Vuza vu kawuya
2
Uma a̱ va̱,
ci ta̱ a kudana ɗa̱ tsu na Vuzagbayin vu tsu Yesu Kristi Kishi u kubono,
koɓolo kpamu n tsu na o kuɓolongu tsu adama a na tsu gasa n a̱yi.
2 Ka̱ta̱ i na̱mgba̱ a̱ɗu gogoꞋo ko uma a gbandarasa ɗa̱,
a kudana kanna ko kubono ka Vuzagbayin ka yawa ta̱ ɗe ba.
U gaꞋan ba i ta̱ a kudana a pana ta̱ ili i nam pa a̱ ubuta̱ u kadanshi ke kene,
ko a̱ ubuta̱ wa akaka a na tsu dansai ko a na tsu ɗanai.
3 Ka̱ta̱ i ka̱sa̱kpa̱ a yaꞋanka ɗa̱ ugboji n ili i na i a kudansa ba.
Ili i mayun i ɗaɗa,
kanna ka nan lo ka̱ kuta̱wa̱ ba,
sai vishili vi ɗenga̱ a̱ Ka̱shile,
ɗa kpamu o yotsongi tsu Vuza vu Kawuya va,
vuza na mayun ɗa e kuneke yi ukpa̱ u babu uteku.
4 Wi ta̱ e kuneke ka̱ci ka̱ ni tsugbayin u la̱nga̱sa̱ a̱ma̱li dem ka̱ta̱ u ɓososo ili i na uma i o kutono ra̱ka̱.
Wi ta̱ a kuzuwa ka̱ci ka̱ ni a̱ A̱Ꞌisa̱ a Gbayin a̱ Ka̱shile,
a kudana e keteshe a̱yi Ka̱shile kaꞋa feu wi.
5 I ciɓa baci a ayin a na mi ishi koɓolo n a̱ɗa̱ n dana ɗa̱ ta̱ ili i nam pa ya.
6 Gogo na i yeve ta̱ ili i na i shamkpai ni,
adama a na i ta̱ o kuyotsongu yi koci ayin a̱ ni a yawa baci.
7 Utsura u kawuya u na wi a tsurala n Ka̱shile u gita̱ ta̱ ɗe ulinga u ni usokongi,
amma vuza na u kpadai ni u kulyaꞋa ta̱ kelime n kukpada yi,
ali sai kanna ka na a takpai vuza na u kpadai ni va.
8 Ka̱ta̱ Vuza vu Kawuya va u yotsongu ka̱ci ka̱ ni e keteshe,
a̱yi ɗa vuza na Vuzagbayin Yesu u kuna n ayinviki a̱ una̱ a̱ ni.
A̱yi ɗa vuza na Vuzagbayin Yesu u kuniꞋwa̱nta̱ngu a ayin a na u bonoi n tsugbayin ci ni.
9 Vuza vu Kawuya vu nam pa wi ta̱ a̱ kuta̱wa̱ kuyaꞋan ulinga u MalyaꞋi n utsura wa aꞋuwa koɓolo kpamu n urotu wa aꞋuwa n ili i mereve ya aꞋuwa.
10 A̱yi u kuyaꞋan ta̱ kpamu ulinga n ugboji n kawuya kakau adama a na u ya̱nsa̱ uma a̱ ciya̱ a̱ niꞋwa̱n.
I ta̱ a̱ kuniꞋwa̱nta̱ngu le adama a na a iwan ta̱ kuciga ili i mayun ɗa kpamu a iwain wishi u na wu uta̱i a̱ ubuta̱ u Ka̱shile.
11 Adama a nannai ɗa Ka̱shile ka̱ suꞋuki le ili yu utsura i na i kuya̱nsa̱ le ka̱ta̱ i zuwa le a̱ ushuku n aꞋuwa a.
12 Ta ta na nannai a̱ kilukpa̱ le adama a na i ta̱ a kupana uyoꞋo wi ili i gbani-gbani i na i a kuyaꞋan ali ɗa a̱ kpa̱ɗa̱i kuneke a̱ɗu e le wi ili i mayun.
I yongo n utsura
13 Uma a̱ va̱,
ci cikpa ta̱ Ka̱shile adama a̱ ɗa̱.
Vuzagbayin Yesu u ciga ɗa̱ ta̱ ɗa Ka̱shile ka zagbai ɗa̱ ali n ayin a ɗe n ugiti,
u dana wi ta̱ a kisa ɗa̱.
Wishi u nam pa u ta̱wa̱ ta̱ adama a na Ayinviki a̱ Ka̱shile a zuwa ɗa̱ ta̱ yo okpo ciɗa,
a̱ ta̱wa̱ ta̱ tsu na i nekei a̱ɗu n akaka a mayun.
14 U ɗeke ɗa̱ ta̱ a kubana a̱ ubuta̱ u wishi a ayin a na tsu danai ɗa̱ Arabali a Singai.
Gogo na yi ta̱ a kuꞋuwa a tsugbayin ci te n Vuzagbayin vu tsu Yesu Kishi.
15 Uma a̱ va̱,
adama a ili i nam pa u gaꞋan ta̱ i shamgba mayin,
i ɓa̱na̱ kuyotsongusu ku na ci yaꞋankai ɗa̱ n una̱ ɗa kpamu tsu ɗanakai ɗa̱.
16 Ka̱shile Dada vu tsu u ciga tsu ta̱.
Adama a kasingai ka̱ ni ɗa u nekei tsu utsura u ka̱ɗu u na wi babu uteku n a̱pa̱Ꞌa̱ a singai.
17 Kavasa ka̱ tsu kaꞋa Vuzagbayin Yesu Kishi n Ka̱shile Dada vu tsu u zuwa a̱ɗu a̱ ɗa̱ a tsurakpa.
Ci yaꞋan ta̱ kavasa adama a na e neke ɗa̱ utsura u kuyaꞋan ili i singai koɓolo n kudansa ili i singai feu.