa̱kpa̱ vuza u goyo wu ba,

ka̱ta̱ kpamu vu ka̱sa̱kpa̱ o goyo ili i na vu danai ba.