Akaka a Iyain a̱ Bulusu a kubana u
Timoti
Kuɓa̱yuwa̱
1
Mpa ɗa Bulusu n ka̱ci ka̱ va̱,
vuza na u ɗanakai nu akaka a nam pa.
Mpa vuzavusuki vi Kirisiti Kishi adama a na Ka̱shile n Yesu ɗa a zuwai mu mo okpoi nannai.
Ka̱shile a̱yi ɗa vuza na wi isai tsu,
Yesu Kishi a̱yi ɗa a̱pa̱Ꞌa̱ a̱ tsu.
2 Mpa ɗa mi a kuɗanaka wu,
avu Timoti,
maku ma̱ va̱ adama a na vi neke ka̱ɗu ka̱ nu wa̱ ni.
N ciga wu ta̱ vi yeve kasingai ka̱ Ka̱shile Esheku a̱ tsu n Yesu Kishi Vuzagbayin vu tsu.
N ciga ta̱ kpamu vi yeve asuvayali m ma̱ta̱na̱ me le.
YaꞋin mayin nu nlum ma aꞋuwa
3 Ayin a na m banai a iɗika i Makidoniya,
n dana wu ta̱ vi shamgba a̱ likuci ya Afisu.
N ciga ta̱ vu ɓarangu nlum n yoku n na mi a kuyaꞋan kuyotsongusu ka aꞋuwa a̱ ciya̱ a̱ ka̱sa̱kpa̱ kuyaꞋan nannai.
4 Ka̱ta̱ i tono iteꞋe ba,
ka̱ta̱ kpamu i la̱nga̱sa̱ ayin e kukece tsukaya ba.
Ili i nam pa yi ta̱ a̱ kutuka̱ n kanananai ali uma a̱ kpa̱ɗa̱ kuyaꞋan ida̱shi i le uteku u na Ka̱shile ke sheshei.
5 Ili i na i zuwai ɗa u gaꞋin vu dana le nannai i ɗaɗa adama a na a ciganai.
Ucigi u nam pa wu uta̱ ta̱ a̱ ubuta̱ u ka̱ɗu ka ciɗa,
n asuvu a singai,
koɓolo n kuneke ka̱ɗu ka mayun.
6 Amma uma n a̱bunda̱i o bonoko ɗe a̱ɗu e le ba,
sai a̱ ubuta̱ u kadanshi ka ukuna u ketepu.
7 A ciga ta̱ o okpo nlum n Wila̱ u Ka̱shile,
amma ta na e yeve kadanshi ka̱ Ka̱shile ka mayun ba,
ko n nannai ɗa i a̱ra̱ɗi e kuyeve kaꞋa.
8 Ci yeve ta̱ Wila̱ u Musa u gaꞋan ta̱.
Vuma u tono baci u ɗa tsu na Ka̱shile ka danai.
9 Ka̱shile ka zuwa Wila̱ adama a aza a̱ usuɓi ba.
U zuwa ta̱ u ɗa adama a aza a na o koɗoi Wila̱,
n ubuta̱ wa aza a na a ci yaꞋansa ili yi ugbamukaci ayin tutu.
U yaꞋan ta̱ feu nannai adama a aza a na i a kuꞋiwan kuyeve Ka̱shile,
n ubuta̱ wa aza a na a kuyaꞋansa unushi.
U zuwa u ɗa adama a aza a na i ciɗa ba.
Ka̱shile ka zuwa ta̱ Wila̱ wa adama a aza a na a̱ tsu kpa̱ɗa̱ kuneke yi tsugbayin feu.
Wila̱ wa wi ta̱ adama a aza a na a tsu una isheku i le n ina̱ku i le.
Ɗa kpamu u yaꞋin u ɗa adama a aza a munaka.
10 Ɗa kpamu u zuwai Wila̱ wa adama a aza a na i a kuyaꞋan tsugbani,
n aza a kuyaꞋan unushi u tsugbani kakau u na u buwai.
U zuwa ta̱ feu u ɗa a̱ ubuta̱ wa aza a na a tsu tsula uma n e dengei tsa agbashi.
Ta kpamu nannai,
u zuwa ta̱ u ɗa wa aza a na a ci yaꞋan aꞋuwa,
n koɓolo n wa aza a na a ci yaꞋan kadanshi ka aꞋuwa a̱ ubuta̱ wa afada.
Aza a na i a kuyaꞋan ili i na Wila̱ u Ka̱shile u sa̱nka̱i,
ele ɗa u zuwakai Wila̱ u nan lo wa.
11 Kuyotsongusu ku mayun ra̱ka̱ ki ta̱ o kuyotso kuyotsongusu ku na mi a kuyaꞋanka uma adama a̱ Ka̱shile ka singai.
Na ɗaɗa akaka a na Ka̱shile ke nekei mu adama a na n dana uma dem.
Vuzagbayin Yesu u yaꞋankai Bulusu kasingai
12 N cikpa ta̱ Yesu Kishi vuza na wi Vuzagbayin vu tsu,
u neke mu ta̱ utsura.
Wu ushuku ta̱ nu mpa ɗa u nekei mu ulinga u singai adama a na n yaꞋanka yi.
13 Ili i mereve i ɗa a kubana wa̱ va̱ ana u yaꞋin ili i nam pa,
adama a na n ci yongo ta̱ a kushika kula ku Kishi.
N yongoi a kutamba uma a̱ ni adama a na n foro le n uye u na n kufuɗa dem.
Amma Ka̱shile ka ciga mu ta̱ ko a na n yaꞋin ili i nan lo babu na n yevei ili i mayun,
babu na kpamu n nekei ka̱ɗu.
14 A̱yi Vuzagbayin u ciga mu ta̱ ka̱u.
Adama a kasingai ka̱ ni u tuka̱i mu a̱ ubuta̱ wu uneki u ka̱ɗu,
ɗa kpamu u nekei mu ucigi u na Yesu Kishi u ci yotsongu uma.
15 Yesu Kishi u ta̱wa̱ ta̱ a aduniyan adama a na wi isa aza a̱ unushi.
Mayun ɗa yaba dem wu ushuku.
Mpa ɗa feu mi ishi n laꞋi nu unushi,
a̱ ka̱tsuma̱ ka uma.
16 Adama a nannai,
ɗa Ka̱shile ka panai asuvayali a̱ va̱,
ɗa u zuwai mu mo okpo agisana e kureme ku ka̱ɗu ku babu uteku n Yesu Kishi.
U yaꞋan ta̱ nannai adama a aza a na a buwai a zuwa uneki wa̱ a̱ɗu u le u Kishi ka̱ta̱ a̱ ciya̱ wuma u na u kukpa̱ɗa̱ kukotso.
17 Ka̱sa̱kpa̱ ci cikpa Ka̱shile ka̱ta̱ tsu tono yi kpamu.
Ci yaꞋan nannai ali sai ayin a babu uteku n kukotso n kula.
A̱yi ɗa mogono ma ayin ra̱ka̱,
vuza na wi kene ba,
wi kpamu a̱ kukuwa̱ ba.
A̱yi ɗa Ka̱shile endeꞋen.
Ta nannai.
18 Kafu a ayin a nam pa,
uma o yoku a yaꞋan ta̱ kadanshi ke kene ki ili i na vu kuyaꞋan.
Maku ma̱ va̱,
Timoti,
odoki a̱ va̱ a ɗa na a na o tonoi kadanshi ka nan lo.
N ciga ta̱ kadanshi ka nam pa ke neke wu utsura adama a na vi yaꞋan vishili adama a kasingai.
19 A ayin a na baci vi a̱ vishili va,
vu ka̱na̱ kpamu uneki u ka̱ɗu ka̱ta̱ kpamu vu zuwa asuvu a̱ nu o yongo m ma̱ta̱na̱.
Uma o yoku a iwan ta̱ kuka̱sa̱kpa̱ uneki wa̱ a̱ɗu u le u tono asuvu e le,
ta kpamu nannai ɗa uneki wa̱ a̱ɗu u le u na̱mgba̱i tsu na wunla̱i u gbayin u tsu ɓoso kpantsu.
20 Aza o yoku a̱ ka̱tsuma̱ ke le a na a yaꞋin nannai va ele ɗa Hamanaya n Isakandari.
N neke ta̱ uma a nan lo a e ekiye a MalyaꞋi,
adama a na a piꞋisa,
ta lo a̱ kutuka̱ n ili i wono a̱ ubuta̱ u Ka̱shile.