Kuyotsongusu ku na a kucikpa Ka̱shile
2
Ili i iyain,
n dana wu ta̱ vu vasaka yaba dem.
Vi baci a kuyaꞋan ufolu,
folono asuvayali a̱ Ka̱shile a kubana we le,
avu ka̱ta̱ vi cikpa Ka̱shile vi yaꞋanka yi ogodiya.
2 Vasa nahannai adama a ngono n aza a na i o tsugono.
Vi yaꞋan nannai adama a na ci yongo m ma̱ta̱na̱ n ka̱bini.
YaꞋan nannai adama a na ci yongo uteku u na Ka̱shile ki a kuciga kpamu ka̱ta̱ ci ciya̱ ma̱riki a̱ ubuta̱ u uma.
3 KuyaꞋan kavasa nannai u gaꞋan ta̱,
ci yaꞋan baci nannai Ka̱shile feu ka kupana ta̱ uyoꞋo u tsu.
4 Ka̱shile a̱yi ɗa vuza na wi a kisa tsu,
u ciga ta̱ wi isa uma ra̱ka̱.
U ciga ta̱ uma ra̱ka̱ e yeve ili i mayun.
5 Ka̱shile ke te kaꞋa.
Vuma vi te wi ta̱ lo kpamu vuza na wi e mere ma̱ Ka̱shile n uma.
Vuma vu nan lo va a̱yi ɗa Yesu Kishi.
6 A̱yi Yesu endeꞋen a̱yi ɗa vuza na u tsulai kuyongo ku ba̱ri ku uma dem a ayin a na u nekei ka̱ci ka̱ ni adama a na a una yi.
Ka̱shile ke nekei aduniyan akaka a nam pa a a ayin a na a laꞋi n kugaꞋan.a
7 N ci yaꞋan ta̱ kadanshi ka mayun derere ana n danai Ka̱shile kaꞋa ka zagbai mu mo okpo vuzavusuki n vuza kudana uma kadanshi ka̱ Ka̱shile.
Ka̱ta̱ n yotsongusu Aza̱ka̱yimbi kuneke ku ka̱ɗu ku mayun.
8 Adama a nannai,
a ayin a na baci i ɓolongi ka̱ci ka̱ ɗa̱ kuyaꞋan kavasa dem n ciga ta̱ ali a̱ ɗengusa̱ ekiye e le i baci a kuyaꞋan kavasa,
n ciga ta̱ kpamu ekiye a nan lo a yaꞋan ciɗa.
Mawansa ma yaꞋan a̱ ubuta̱ wa aza a na i a kuyaꞋan kavasa ba.
9-10 N ciga ta̱ feu a̱ma̱ci a pala aci e le,
ka̱ta̱ a shiya nyaga tsu na u gaꞋin ta lo a kuzuwa uma kuta̱ɗa̱tsa̱,
ka̱ta̱ kpamu a shiya mayin n na n yotsoi.
UgaꞋin u le wi ta̱ a̱ kuta̱ a̱ ubuta̱ wi ili i na a kuyaꞋan.
UgaꞋin u le ta wi a̱ ubuta̱ u kucaꞋa ka̱nji ba,
ko ili i kuꞋuka yi ikebe ka̱u ba.
U ɗa wi a̱ ubuta̱ wi itali yi ikebe ko nyaga mi ikebe ba.
A̱ ka̱sa̱kpa̱ ili i nan lo.
11 A̱ma̱ci a pana mayin ka̱ta̱ a piꞋisa tsu na u yotsoi,
ka̱ta̱ kpamu a panaka uma.
12 Mu ushuku a̱ma̱ci o yotsongusu ali ba,
mu ushuku kpamu a yaꞋan kelime ka ali ba.
A̱ma̱ci a pana mayin tsu na u yotsoi.
13 Ili i na i zuwai ɗa wo okpoi nannai ɗaɗa Ka̱shile ka yaꞋan ta̱ A̱da̱mu a cau,
ɗa u yevei u tonoi n Hawa.
14 Ɗa Kalijani feu ka̱ ya̱nsa̱i vuka va,
ɗa unushi u gita̱i.
Kalijani ka̱ ya̱nsa̱ A̱da̱mu ba.
15 Adama a nannai,
Ka̱shile ki ta̱ a kisa a̱ma̱ci i baci a kumatsa muku,
amma a lyaꞋa kelime n kokpo aza a uneki wa̱ a̱ɗu,
o yotsongu ucigi ka̱ta̱ o yongo uteku u na Ka̱shile ka cigai.
Ka̱ta̱ o yongo m ma̱riki ma singai.